Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь мыным верамын вал:2«Кышно эн басьты, та интыын тынад пиосыд но, нылъёсыд но медаз луэ.3Тазьы шуэ Кузё-Инмар та интыын вордсконо пиос, нылъёс сярысь, соослэн вордэм анайёссы сярысь, та музъем вылын улыны поттэм соослэн атайёссы сярысь:4секыт кулонэн соос кулозы, соос понна бӧрдӥсь но уз луы, ватэмын но уз луэ; музъем вылын кыед интыын лошъяськозы; тӥр-пуртэн, сютэм улонэн быдтэмын луозы, соослэн шӧйёссы ин тылобурдоослы, луд пӧйшуръёслы сиён луозы».
5Тазьы шуэ Кузё-Инмар: «Куректӥсь-бӧрдӥсьёслэн корказы эн пыры, соосын валче бӧрдыны, соосты жаляны эн ветлы; та калыклы сётэм каньыллыкме, гажанме, жалянме берен басьтӥ, – шуэ Кузё-Инмар.6Та музъем вылысь туж вылӥосыз но, покчиосыз но адямиос кулозы; ватэмын уз луэ, соос понна бӧрдӥсьёс уз луэ, уз курадӟытэ асьсэды, соос понна ӵышкиськись но уз луы.7Кулэм муртэз жаляса, куректыса соос понна нянь тӥялтӥсь но уз луы; атайзэс, анайзэс буре вайыса юыны соослы буйгатскон чаша но уз сётэ.8Соос огазьын сиыны, юыны шуыса, сиён-юон, шулдыръяськон корка но эн ветлы;9уго тазьы шуэ Израильлэн Инмарез Саваоф Кузё-Инмар: ”Та интыын тӥляд син азяды, тӥляд улоно нуналъёсады шумпотон куараез, шулдыръяськон куараез, вылькенлэсь куаразэ, эмеспилэсь куаразэ поттыны уг лэзьы.
10Та калыклы вань та кылъёсты верам берад соос тыныд шуозы: ”Мар понна Кузё-Инмар асьме вылэ таӵе бадӟым шугадӟонэз лэзьыны турттэ, кыӵеесь асьмелэн шонертэм ужъёсмы, Инмармы Кузё-Инмар азьын кыӵе сьӧлык лэсьтӥмы?”11Соку соослы шу: ”Тӥляд атайёстылэн Мон бордысь куштӥськемзы понна, – шуэ Кузё-Инмар, – мукет инмаръёс сьӧры мынэмзы понна, соослы ужаса улэмзы, йыбыртъямзы понна, Мон бордысь куштӥськемзы, законме утьымтэзы понна.12Нош тӥ атайёсты сярысь но уродгес лэсьтӥськоды, Мынэсьтым кылзӥськытэк, лек сюлэмдылэн вогъяськон сямызъя улӥськоды.13Со понна тӥледыз та музъемысь мукет музъеме сэрпалто, кудзэ тӥ но, тӥляд атайёсты но ӧз тодэ, отын мукет инмаръёслы уй но нунал ужаса-тыршыса улоды; Аслэсьтым гажан-жалянме тӥледлы уг ни возьматы.
14Тани, со понна ик вуо нуналъёс, – шуэ Кузё-Инмар, – куке уз ни шуэ: ”Израиль пиосты Египет музъемысь Поттӥсь Кузё-Инмар понна”;15но: ”Израиль пиосты уйпал музъемысь Поттӥсь, соосты улляса лэзем вань музъемъёсысь Поттӥсь Кузё-Инмар понна”, уго соосты атайёссылы сётэм ас музъемазы берыкто.
16Тани, Мон трос чорыгасьёсты ысто, – шуэ Кузё-Инмар, – израиль пиосты кутылозы; собере трос пӧйшурасьёсты ысто но, соос вань гурезьёсысь, вырйылъёсысь, изгурезьлэн пасьёсысьтыз израиль пиосты улляса поттылозы.17Мынам синъёсы соослэсь вань сюресъёссэс адӟе; Мынам азьысьтым соос ватэмын ӧвӧл, соослэн законлы пумит улэмзы но Мынэсьтым ватӥськемын ӧвӧл.18Кык полэс пунэмзэ берыкто соослэн шонертэм улэмзы понна, нимысьтыз секыт сьӧлыксы понна, малы ке шуоно Мынэсьтым музъемме синазькыль макеоссылэн шӧйёсынызы саптазы, люкет музъемме юрӟым макеосынызы тырмытӥзы».
19«Кузё-Инмаре! Тон мынам кужыме, юнматскон изкаре,
куректон-кайгырон нуналэ ватӥськон интые!
Дуннелэн пумъёсысьтыз калыкъёс лыктозы но шуозы:
”Милям атайёсмы люкетлы ӧрекчаськон,
тырттэм, нокыӵе но пайдатэм улон гинэ басьтӥзы”.
20Быгатэ-а адями аслыз инмаръёс лэсьтыны?
Лэсьтэм инмар Инмар ӧвӧл ук!»
21«Со понна ик, тани, Мон соослы суйбыгытме возьмато,
Аслэсьтым кужымлыкме потто но,
соку соос тодозы: Мынам нимы – Кузё-Инмар».
Глава 16