Выбрать язык
Книги Ветхого Завета
Книги Нового Завета
с русским текстом2-тӥ книга
1Соломон Кузё-Инмарлэн нимызлы сӥзем корка пуктыны, аслыз эксэй корка пуктыны кутскиз.2Соломон сизьымдон сюрс носилкаен груз нуллӥсьёсты, тямыстон сюрс гурезьёсын из корасьёсты, соосты эскерись-чаклась куинь сюрс куать сю муртэ висъяз.3Тирысь Хирам эксэйлы Соломон вераны ыстӥз: «Кызьы тон мынам атаелы, Давидлы, лэсьтӥд – кедыр коръёс солы улон корка пуктыны ыстылӥд, озьы ик мыным но лэсьты.4Тани мон Инмарелэн Кузё-Инмарлэн нимызлы, Солы сӥзем корка пуктӥсько, Солэн азяз ческыт зыно ӵындытъянъёс ортчытъяны, курбон няньёс тырылыны, суббота нуналъёсы ӵукна но ӝыт, выль толэзь потыку, Инмармылэн Кузё-Инмарлэн праздник нуналъёсаз тылын сутӥськись курбонъёс ортчытылыны, кудъёсыз косэмын Израильлы вань вапумъёс ӵоже ортчытылыны.5Мынам пуктоно коркае быдӟым, малы ке шуоно быдӟым милям Инмармы, вань инмаръёслэсь Со вылын.6Кинлэн ке кужымез тырмоз-а Солы корка пуктыны, куке Сое Ин но, инъёслэн инъёссы но пушказы тэрытыны уг быгато? Кин мон сыӵе Солы корка пуктон понна? Со корка ӵындытон сямез ортчытыны гинэ ярано ке ярано, дыр.7Озьыен, мон доры Иудеяысь зарнилэсь, азвесьлэсь, ыргонлэсь, кортлэсь арбериос лэсьтыны быгатӥсез, гордпыръем, нап-горд, яхонт тусъем буёло шортлэсь куиськисьёсты, пуэз вӧлыса чеберъянъёс лэсьтӥсь усточиосты ысты, Иерусалимысь мынам усточиосыным ӵош, кудъёссэ дасяз Давид, мынам атае.8Ливанысь кедырпу, кипариспу, певгпу мыным ысты, мон тодӥсько уго, тынад ляльчиосыд Ливанын писпу кораны быгато шуыса. Тани, мынам ляльчиосы тынад ляльчиосыныд ӵош мынозы9мыным трос коръёс дасян понна, уго мынам пуктоно коркае быдӟым, паймымон.10Тани, нюлэс погыръясьёслы, кор корасьёслы, тынад ляльчиосыдлы, таӵе сиён сётӥсько: кызь сюрс мера-кор чабей, кызь сюрс мера-кор йыды, кызь сюрс бат вина, кызь сюрс бат вӧйпу вӧй».
11Соломонлы ыстэм гожтэтаз Тирлэн Хирам эксэез таӵе ответ сётэ: «Ас калыксэ яратэменыз, Кузё-Инмар тонэ Ас калыкезлы эксэе пуктӥз».12Хирам эшшо тазьы шуэ на: «Данлыко Израильлэн Инмарез Кузё-Инмар, инэз но музъемез кылдытӥсь, Давид эксэйлы визьмо пи сётӥсь, нодлыко, визьлыко пи, Кузё-Инмарлы храм, аслыз эксэй корка пуктыны малпасез.13Озьыен, мон тон доры визьмо, тодӥсь-валась адямиез Хирам-Авиез ыстӥсько,14солэн анаез Дан нылъёс пӧлысь, нош атаез Тир пи – зарнилэсь, азвесьлэсь, ыргонлэсь, кортлэсь, излэсь, пулэсь, нап-горд, яхонт тусъем шортлэсь, виссонлэсь, гордпыр ыжгонлэсь арбериос лэсьтыны быгатӥсь мурт, пу вылын пӧртэм пужыос вандылыны усточи, – ваньзэ, мае солы лэсьтыны косэмын луоз тынад суредасьёсыныд, тынад атаедлэн, мынам Давид кузёелэн усточиосыныз ӵош.15Нош чабеен йыды, вӧйпу вӧен вина, кудъёсыз сярысь тон, кузёе, верад, аслад ляльчиосыдлы ысты.16Нош ми, кӧня тыныд кулэ, сомында Ливанысь кор кораломы но зарезь вылтӥ Яффаозь пурен келяломы, нош тон соосты Иерусалиме нуллод».
17Со виын Израиль музъеме люкаськем, палэнысь лыктэм калыкез Соломон лыдъяз-ӵотаз, Давид атаез лыдъян-ӵотан ортчытэм бере ни сю витьтон куинь сюрс куать сю мурт люкаськиз.18Соос пӧлысь сизьымдон сюрссэ носилкаен груз нуллӥсь кариз, тямыстон сюрссэ – гурезьёсын из корась, куинь сюрс куать сюзэ эскерись-чакласькись, калыкез уже ӝутӥсь кариз.
Глава 2