Выбрать язык
Книги Ветхого Завета
Книги Нового Завета
с русским текстом1Вожез потон дыръя Сӥон нылэз Кузё-Инмар макем ӝоже уськытӥз!
Инмысь музъем вылэ куштӥз Израильлэсь чеберзэ,
Аслаз вожпотон нуналаз тодаз но ӧз вайы пыдул лёгетэз сярысь.
2Иаковлэсь вань улон юртъёссэ Кузё-Инмар быдтӥз, ӧз жаля,
йыркурез дыръя Иуда ныллэсь юнматскон интыоссэ куашкатӥз,
музъем вылэ погыртӥз, кулэтэм кариз эксэйлыксэ но,
солэсь кивалтӥсьёссэ но, – кырсь-сьӧлыко макеосты кадь;
3йыркурез ӝуаку, Израильлэсь вань сюръёссэ тӥяз,
Израилез Утись Аслэсьтыз бур кизэ тушмон вылысь басьтӥз но,
Иаковез ӵушкась тыл, котырысьтыз ваньзэ ньылӥсь тыл сутӥз.
4Тушмон кадь Кузё-Инмар Аслэсьтыз пукыӵсэ золтӥз,
тушмон кадь бур кизэ мычиз но,
мар дуно вал син азьлы, ваньзэ вииз;
Сӥон ныллэн вӧсяськон скиния вылаз тыл кадь
Аслэсьтыз вожпотонзэ кисьтӥз.
5Кузё-Инмар тушмон музэн Израилез быдтӥз,
солэсь вань юртъёссэ-четлыкъёссэ куашкатӥз,
юнматскон интыоссэ погыръяз,
Иуда нылэз ӝоже уськытӥз, бӧрдытӥз.
6Садлэсь кадь Аслэсьтыз кенерзэ басьтӥз-талаз;
Аслэсьтыз люкаськон интызэ тарказ;
Кузё-Инмар вунэтытӥз Сӥонысь шулдыръяськонъёсты но,
субботаосты но;
вожпотонэз пурӟыку, эксэез но, священникез но кулэтэм кариз.
7Аслэсьтыз курбон тыронзэ Кузё-Инмар кулэтэм кариз,
Аслаз вӧсяськон интыез бордысь сюлэмзэ палэнтӥз,
юртъёсызлэсь-четлыкъёсызлэсь борддоръёссэс
тушмонъёслэн киулазы сётӥз;
Кузё-Инмарлэн корказ праздник нуналэ кадь соос куаш поттӥзы.
8Кузё-Инмар Сӥон ныллэсь борддорзэ куашкатыны пуктӥз,
гозы кыскиз,
куашкатон-таркан бордысь Аслэсьтыз кизэ ӧз палэнты;
кыр палысьтыз юнматскон борддоръёссэ быдтӥз,
уртче-валче соос куашкатэмын.
9Капкаосыз музъем вылын лошъясько;
Со куашкатӥз, ворсэтъёссэ сузмытӥз;
солэн эксэез но, кивалтӥсьёсыз но язычникъёс пӧлын;
закон сӧриськиз-быриз,
солэн пророкъёсызлы но Кузё-Инмар дорысь
паймымон адӟонъёс уг ни вуо.
10Сӥон ныллэн пересь визьнодчиосыз музъем вылын шып пуко,
йырзэс пенен пызьназы, бышкись ӟустариен куссэс думизы;
Иерусалим нылъёс йыръёссэс музъем вылэ мыкыртӥзы.
11Синвулы чидатэк, синъёсы бездӥзы, пушкы-еры бугыръяське,
сюлмы пилиськыны турттэ ас калыкелэн нылызлэн
быременыз сэрен,
городлэн ульча шоръёсаз нылпиослэсь,
вож нуныослэсь сютэм улыса кулэмзэс адӟиськод ке.
12Соос анайёссылы шуо: «Кытын нянь, кытын вина?»,
городлэн ульчаяз яраё луыса,
ас анайёссылэн ал вылазы лулзы потылӥз.
13Иерусалим ныл, мар мон тыныд вералом, маин тонэ ӵошатом?
Тонэ буйгатон понна кинлы-малы тонэ укшатом,
нылмурт, Сӥон ныл?
Уго тынад яраед туж бадӟым, зарезь быдӟа;
кин тонэ йӧнатыны быгатоз?
14Тынад пророкъёсыд тыныд ӧвӧлтэмзэ, пӧяськыса веразы,
тынэсьтыд законлы пумит улэмъёстэ шарае ӧз поттылэ, –
кудӥныз пленэ шедёндэ палэнтыны луысал,
ӧрекчи усьтӥськонъёс вераллязы, нош соос тонэ улляны юрттӥзы.
15Тон пумысен сюрес кузя вань ортчисьёс киынызы чабкисько,
Иерусалим ныл пумысен шуласа, йырынызы сэзъяса верало:
«Та-а со город, кудӥз сярысь шуо вал:
чеберлэсь но чебер, быдэс музъем выллэн шумпотонэз?»
16Вань тушмонъёсыд Тон шоры ымъёссэс усьтӥзы,
шулало, пиньзэс йырйыса шуо:
«Ньылӥмы ми сое, та нуналэз гинэ возьмаса ми улӥмы,
чиданмы тырмиз, адӟимы!»
17Кузё-Инмар мае лэсьтыны малпаз,
Аслэсьтыз вашкала нуналъёсы верам кылзэ быдэстӥз,
жалятэк пазяз-тарказ,
Тон шоры учкыса, тушмонлы шумпотыны луонлык сётӥз,
уродъяськыса улӥсь муртъёсыдлэсь сюрзэс вылӥе ӝутӥз.
18Соослэн сюлэмзы Кузё-Инмарлы вазиське.
Сӥон ныллэн борддорез! Уй но нунал шур кадь синвудэ кисьты,
майбыр улыны эн сётскы, синъёстэ кырмышъяса ул.
19Султы но уйин, котькудӥз возьмаськись воштӥськыку,
ӧтьыса вазиськылы;
Кузё-Инмар азьын, вуэз кадь, сюлэмдэ кисьты;
вань ульчаослэн сэрегъёсазы сютэм улыса кулӥсь нылпиосыдлэн
лулзы понна Со пала киостэ мыч.
20«Учкы, Кузё-Инмаре, учкы: малы тон тазьы лэсьтӥд –
кышномуртъёс ас емышсэс,
асэнызы нонтэм-вордэм нунызэс, сиё?
Кузё-Инмарлэн вӧсяськон интыяз малы виемын
священник но пророк?
21Ульчаосын музъем вылын нылпиос но, пересь муртъёс но кыллё;
нылъёсы но, егит пиосы но тӥр-пурт улэ погразы;
Аслад вожпотон нуналад тон соосты виылӥд, жалятэк бышкалляд».
22Празднике кадь котькытысь но кышканъёсты мон доры ӧтид,
Кузё-Инмарлэн вожпотон нуналаз нокин но утиськыны ӧз быгаты,
нокин но улэп ӧз кыльы;
ваньзэс мынэсьтым сюдэм-вордэмъёсме,
быдэ вуттэмъёсме тушмонэ быдтӥз.
Глава 2