Выбрать язык
Книги Ветхого Завета
Книги Нового Завета
с русским текстом1Иессей выжыысь уд ӝужалоз, солэн выжыысьтыз вай пушъёз.
2Со вылын Кузё-Инмарлэн Духез улоз,
бадӟым визьлыклэн но валанлэн духсы,
визь-нодлэн но юнлыклэн духсы,
тодон-валанлэн но Инмар азьын кышкаса улонлэн духсы;
3Кузё-Инмарлэн гажанэз Со бордын пачылмыса улоз.
Аслаз синъёсыныз адӟыса гинэ, Со судить уз кары,
пельёсыныз кылыса гинэ, Со ужъёсты уз быдэсъя.
4Куанеръёсты шонерлыко судить кароз,
музъем вылысь курадӟыса улӥсьёслэсь ужъёссэс
шонер эскероз-быдэсъялоз.
Ымызлэн корт бодыеныз музъемез погыртоз,
ымызлэн духеныз сьӧлыклэсь кышкасьтэмез виёз.
5Солэсь кусъёссэ шонерлык думоз, Солэсь макессэ зэмлык думоз.
6Соку кион ыжпиен огазьын улозы;
барс кечпиен огазьын выдыса кыллёзы;
кунян но, левпи но, ош но огазьын улозы,
пичи пи соосты валтыса нуллоз.
7Скал но мумы гондыр одӥг уллёын ветлозы,
кунянэн гондырпиос огазьын выдыса кыллёзы;
лев, ош кадь, куро сиёз.
8Вож нуны сюро кыйлэн гу вылаз шудыса улоз,
пичи пи кыйлэн гуаз кизэ мычоз.
9Быдэс святой гурезям уродзэ, ярантэмзэ уз лэсьтэ,
уго, зарезьёслэн вуэн пачылмыса улэмзы кадь,
музъем выл Кузё-Инмарез тодонэн пачылмыса улоз.
10Со нуналэ Иессей выжыысь пушъет ӝутскоз,
со калыкъёсын кивалтыны кутскоз,
со пала язычникъёс берытскозы,
солэн каньыллыкез данлыкен пиштыса улоз.
11Со нуналэ тазьы луоз:
Кузё-Инмар нош ик кизэ мычоз Ассурысь,
Египетысь, Патросысь, Хусысь,
Еламысь, Сеннаарысь, Емафысь,
зарезьлэн шормуӵъёсысьтыз
Ас калыкезлэсь кылем люкетсэ Ас дораз ваён понна.
12Язычникъёслы знамя ӝутоз но
Израильлэсь улляськем-таркаськем муртъёссэ люкалоз,
музъемлэн ньыль пал пумаз пазьгиськем иудей калыксэ дораз ӧтёз.
13Ефрем кӧт пӧсен улэмысь дугдоз,
Иудалы тушмонъяськыса улӥсьёс быдтэмын луозы.
Ефрем Иуда вылэ кӧт пӧсен уз улы,
Иуда но Ефремез ӝикатыса-ёртыса уз ни возьы.
14Шундыпуксён пала филистим калыклэн пельпум вылаз
лобӟыса мынозы,
шундыӝужан палан улӥсьёсты одӥгтэм ваньзэс таркалозы;
Едом но Моав вылэ кизэс понозы,
Аммон калык соослы тэрытскыса улоз.
15Кузё-Инмар Египет зарезьлэсь кожзэ куасьтоз;
Аслаз кужмо тӧлэныз шур вылэ кизэ урдоз но
сое сизьым пичиесь ӧръёслы люкылоз,
озьы, со вамен сандали пыдкутчан коже выжемзы луоз.
16Соку, Ассуре кылем калыкезлы бадӟым сюрес луоз,
– сыӵе сюрес, кыӵеез сётэмын вал ини Израильлы,
Египет музъемысь со потыку.
Глава 11