Выбрать язык
Книги Ветхого Завета
Книги Нового Завета
с русским текстом1Иудалэн сьӧлыкез корт вандонэн гожтэмын, алмазлэн йылсо нырыныз сюлэмзылэн вылаз, курбон сётонзылэн сюръёсыз вылын гожтэмын.2Вордэм пиоссы сярысь кадь соос курбон сётон интызэс тодазы ваё, ӝужыт вырйылъёсысь вож писпуос дорысь тыпы сурдъёсысь сульдэръёссэс тодазы возё.3Бусыысь гурезьме, тынэсьтыд ваньбурдэ, вань узырлыкъёстэ тарканы сёто, вань улон интыосысьтыд вань ӝужыт интыостэ сьӧлыкъёсыд понна мурт кие сёто.4Тон асэныд сэрен Мынэсьтым сётэм люкетме ыштод, тушмонъёсыд кие тонэ ляльчие сёто, – сыӵе музъем вылэ, кудзэ тон уд тодӥськы, малы ке шуоно тӥ вожпотонэлэсь тылзэ кенжытӥды; со пумтэм вапумъёс ӵоже ӝуаса улоз.
5Тазьы шуэ Кузё-Инмар: «Адями вылэ оскиськись,
лулмугор вылэ оскиськыса-пыкъяськыса улӥсь,
сюлмыныз Кузё-Инмарлэсь палэнэ кошкем адями, каргамын.
6Луоё кыр дуннеысь сусыпу кадь со луоз,
уз но адӟы, ку ӟечлык лыктоз но кыр дуннеысь пӧсь интыосы,
улӥсьтэм-калыктэм, емыш сётӥсьтэм музъем вылэ
улыны интыяськоз.
7Кузё-Инмар вылэ оскиськись адями бакельлыко,
Кузё-Инмар – солэн оскиськонэз.
8Ву дуре мерттэм, выжызэ ву ӧр кузя лэзись писпу кадь со луоз;
уг тоды со ӵушкась пӧсьлэсь лыктэмзэ;
куарез солэн вож, кӧс аръёслэсь со уг кышка,
емыш ваемысь но уг дугдылы.
9Адями сюлэм кадь кескич номыр ӧвӧл, со укыр сӧриськемын;
кин сое тодоз-валалоз?
10Мон, Кузё-Инмар, сюлме пырисько, пушез эскерисько-чакласько
котькудӥзлы лёгем сюресэзъя, ужезлэн емышъёсызъя
пунэмзэ тырон понна.
11Кыр курег ачиз пузамтэ пузъёс вылэ пуксе;
сыӵе ик луэ ӧрекчаськыса узырлык люкась;
улоно нуналъёсызлэн шор вадесазы со номыртэк кылёз,
улонэзлэн пумаз укылтэм вылэм шуыса лыдъяськоз».
12Кутсконысеныз ик вылӥ карем данлыклэн престолэз –
со асьмелэн дун-сьӧлыктэм луон интымы.
13Тон, Кузё-Инмаре, – Израильлэн оскиськонэз;
ваньзы, Тынэсьтыд палэнскемъёс, возьытэ вуозы.
«Мынэсьтым куштӥськисьёс пыд ул сюй вылэ гожтэмын луозы,
малы ке шуоно Кузё-Инмарез, улэп ву сётӥсь ошмесэз,
кулэтэм каризы».
14Кузё-Инмаре, бурмыты монэ – мон бурмо;
уть монэ – утемын луо;
уго Тон – мынам ушъяськонэ.
15Тани, соос мыным шуо: «Кытын Кузё-Инмарлэн кылыз?
Со мед лыктоз!»
16Тон дорын уллё возьмась луонлэсь мон ӧй палэнскы,
курадӟон нуналэз мон ӧй возьма, Тон сое тодӥськод;
мынам ымысьтым мар потӥз – со Тынад азяд усьтӥськемын.
17Кышкатон эн луы мон понна,
шугадӟон нуналэ Тон – мынам утиськон интые.
18Монэ улляса возисьёс возьытэ мед вуозы,
нош мон возьытэ вуттэмын уг луы;
соос мед куалекъялозы, нош мон куалекъясьтэм луо;
соос вылэ кык полэс курадӟон лэзь, пыргыты соосты.
19Кузё-Инмар дорысь мыным тазьы верамын вал: «Мыныса калыклэн капкаяз, Иудей эксэйёслэн пырон-потон капкаязы, султы, Иерусалимысь вань капкаос азе султы.20Соослы шу: ”Иудей эксэйёс, быдэс Иудея но, со капкаос пыр пырись Иерусалимын вань улӥсьёс, Кузё-Инмарлэсь верамзэ кылзэ”».21Тазьы шуэ Кузё-Инмар: «Суббота нуналэ ныпъет эн нуллэ, Иерусалим капкаос пыр соосты эн пыртэ, чаклаське, лулъёстэс уте.22Суббота нуналэ ныпъетъёсты коркаосысьтыды эн потталэ, нокыӵе ужен но эн выре, суббота нуналэ дун-чылкыт улэ, озьы, кызьы Мон тӥляд атайёстылы сӥзён-косон сётӥ.23Нош соос ӧз кылзӥське, пельзэс ӧз мыкыртэ, вог сюлэмоесь луизы – кылзӥськонтэм, визь-нод сётэмез кабыл басьтонтэм вылысь».
24Кузё-Инмар шуэ: «Нош тӥ Мынэсьтым кылзӥськиды ке, суббота нуналэ кар капкаос пыр ныпъетъёсты эн нуллэ, суббота нуналэ дун-чылкыт улэ, та нуналэ нокыӵе но ужъёс эн быдэсъялэ шуэмме,25соку та карлэн капкаосыз пыр Давидлэн престолаз пукись эксэйёс, кивалтӥсьёс, ожмаськон уробоос, валъёс вылын ветлӥсьёс, соос но, соослэн кивалтӥсьёссы но, иудейёс но Иерусалимын улӥсьёс пыралозы, соку та кар пырак дауръёс ӵоже улоз.26Иудеялэн городъёсысьтыз, Иерусалимлэн котыр ёросъёсысьтыз, Вениамин музъемысь, ӵошкыт интыосысь но, гурезьёсысь но, лымшорысь но лыктылозы, тылын сутӥськись курбонъёс, саламъёс вайылозы, нянь но ладан, тау карон курбонъёс Кузё-Инмарлэн корказ вайылозы.27Суббота нуналэ дун-чылкыт улон пумысен верамме ӧд ке кылзӥське, суббота нуналэ Иерусалимлэн капка пыртӥз ныпъет нуллонтэм пумысен Мынэсьтым верамме санэ ӧд понэ ке, солэн капкаосаз тыл ӝуато, соку со тыл Иерусалимлэсь юртъёссэ-четлыкъёссэ ньылоз, уз но кысы».
Глава 17