Выбрать язык
Книги Ветхого Завета
Книги Нового Завета
с русским текстом1Эксэе пуксьыкуз, Седекиялы кызь одӥг арес вал, Иерусалимын со дас одӥг ар ӵоже эксэй вал; солэн анаезлэн нимыз Хамуталь, со Ливнаысь Иеремиялэн нылыз вал.2Иоаким кадь ик со но Кузё-Инмарлэн син азяз урод ужъёс лэсьтыса улӥз.3Соин ик Кузё-Инмарлэн вожпотонэз Иерусалимен Иудеялы сокем кужмо вал – соосты Со Ас азьысьтыз куштӥз.
Седекия Вавилон эксэй бордысь люкиськиз.4Луиз тазьы: укмысэтӥ арзэ эксэйын пукыкуз, дасэтӥ толэзяз, толэзьлэн дасэтӥ нуналаз, ачиз Вавилонлэн эксэез Навуходоносор, солэн вань войскоез но Иерусалим доры лыктӥзы, котыртӥзы сое но солэн котыртӥз мудэтъёс ӝутӥзы.5Седекиялэн эксэйын дас одӥгетӥ арзэ пукытозяз город котыртэмын улӥз.6Ньылетӥяз толэзе, толэзьлэн укмысэтӥ нуналаз, город пушкын сютэм улон эшшо кужмояз, та музъемын улӥсь калыклэн сиыны нянез быриз.7Городэ пырыны борддорез пасязы, вань ожгарчиос пегӟыны кутскизы, уйин кык борддоръёс вискысь эксэй сад вӧзысь капка пыр городысь потӥзы но кыр сюрес кузя кошкизы; нош халдейёс город котырын сыло вал.8Халдей ожгарчиос эксэй сьӧры уйиськыса мынӥзы но Иерихон нёжалысен Седекияез сутӥзы, соку солэн вань ожгарчиосыз бордысьтыз пазьгиськыса кошкизы.9Эксэез кутӥзы но Емаф музъемысь Ривлае Вавилон эксэй доры вайизы, отысен со Седекиялы суд лэсьтӥз.10Вавилон эксэй Седекиялэсь пиоссэ солэн син азяз бышказ, иудейёслэсь вань кивалтӥсьёссэс Ривлаысен бышкаса вииз;11нош Седекиялэсь синъёссэ поттаз но ыргон жильыосын думылыны косӥз; Вавилон эксэй сое, Вавилонэ нуыса, кулон нуналэз вуытозьлы возьмаськон юртэ пытсаз.
12Витетӥ толэзе, толэзьлэн дасэтӥ нуналаз, – со вал Вавилон эксэйлэн Навуходоносорлэн кивалтонэзлэн дас укмысэтӥ арез, – Вавилон эксэй азьын сылӥсь мугор возьмасьёслэн кузёйырзы Навузардан Иерусалиме лыктӥз но13Кузё-Инмарлэсь корказэ сутӥз, эксэйлэсь юртсэ, Иерусалимысь вань коркаосты, вань бадӟымесь юртъёсты тылын сутӥз.14Мугор возьмасьёслэн кузёйыренызы огазьын лыктэм халдей ожгарчиос Иерусалим котырысь вань борддоръёсты куашкатӥзы.15Калык пушкысь куанеръёсты, город пушкы кылем мукет калыкез но, Вавилон эксэйлэн киулаз сётскемъёсты, нош озьы ик огшоры калыклэсь вань кылем люкетсэ мугор возьмасьёслэн кузёйырзы Навузардан городысь поттыса лэзиз.16Та кунын-музъемын начар улӥсьёс пӧлысь гинэ кӧнязэ ке мугор возьмасьёслэн кузёйырзы Навузардан виноград бакчаын, музъем бордын ужан понна кельтӥз.
17Кузё-Инмарлэн коркасьтыз ыргон юбоосты, ул пуктэтъёсты, ыргон зарезез халдейёс тӥязы-тарказы но вань ыргонзэ Вавилонэ нуизы.18Тазъёсты, лопаткаосты, пуртъёсты, тусьты-пуньыез, храмын служить карыку кутӥськись вань ыргон посудаез сьӧразы нуизы.19Тэркыосты, кискачъёсты, чашаосты, пуртыосты, лампадаосты, фимиам возёнъёсты, сюмыкъёсты, зарнилэсь ке – зарнизэ, азвесьлэсь ке – азвесьсэ, киултӥз мугор возьмасьёслэн кузёйырзы;20озьы ик кык юбо, одӥг зарезь, Кузё-Инмарлэн корказ Соломонлэсь лэсьтэм дас ыргон ошъёссэ, ул пуктэтъёсты, вань та арбериослэсь ыргонзэ мертаны ик уг луы вал.21Котькуд юболэн ӝуждалаез дас тямыс гырпум кузьда вал, дас кык гырпум кузьда гозы кал сое котыртылӥз, нош солэн борддорезлэн зӧкталаез – ньыль чиньы; пушкыз буш вал.22Со вылын ыргонлэсь венец изьы понэмын, изьыезлэн ӝуждалаез – вить гырпум; сеткаез но со котырысь гранат улмоосыз ваньмыз ыргонлэсь; со ик вал мукетаз гранат улмоосын юбоын.23Вань палъёсын укмыстон куать гранат улмо; сетка котырын ваньмыз-ӧвӧлэз сю улмо вал.
24Мугор возьмасьёслэн кузёйырзы Сераия архиереез, Цефанияез – кыкетӥ священникез – но ӧс выжыысь куинь возьмаськисьёсты басьтӥз.25Городысь ожгарчиослэсь одӥгзэ кузёйырзэс евнухез, эксэйлэн син азяз сылӥсь городын улӥсь сизьым муртэ, войскоосысь подъясьёс пӧлысь бадӟымзэс, кудӥз ожгарчиос пӧлы гожтылӥз та музъемын улӥсь адямиосты, городысь шедьтэм та шаерын улӥсь куатьтон муртэ басьтӥз.26Мугор возьмасьёслэн кузёйырзы Навузардан соосты Ривлае Вавилон эксэй доры нуиз.27Вавилон эксэй Емаф музъемысь Ривлаын соосты погыртӥз; Иудаез ас музъем вылысьтыз улляса лэзизы.28Тани Навуходоносорен улляса поттэм калык: сизьыметӥ арын – куинь сюрс кызь куинь иудей;29Навуходоносорлэн эксэй луонэзлэн дас тямысэтӥ араз тямыс сю куамын кык лул Иерусалимысь улляса поттэмын вал.30Навуходоносорлэн кызь куинетӥ араз Навузардан, мугор возьмасьёслэн кузёйырзы, сизьым сю ньыльдон вить иудейёсты улляса нуиз, нош ваньзэ – ньыль сюрс куать сю лулэз.
31Иудеялэсь Иоаким эксэйзэ улляса поттэм бере, куамын сизьым ар ортчыса, дас кыкетӥ толэзе, толэзьлэн кызь витетӥ нуналаз, Вавилонлэн Евилмеродах эксэез, нырысетӥ арзэ эксэйын пукыкуз, Иудеялэсь Иоаким эксэйзэ вылӥ кариз – пытсэт юртысь поттӥз сое.32Эш мылкыдын соин вераськиз, солэсь престолзэ, Вавилонын улӥсь мукет эксэйёслэн престолзы сярысь, вылӥе пуктӥз;33солэсь пытсэтын пукон дӥськутсэ воштӥз, вань улон нуналъёсыз ӵоже со дорын кӧтсэ тырыса улӥз.34Улыны кулэ макеосты эксэй кӧня кулэ сомында ик сётъяз, нуналлы быдэ, нуналысь нуналэ, кулытозяз, вань улон нуналъёсыз ӵоже солы ялан сётылӥз.
Глава 52