Выбрать язык
Книги Ветхого Завета
Книги Нового Завета
с русским текстом1Тазьы шуэ Кузё-Инмар: «Тани, Мон Вавилон вылэ,
со пушкын Мыным пумитъяськыса улӥсьёс вылэ
ӵушкась, виись тӧл ӝуто,
2Вавилон вылэ тӧлӥськисьёсты ысто, соос тӧлозы-тӧлӟытозы сое,
музъемзэ таркалозы, тырттэм кельтозы,
уго солэн шугадӟон нуналаз со вылэ котыр ласянь урдскозы.
3Ыбылӥськись пукыӵсэ золтӥсь вылэ,
корт дӥсеныз бадӟымъяськись вылэ пукыӵсэ мед золтоз;
егит пиоссэ эн жалялэ, солэсь быдэс войскозэ пазьге.
4Вӧсь каремъёс Халдей музъем вылэ мед погралозы,
бышкалтэмъёс сюресъёсыз вылэ мед усьылозы.
5Уго Израиль палкышно кадь огназ ӧз кыльы,
Иуда но Инмарез Саваоф Кузё-Инмар бордысь палэнтэмын ӧвӧл,
соослэн музъемзы Израильлэн Дун-Сьӧлыктэмез азьын
сьӧлыкъёсын пачылмемын ке но.
6Вавилон пушкысь пегӟе, асьтэлэсь асьтэос лулдэс уте, –
солэн законлы пумит улэмысьтыз, тӥ со пушкы медад быре,
уго та дыр – Кузё-Инмарлэн пунэм берыктонэз:
Со солы пунэмзэ берыктэ».
7Кузё-Инмарлэн кияз Вавилон
быдэс музъемез кудӟытӥсь зарни чаша вал;
калыкъёс отысь вина юылӥзы но визьтэм ужъёс лэсьтылӥзы.
8Шӧдтэк шорысь Вавилон пограз, пазьгиськиз;
со понна викышъялэ, солэн яраезлы бальзам басьтэ,
оло нош со бурмоз.
9Вавилонэз ми эмъямы, нош со ӧз бурмы;
кельтэ сое, ваелэ ваньмы ас музъемамы мыноме,
уго сое судэ сётон ивор инмозь вуиз, пилемозь ӝутскиз.
10Милесьтым шонер улэммес Кузё-Инмар югыт азе поттӥз,
ваелэ мыноме но Инмармылэсь Кузё-Инмарлэсь ужзэ
Сӥонысен ивортоме.
11Ньӧлъёстэс йылсо каре, ньӧл тырон сепысъёстэс тырмытэ;
Кузё-Инмар Мидияысь эксэйёслэсь духсэс (мылкыдзэс) ӝутӥз,
малы ке шуоно Солэн Вавилонлы пумит,
сое быдтыны мылкыдыз вань –
та уго Кузё-Инмарлэн пунэм берыктонэз луэ,
Аслаз храмез понна пунэм берыктонэз.
12Вавилонлэн борддоръёсызлы пумит знамя ӝутэ,
туж чаклаське, возьмаськисьёсты пуктэлэ,
ватӥськыса ыбылон интыос дасялэ,
уго Кузё-Инмар кызьы малпаз, мар вераз
Вавилонын улӥсьёслы пумит, озьы ик лэсьтоз.
13Э, тон, бадӟым вуос дурын улӥсь, узырлыкъёсын пачылмем!
Сукъяськонэдлэн-аксымъяськонэдлэн мертэтэз пачылмиз ни,
тыныд пум вуиз.
14Саваоф Кузё-Инмар Аслыз Ачиз кыл сётыса шуиз:
«Зэмзэ верасько, тон пушкы саранча мында калык люкало,
тыныд пумит соос черекъяны кутскозы.
15Музъемез Со Аслаз кужыменыз кылдытӥз,
Аслаз визьлыкеныз дунне вылэз юнматӥз,
Аслаз визьмыныз инъёсты возъяз.
16Солэн куараезъя инмын вуос куашето,
музъемлэн пумъёсысеныз Со пилемъёсты ӝутэ,
зор пушкын чилекъянъёс лэсьтэ,
Аслаз шыкысъёсысьтыз тӧлэз поттэ.
17Аслаз тодон-валанэныз котькудӥз адями укылтэмъяське,
аслаз кисьтэм сульдэреныз котькудӥз сое ӵыжатӥсь-кисьтӥсь
ассэ сантэма,
уго солэн сульдэрез – со пӧяськон, солэн лулыз ӧвӧл.
18Та – зэмос бушлык, йыромонлэн ужез;
соос доры лыктыса тышкай ке, соос бырозы.
19Иаковлэн адӟон люкетэз соослэн кадь ӧвӧл,
уго Иаковлэн Инмарез –
котьмае Кылдытӥсь Инмар,
Израиль люкет басьтонэзлэн кивалтэт бодыез луэ,
Солэн нимыз – Саваоф Кузё-Инмар.
20Тон Мынам – молотэ, ожмаськон арберие;
Мон тонэн калыкъёсты погыръяй,
эксэйлыкъёсты таркалляй;
21тонэн валъёсты погыртылӥ, вылаз пукисьсэ но,
тонэн ожмаськон уробоез но солэсь валтӥсьсэ погыртылӥ;
22тонэн картсэ но, кышнозэ но погыртылӥ;
пересьсэ но, пиналзэ но погыртылӥ;
тонэн егит пиез но, егит нылэз но погыртылӥ;
23тонэн пудо возьмасез погыртылӥ, солэсь уллёзэ но,
тонэн музъем ужасез но солэсь ужась пудозэ но погыртылӥ,
шаерен но, городэн но кивалтӥсьёсты погыртылӥ.
24Сӥонысен тӥляд син азяды лэсьтэм вань уродлыкъёссы понна
Вавилонлы но Халдеяын вань улӥсьёслы
пунэмзэ берыкто, – шуэ Кузё-Инмар.
25Тани, Мон тыныд пумит султӥ, виылӥсь гурезь, –
шуэ Кузё-Инмар, –
быдэс музъем вылэз таркась,
тон вылэ киме мычо но изгурезьысен тонэ кушто,
ӝуам гурезьлы пӧрмыто.
26Тон пушкысь корка сэреглы из уз басьтэ,
корка инъетлы но из уз басьтэ,
пумтэм вапумъёс ӵоже тырттэм улод, – шуэ Кузё-Инмар.
27Музъем вылын знамя ӝутэ, калыкъёс пӧлын гумы шудэлэ,
солы пумит калыкъёсты ожмаськыны дасялэ,
солы пумит Арарат, Мини, Аскеназ эксэйлыкъёсты огазе люкалэ,
солы пумит азьветлӥсь пуктэ,
шимес саранчаосты кадь валъёсты султытэ.
28Калыкъёсты, Мидиялэсь эксэйёссэ, шаерезлэсь кузёйыръёссэ,
вань городъёсызлэсь кивалтӥсьёссэс,
солэн киулаз тэрытскыса улӥсь вань музъемез
Вавилонлы пумит ожмаськыны султытэ.
29Зурка музъем, куалекъя, уго Кузё-Инмарлэн
Вавилон музъемез улӥсьтэм кыр дуннелы пӧрмытыны малпанэз
Вавилон вылын быдэсмыны кутске.
30Вавилонлэн кужмоосыз ожмаськемысь дугдӥзы,
юнматэм интыосазы пуко;
кынарзы быриз, кышномурт кадесь луизы,
улон интыоссы сутэмын, ворсэтъёссы пыргытэмын.
31Вавилон эксэйлы солэн городэз котыр ласянь басьтэмын ни
шуыса ивортыны ыстэм мурт ыстэм муртлэн пумитаз бызе,
ивортӥсь ивортӥсьлэн пумитаз ворттэ.
32Шур вамен выжылон интыосыз киултэмын ни,
кор ӵыпетъёсыз тылын сутэмын,
ожмаськисьёсыз кышкаменызы номыр но карыны уг быгато.
33Уго тазьы шуэ Израильлэн Инмарез Саваоф Кузё-Инмар:
Вавилонлэн нылыз кутсаськон вакытысь итымлы кельше;
эшшо ӧжытак ортчыса, солэн аран дырыз вуоз.
34”Сииз монэ, йырйиз монэ Навуходоносор, Вавилонлэн эксэез;
тырттэм – буш сосуд монэ кариз; лобась кый музэн монэ ньылылӥз;
кӧт пушсэ ческыт сиёнъёсыным тыр карылӥз, монэ поттылӥз.
35Мынам кӧтӝоже, мынам курадӟонэ Вавилон вылэ мед вуоз”, –
шуоз Сӥонын улӥсь;
”Мынам виры – Халдей музъемын улӥсьёс вылын”, –
шуоз Иерусалим.
36Соин ик тазьы шуэ Кузё-Инмар:
тани, Мон тынад ужад пырисько но тон понна пунэмзэ берыкто,
солэсь зарезьзэ куасьто, ву бызён арыкъёссэ кӧсато.
37Вавилон куашкам люкъёслы, шакалъёслы улон интылы,
кышкатон-кӧшкематонлы, серекъян-веранлы пӧрмоз,
отын улӥсез уз луы.
38Ваньзы соос лев музэн черекъялозы,
сьӧсь пӧйшуръёслэн пиосыз музэн вузозы.
39Соослэн пӧсекъян дыръязы соослы юондыр ортчыто но
кудӟытозязы сектало, –
мед шулдыръяськозы но пумтэм вапумъёслы умме мед усёзы,
медаз ни сайкалэ, – шуэ Кузё-Инмар.
40Вандыны ваем ыжпиосты музэн,
ыжъёсты, кечъёсты музэн ваньзэс огазе люкало.
41Кызьы Сесах басьтэмын, быдэс дуннелэн данэз киултэмын!
Кызьы Вавилон калыкъёс пӧлын кышкатонлы-курдатонлы пӧрмиз!
42Вавилон вылэ зарезь урдскиз;
сое трос тулкымъёс шобыртӥзы.
43Солэн городъёсыз тырттэм кылизы,
пашмем музъемлы, кыр дуннелы пӧрмизы;
со музъемын одӥг адями но уг улы, со пыр адями пи но уг ветлы.
44Вавилонысь Вил сульдэрез-идолэз корало,
солэн ымысьтыз ньылэмзэ потто,
азьланяз со доры калыкъёс уз ни люкаське,
Вавилонлэн борддоръёсыз куашкалозы.
45Мынам калыке, пот солэн пушкысьтыз,
Кузё-Инмарлэн ӝуась вожпотонэзлэсь ваньды лулдэс утелэ.
46Медаз лябӟы тӥляд сюлэмды,
музъем вылын кылӥськоно иворъёслэсь эн кышка;
одӥгаз аре ивор вуоз, собере мукетаз аре,
музъем вылын эриктэман-уродъяськон луоз,
кузёяськись кузёяськисьлы пумит урдскоз.
47Соин ик, тани, вуо нуналъёс,
куке Мон Вавилонлэсь сульдэръёссэ-идолъёссэ корало,
солэн быдэс музъемез возьытэ вуттэмын луоз,
яраё-ӧлексы каремъёсыз солэн пӧлаз погралозы.
48Вавилон пограм понна инэн музъем но мар соос вылын вань,
шулдыръяськозы-данъяськозы;
уго уйпалась со доры сое куашкатӥсьёс лыктозы, – шуэ Кузё-Инмар.
49Кызьы Вавилон погыртылӥз яраё-ӧлексы луэм израиль калыкез,
озьы ик Вавилонын быдэс кунысь яраё-ӧлексы луэмъёс
погыртэмын луозы.
50Мечлэсь утиськемъёс, кошкелэ, эн дугдылэ,
кыдёкысен Кузё-Инмарез тодады вае,
тӥляд сюлэм вылады Иерусалим мед ӝужалоз.
51Даллашонэз кылыкумы, милемлы возьыт вал;
мурт шаерысь адямиос Кузё-Инмарлэн коркаезлэн
вӧсяськон интыяз лыктэм бере
возьдаськыса ымнырмы ӵыжектылӥз.
52Со понна, тани, вуо нуналъёс, – шуэ Кузё-Инмар, –
куке Мон солэсь вӧлыса лэсьтэм сульдэръёссэ корало,
солэн быдэс музъем вылаз яраё карем муртъёс ӝуштозы.
53Вавилон инмозь ӝутскысал ке но,
ӝужыт интые аслэсьтыз юнматскон карзэ пуктысал ке но,
но Мон дорысь со доры таркасьёс-куашкатӥсьёс лыктозы, –
шуэ Кузё-Инмар.
54Вавилонысь ӝуштэм куара кылӥськоз,
туж бадӟым куашкан Халдей музъемын луоз.
55Уго Кузё-Инмар Вавилонэз тырттэм кельтоз,
вылтӥяськыса вераськыны уз ни лэзьы.
Соослэн тулкымъёссы бадӟым вуын кадь куашетозы,
кужмо куаразы шуккиськоз.
56Уго со вылэ, Вавилон вылэ, таркась-куашкатӥсь лыктоз но
солэсь ожмаськисьёссэ киултоз,
пукыӵъёссэс пыргытоз;
уго Кузё-Инмар, пунэмзэ тырись Инмар, пунэмзэ берыктоз.
57Солэсь кивалтӥсьёссэ, визьнодчиоссэ,
шаерезлэсь кузёйыръёссэ, городъёсыныз кивалтӥсьёссэ,
ожгарчиоссэ кудӟытозязы сектало но,
соос сайкантэм умме усёзы, – шуэ Эксэй, –
Солэн нимыз Саваоф Кузё-Инмар.
58Тазьы шуэ Саваоф Кузё-Инмар:
Вавилонлэн зӧкесь борддоръёсыз выжыозяз куашкатэмын луозы,
ӝужытэсь капкаосыз тылын сутэмын луозы;
озьыен, юнме калыкъёс тыршизы,
тыллы сётон понна калык выжыос асьсэды курадӟытӥзы».
59Иудеяын Седекия эксэй ньылетӥ арзэ эксэйын пукон дыръя, Масеялэн Нирия пиезлэн Сераия пиез соин ӵош Вавилонэ мыныкуз, Иеремия солы сӥзьыса вераз; Сераия эксэйлы сиён-юон, кӧлан инты дасясьёслэн йырзы вал.60Вавилон вылэ лыктоно вань шугадӟонъёс сярысь, Вавилонлы пумит гожтэм вань веранъёсты Иеремия одӥг книгае гожтӥз.61Иеремия Сераиялы шуиз: «Вавилонэ лыктэм берад учкы, вань со веранъёсты лыдӟы62но шу: ”Кузё-Инмаре! Та инты сярысь Тон сое быдтод шуид – отчы адями но, пудо-живот но уз кыльы, со пумтэм вапумъёс ӵоже кыр дунне луоз, шуид”.63Со книгаез лыдӟыса быдтэм берад со борды из дум но Ефрат шурлэн шораз кушты64но шу: ”Тазьы Вавилон выёз, со вылэ лэзем шугадӟонъёс пӧлысь со уз ни ӝутскы, соос чылкак катьтэммозы”».
Та дырозь кыстӥське Иеремиялэн верам кылыз.
Глава 51