Выбрать язык
Книги Ветхого Завета
Книги Нового Завета
с русским текстом2-тӥ книга
1Манассиялы дас кык арес вал, эксэе пуксьыкуз, витьтон вить ар со Иерусалимын эксэй пуконын пукиз,2Кузё-Инмар азьын со ярантэм ужъёс лэсьтыса улӥз, Израиль пиослэн син азьысьтыз Кузё-Инмарлэн уллям калыкъёсызлэсь юрӟым ужъёссэс адӟем карылӥз,3Езекиялэсь, атаезлэсь, куашкатэм гурезь йылъёсын вӧсяськонъёсты нош ик выльдӥз, ваалъёслы курбон сётон интыос пуктылӥз, тыпы сурдъёсын вӧсьёсты улӟытӥз, вань ин кужымъёслы йыбыртъяса улӥз, соослы ужаз-тыршиз;4Кузё-Инмарлэн корказ курбон сётон ӝӧкъёс пуктылӥз, кудӥз сярысь Кузё-Инмар шуиз вал: «Иерусалимын Мынам нимы пумтэм вапумъёс улоз».5Кузё-Инмар коркалэн кыказ ик азбараз, ин кужымъёслы сӥзьыса, курбон сётон ӝӧкъёс пуктӥз.6Со ик Енном пилэн нёжалаз ас пиоссэ тыл вамен поттӥз, тунаськиз, пелляськиз, веднаськон ужъёсын выриз, кулэм муртъёсты ӧтьылӥсьёсты, син пӧртмасьёсты котыраз люказ; Кузё-Инмарлэн азяз со трос ярантэм ужъёс лэсьтӥз.7Инмар корка вӧлыса лэсьтэм сульдэрез пуктӥз, нош Инмар Давидлы но солэн Соломон пиезлы вераз вал: «Та коркан но вань Израиль выжыос пӧлысь быръем Иерусалиме пумтэм вапумъёс ӵожелы Аслэсьтым нимме поно.8Мынэсьтым вань курон-косонъёсме быдэсъяны тыршыса улӥзы ке, Моисейлэн киыныз сётэм законъя, пуктон-косонъёсъя улӥзы ке, азьланяз Израиль пиослэсь пыдзэс соослэн атайёссы борды юнматэм музъемлэн сьӧраз потыны уг лэзьы».9Нош Манассия Иудеяез но Иерусалимын улӥсьёсты та калэ вуттӥз: израиль пиослэн азязы Кузё-Инмарлэн быдтэм калыкъёсызлэсь но уродэсь ужъёс лэсьтыса улыны кутскизы.
10Кузё-Инмар Манассиялы но, солэн калыкезлы но вералляз, нош соос ӧз кылзӥське.11Соку Кузё-Инмар соос вылэ Ассириялэн эксэезлэсь ожен кивалтӥсьёссэ лэзиз, соос лыктӥзы но Манассияез сьӧлтазы, жильыосын думылӥзы но Вавилонэ нуизы.12Ӝикаса-ёрмыса улыкуз, Инмарлэсь Кузё-Инмарезлэсь сюлворыны кутскиз, атайёсызлэн Инмарзы азьын туж зӥбыт-востэм кариськиз.13Солы вӧсяськиз но, Инмар со пала мыкырскиз, солэсь вӧсяськемзэ кылӥз но сое Иерусалиме, эксэй пуконаз, берыктӥз. Соку Манассия тодӥз: Кузё-Инмар – со Инмар.14Та бере Давидлэн городаз кыр палтӥз борддор ӝутӥз, Геонлэн шундыпуксён палтӥз, нёжал кузя, Чорыг капкае пырон дорозь, сое Офеллэн котыртӥз нуиз, ӝужыт-ӝужыт кариз сое. Иудеяысь вань юнматэм городъёсы ожен кивалтӥсьёсты пуктылӥз,15мурт инмаръёсты, Кузё-Инмарлэн корказ пуктэм сульдэрез-идолэз сэрпалтӥз, Иерусалимысь, Кузё-Инмарлэн коркаезлэн гурезь йылъёсысьтыз, аслэсьтыз пуктылэм курбон сётон куалаоссэ таркаса город сьӧры сэрпалтӥз.16Кузё-Инмарлы курбон сётон ӝӧкез выльысь тупатӥз, со вылын тупаса улонлы сӥзем, тау карон курбонъёс сётӥз но иудейёслы вераз, Израильлэн Инмарезлы Кузё-Инмарлы ужаса-тыршыса мед улозы шуыса.17Нош калык ялан гурезь йылъёсын курбонъёс сётыса улӥз на, соос Инмарзылы Кузё-Инмарлы ке но сӥземын вал.
18Манассиялэн мукет ужъёсыз, Инмарез азьын вӧсяськемез, Израильлэн Инмарезлэн Кузё-Инмарлэн нимыныз азьпалэз адӟисьёслэн солы верам кылъёссы Израиль эксэйёслэн книгаязы возисько.19Солэн вӧсяськемез, Инмарлэн со пала мыкырскемез, солэн вань сьӧлыкъёсыз, законлы пумит улэмъёсыз сярысь, Инмарлы Кузё-Инмарлы тэрытскись луэмезлэсь азьло гурезь йылъёсы вӧсяськон интыос лэсьтэмез, Астарталэсь сульдэръёссэ, идолъёс пуктылэмез сярысь Хозайлэн книгаяз гожъямын.20Атайёсыз кадь ик Манассия кулӥз но, сое корка вӧзысьтыз садаз ватӥзы. Со интые эксэе Амон пиез пуксиз.
21Эксэе пуксьыкуз, Амонлы кызь кык арес вал, кык ар ӵоже со Иерусалимын эксэй вал.22Манассия атаез кадь ик Кузё-Инмар азьын ярантэм ужъёс лэсьтыса улӥз. Атаезлэн, Манассиялэн, лэсьтэм вань сульдэръёсызлы курбонъёс сётылыса, соос азьын йыбыртъяса улӥз.23Атаез, Манассия, музэн Кузё-Инмар азьын тэрытскись ӧз луы; эшшо ке, Амон эшшо но тросгес сьӧлыкъёс лэсьтӥз.24Аслаз медоосыз ик лушкемен со вылэ урдскизы но ас корказ ик сое виизы.25Нош калык Амон эксэй вылэ лушкем урдскемъёсты ваньзэс вииз, та музъемысь калык со интые солэсь Иосия пизэ эксэе пуктӥз.
Глава 33