Выбрать язык
Книги Ветхого Завета
Книги Нового Завета
с русским текстом1Макем мӧзмыт пуке куке но трос калыко город!
Со палкышно кадь луиз;
калыкъёс пушкысь быдӟым,
шаеръёсын-ёросъёсын кивалтыса улӥсь,
выт тырыса улӥсьлы пӧрмиз
2Зол бӧрдэ со уйёсы, бам вылаз солэн синвуэз улэ;
вань яратӥсьёсыз пӧлын ӧвӧл буйгатӥсез;
эшъёсыз солэсь куштӥськизы, солы тушмон луизы.
3Иуда шугадӟонлы, секыт зӥбетлы чидатэк,
язычникъёс пӧлы улыны интыяськиз, но каньыллык уг шедьты;
ваньмыз со сьӧры уйиськисьёс ӝикыт интыосысен сое сутӥзы.
4Сӥонэ нуись сюресъёс ӝожтӥсько,
малы ке шуоно празднике мынӥсь ӧвӧл;
вань ӟезьыосыз-капкаосыз тырттэм кылизы;
священникъёсыз лулӟыло, егит нылъёсыз ӝожмытэсь,
солы аслыз но ӝож-секыт.
5Тушмонъёсыз йыр вылаз тубизы,
солы урод лэсьтӥсьёс майбыр уло,
малы ке шуоно законлы пумит пумтэм трос улэмъёсыз понна
Кузё-Инмар со вылэ куректон-кайгу лэзиз;
солэн нылпиосыз пленэ кошкизы тушмонлэн азьпалаз.
6Сӥон ныллэн вань йӧнлыкез-чеберлыкез бордысьтыз кошкиз;
солэн кивалтӥсьёсыз возь выл шедьтӥсьтэм пужейёс кадесь;
катьтэммыса соос уллясьлэн азьпалаз мынӥзы.
7Шугадӟон, курадӟон нуналъёсаз Иерусалим тодаз вайиз
азьвыл нуналъёсысь аслэсьтыз вань узырлыкъёссэ,
нош солэн калыкез тушмон киулэ пограз но,
таре нокин но солы уг ни юртты;
урод малпасьёсыз со шоры учко но
солэсь субботаосты сӥлы карыса улэмзэ серем каро.
8Бадӟым сьӧлык лэсьтӥз Иерусалим,
со понна ик синазькыль-юрӟым макелы пӧрмиз;
сое данъясьёс со шоры адӟемпотостэм карыса учко,
малы ке шуоно гольык интызэ адӟизы;
ачиз но со лулӟиськылэ, мышкин берытске.
9Дэрем сӧзыез жобеныз саптаськемын вал,
но со азьпалэз сярысь ӧз малпаськылы,
соин ик солэн усёнэз туж бадӟым, ӧвӧл солэн буйгатӥсез.
«Кузё-Инмаре, мынам шугадӟонэ шоры учкы,
тушмон вылӥе потӥз уго!»
10Солэн вань дуно макеосыз вылэ тушмон кизэ вӧлъяз;
со адӟе, кызьы язычникъёс солэн вӧсяськон интыяз пыро,
кудъёсыз сярысь Тон сӥзьыса верад:
Тынад вӧсяськыны люкаськонад соос медаз пыралэ.
11Солэн вань калыкез нянь утчаса лулӟылӥське, сиён басьтон понна,
лулзэ-кужымзэ юнматон вылысь дуно арбериоссэ вузаны сётъя.
«Кузё-Инмаре, учкы, учкы, кыӵе мон ултӥямын!»
12Ваньды сюрес кузя ортчисьёс, тӥледын тазьы медаз луы!
Чаклалэ, учкелэ, мынам кадь висён вань-а?
Та висён мон доры вуиз, сое мон доры,
вожпотонэз ӝуатскыку, Кузё-Инмар ыстӥз?
13Вылӥысен Со мынам лыосам тыл лэзиз, но соосты тыл ньылӥз;
мынам пыдъёсылы сьӧлтэт возъяз, монэ кымалтӥз,
начар-куанер, нуналлы быдэ ранӟыса улӥсь монэ кариз.
14Мынам законлы пумит улэмелэн ошетэз Солэн кияз думемын;
соос керттэмын, мынам чыртыозям тубизы;
Со мынэсьтым кужымме лябӟытӥз.
Кузё-Инмар ӝутскыны быгатыны луонтэм киулэ монэ сётӥз.
15Мынэсьтым вань кужмо муртъёсме Кузё-Инмар
мон вӧзы погыртӥз,
мынэсьтым егит пиосме быдтон понна мыным пумит кенеш люказ;
вина виятон гуын кадь Кузё-Инмар нылмуртэз,
Иуда нылэз, пыд улаз лёгаз.
16Со понна мон бӧрдӥсько; синмы мынам, синмы мынам ву кисьтэ,
мынэсьтым лулме улӟытыны,
буйгатыны быгатӥсь мынэсьтым кыдёкын улэ уго;
нылпиосы таркамын, тушмон вормиз уго.
17Сӥон аслэсьтыз кизэ мыче, нош сое буйгатӥсь ӧвӧл.
Кузё-Инмар Иаковлэн тушмонъёсызлы сое котыртыны косӥз;
соос пӧлын Иерусалим юрӟым макелы пӧрмиз.
18Шонерлыко Кузё-Инмар,
мон уго Солэн кылызлы тэрытскытэк улӥ.
Вань калыкъёс, кылзӥське, мынам висёнэ шоры учке:
егит нылъёсы но, егит пиосы но пленэ кошкизы.
19Эшъёсме ӧтисько, нош соос монэ пӧязы;
лулзэс юнматыны сиён утчаса, священникъёсы,
пересь визьнодчиосы городын кулыло.
20Кузё-Инмаре, учкы, мыным ӝикыт-ёркыт уго,
мынам пушкы бугыръяське,
Тыныд кужмо пумитъяськеме понна мынам пушкам
сюлмы берыктӥськиз;
палэнысь меч монэ нылпитэк кельтӥз, нош коркаостӥ кулон ветлэ.
21Мон ӝуштӥсько, нош буйгатӥсе ӧвӧл шуыса кылӥзы;
мынам шугадӟонэ сярысь вань тушмонъёсы кылӥзы но
Тон тае лэсьтӥд шуыса шумпотӥзы.
Э, Тон косысалыд ке со сӥзем нуналыдлы вуыны,
соос мыным укшасесь мед луысалзы!
22Соослэн вань леклыксы Тынад син азяд мед адӟиськоз;
вань сьӧлыкъёсы понна кызьы Тон мыным лэсьтӥд,
соослы но озьы ик лэсьты,
уго секытэсь мынам лулӟиськонъёсы, сюлмы мынам катьтэмме.
Глава 1