Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь Иеремиялы тазьы верамын вал:2«Султы но горшок лэсьтӥсьлэн корказ васькы, отысен Мон тыныд верано кылъёсме иворто».3Мон горшок лэсьтӥсьлэн корказ васьки, соку со ужа вал горшок лэсьтон бордаз.4Горшок лэсьтӥсьлэн горд сюйлэсь пӧрмытэм сосудэз солэн кияз ик куашказ; нош со берен солэсь ик мукет сосуд лэсьтӥз, – кыӵезэ солэн лэсьтэмез потӥз.
5Кузё-Инмар дорысь мыным верамын вал:6«Израиль юрт, та горшок лэсьтӥсь кадь ик Мон но тӥледын озьы ик карыны уг быгатӥськы-а? – шуэ Кузё-Инмар. – Кызьы горшок лэсьтӥсьлэн кияз горд сюй, озьы ик тӥ Мынам киям, Израиль юрт.7Кытӥ-отӥ кыӵе ке но калык яке эксэйлык сярысь Мон шуо: ”Выжытэм кельто, куашкато, быдто”;8нош та калык, кудӥзлы Мон тае верай, аслаз урод ужъёсызлэсь палэнскиз ке, соку Мон со уродэз, кудзэ солы лэсьтыны малпай вал, палэнтӥсько.9Нош кытӥ-отӥ кыӵе ке но калык яке эксэйлык сярысь Мон верало, сое интыяло, юнмато шуыса.10Нош со Мынам син азям уродзэ-лексэ лэсьтыса, Мынэсьтым верамме кылзӥськытэк улӥз ке, со ӟечлыкез уг сёты, кудӥныз малпасько вал солы умой карыны.
11Иудеяысь воргоронъёслы, Иерусалимын улӥсьёслы вера: ”Тазьы шуэ Кузё-Инмар: тани, Мон тӥледлы урод маке дасясько, тӥледлы пумит маке но малпасько; озьыен, ваньды урод сюрес вылысьтыды шонер сюрес вылэ потэ, тупатэлэ сюрестэс, улон-вылондэс но”.12Нош соос шуо: ”Эн но малпа: ми асьме малпамъя уломы, асьмелэн лек сюлэммылэн вогъяськон сямызъя ми лэсьтомы”.
13Соин ик тазьы шуэ Кузё-Инмар:
калыкъёс пӧлысь юалэ: таӵеез кинлэн ке но кылэмез вань-а?
Укыр синазькыль ужъёс лэсьтӥз Израильлэн нылыз.
14Ливанысь гурезь йыл лымытэк кыле-а?
Гурезьысь бызись кезьыт вуос бырозы-а?
15Нош Мынам калыке Мон дорысь палэнскиз;
соос кулэтэм макеослы ӵындыто,
ас сюрес вылазы канжаськизы,
вашкала сюресэз кулэтэм каризы
лёгымтэ сюрес кузяз ветлон понна,
16асьсэлэсь музъемзэс шимес макелы пӧрмытон понна,
пырак ӵожелы серекъян карыны,
котькудӥз со пыр ортчись мурт паймоз но йырыныз шоналоз.
17Шундыӝужанысь вуэм тӧл музэн
тушмонлэн син азяз соосты пазьго;
шугадӟон нуналазы соослы мышкыным берытско,
ымнырыным – уг».
18Нош соос шуизы: «Лыктэлэ, Иеремиялы пумит урод уж малпаломе: священниклэн законэз, визьлыко муртлэн кенешез-нодъянэз но, пророклэн веран кылыз но уз ышы-быры; лыктэлэ, кылынымы сое погыртомы, нош солэсь верамзэ пелямы ум понэ».
19Кузё-Инмаре, верамме санэ пон, тушмонъёсылэсь куаразэс кыл.
20Кулэ-а ӟечлы уродэн пунэмзэ берыктыны?
Тодад вай, кызьы мон, Тынад азяд султыса,
соослы дурбасьтӥ соос вылысь Тынэсьтыд вожпотондэ палэнтон понна.
Нош соос мыным гу гудо.
21Озьыен, соослэсь нылпиоссэс
сютэм улонэ кельты, тӥр-пурт улэ сёт;
кышнооссы нылпи вайисьтэмесь мед луозы,
палкышно мед кылёзы, кузпалъёссэс кулон мед погыртоз,
егит пиоссы ожмаськон дыръя меч улын мед кулылозы.
22Соос вылэ полкъёсын ожмаськисьёсты
малпамтэ дыръязы вайыкуд,
коркаосысьтызы ӝуштэм куараос мед кылӥськозы;
соос гу гудо монэ кутыны вылысь,
пыдъёсылы лушкемен сьӧлтэтъёс пуктылӥзы.
23Нош Тон Кузё-Инмаре,
соослэсь монэ виыны малпанзэс тодӥськод:
соослэсь шонертэм ужъёссэс санэ понытэк эн кельты,
сьӧлыксэс но эн кушты;
Аслад азьысьтыд соосты сэрпалты;
вожед потон дыръяд соослы лэсьты, кызьы кулэ.
Глава 18