Выбрать язык
Книги Ветхого Завета
Книги Нового Завета
с русским текстом1Вавилон пумысен, халдейёслэн музъемзы пумысен Иеремия пророк пыр Кузё-Инмарлэн верам кылыз:
2«Вань калыкъёс пӧлын ивортэ,
вералэ, знамя ӝутэ, ялэ, эн ватэ, шуэлэ:
”Вавилон киултэмын, Вил возьытэ вуттэмын,
Меродах погыртэмын,
сульдэръёссы серекъянлы пӧрмемын,
сульдэръёссы-идолъёссы сузмытэмын”.
3Уго уйпалась солы пумит калык ӝутскиз,
солэсь музъемзэ со кыр дуннелы пӧрмытоз,
нокин но отын уз ни улы – адями но, пудо но,
ваньзы отысь потыса кошкозы.
4Со нуналъёсы, со вакытэ, – шуэ Кузё-Инмар, –
израиль пиос лыктозы но иудей пиосын валче бӧрдыса ветлозы,
асьсэлэсь Инмарзэс Кузё-Инмарез утчалозы;
5Сӥонэ мынӥсь сюрес сярысь юалозы,
со пала ымнырзэс берыктыса вералозы:
”Мынэлэ но пумтэм вапумъёс ӵожелы Кузё-Инмар борды кариське,
со огазе кариськон ноку но вунэтэмын уз луы”.
6Мынам калыке ышем-бырем ыжъёс кадь вал;
возьмасьёсыз соосты сюрес вылысь мыдлане кожытӥзы,
гурезьёсы улляса лэзизы;
гурезьёстӥ, вырйылъёстӥ йыромыса ветлӥзы,
кӧлан интызэс вунэтӥзы.
7Соосты шедьтылӥсьёс, соосты сиизы, ӝикатыса возизы, шуылӥзы:
”Ми янгыш ӧвӧл, малы ке шуоно соос Кузё-Инмар азьын,
Зэмлыклэн юртэзлэн азяз,
атайёссылэн оскиськонзы – Кузё-Инмар – азьын сьӧлыказы”.
8Вавилонлэн пушкысьтыз пегӟе,
Халдей музъемысь кошкелэ но
ыж уллёлэн азьпалаз мынӥсь кечтакаос кадесь луэ.
9Уго, тани, Вавилонлы пумит Мон ӝуто,
уйпалась туж бадӟым калыкъёслэсь уллёзэс ваё,
солэн ваче пумитаз соос интыяськозы но сое киултозы;
усто ожмаськисьлэн кадь соослэн пукыӵ ньӧлъёссы
номыртэк уг берыктӥсько.
10Халдей музъемез люкетлы басьтозы;
сое таркасьёслэн кӧтсы тыроз, – шуэ Кузё-Инмар.
11Тӥ, Мынэсьтым люкетме таркасьёс,
шумпотыса, шулдыръяськыса улӥды;
шумпотэменыды турын пӧлын кунян музэн тэтчады,
ожмаськонэ мынӥсь валъёс кадь гырдалляды.
12Туж юн возьытэ вуттэмын луоз тӥляд анайды,
ӵыжектоз-гордэктоз тӥледыз вордӥсь;
тани, со калыкъёслэн азьпал адӟонзы –
луоё кыр, пашмем музъем, кыр дунне.
13Кузё-Инмарлэн вожпотэменыз сэрен
отын улӥсез уз ни луы, быдэсак тырттэм кылёз;
Вавилон пыр ортчись вань адямиос абдралозы,
солэн вань яраосыз шоры учкыса, шултыса лэзёзы.
14Вавилон котыре, ожмаськисьёс кадь, радэн-радэн султэ;
ваньды, пукыӵ золтӥсьёс, со шоры ыбылэ, ньӧлъёстэс эн жалялэ,
уго со Кузё-Инмарлы пумит сьӧлыказ.
15Котыр ласянь солы пумит кесяськыны-черекъяны кутске;
со тушмонлы сётӥськиз, солэн юнматскон интыосыз погразы,
борддоръёсыз куашказы, уго та – Кузё-Инмарлэн пунэм берыктонэз;
пунэмзэ солы берыктэ;
кызьы со тӥледлы кариз, тӥ но солы озьы ик каре.
16Вавилонысь кизисез но аран дыръяз сюрлоен вырисез быдтэлэ;
быдтӥсь-виись мечлэсь кышкаса,
котькин но аслаз калыкез доры мед берытскоз,
ас музъемаз бызьыса мед кошкоз.
17Израиль – пазьгиськем уллё; сьӧсь пӧйшуръёс сое уллязы;
азьвыл сое Ассириялэн эксэез сиыса улӥз,
нош таиз, берпуметӥез, Вавилонлэн эксэез, Навуходоносор,
солэсь лыоссэ пыргытӥз.
18Соин ик Израильлэн Инмарез Саваоф Кузё-Инмар тазьы шуэ: тани,
Мон Вавилон эксэй доры, солэн музъем вылаз мыныса, сое вӧсь каро, кызьы вуылӥ Ассириялэн эксэез доры;
19Израилез аслаз возь вылаз берыкто,
со Кармил, гурезь бамалъёстӥ, Васантӥ
пастукаськыса ветлоз,
солэн кӧтыз Ефрем гурезьын, Галаадын тыр луоз.
20Со нуналъёсы, со дыре, – шуэ Кузё-Инмар, – Израильлэсь шонертэм улэмзэ утчалозы, но со уз луы, Иудалэсь сьӧлыкъёссэ утчалозы, но соос уз сюре: улэп кельтэмъёсме простить каро.
21Мын со вылэ, вожез поттӥсь музъем вылэ,
но солэсь улӥсьёссэ вӧсь кар:
со бӧрсьы кылемзэ тырттэм кельты, виылы, – шуэ Кузё-Инмар, –
мар Мон тыныд косӥ, ваньзэ быдэсты.
22Музъем вылын жугиськон-ожмаськон куара кылӥське,
туж бадӟым куашкан-ёмыран!
23Кызьы тӥямын, куашкатэмын быдэс музъемлэн молотэз!
Кызьы Вавилон калыкъёс пӧлын кышкатон макелы пӧрмиз!
24Мон тыныд сьӧлтэтъёс пуктылӥ но, тон отчы сюрид, Вавилон, –
озьы луоз шуыса ӧд но малпа вал;
тон шедьтэмын, кутэмын,
малы ке шуоно Кузё-Инмарлы пумит урдскид.
25Кузё-Инмар шыкыссэ усьтӥз но
отысь вожпотонэзлэсь сосудзэ басьтӥз,
малы ке шуоно Саваоф Инмар Кузё-Инмарлэн
Халдей музъемын ужез вань.
26Вань шаеръёсысь со вылэ лыктэ, солэсь кеносъёссэ усьялэ,
культоез кадь сое лёгалэ, чылкак быдтэ сое,
номыриз но солэн медаз ни кыльы.
27Солэсь вань ошъёссэ виылэ, вандӥськон улэ мед мынозы;
куректон-кайгу соослы!
Уго соослэн нуналзы, соос доры соосты жугыны лыктон дыр вуиз.
28Инмармылэн Кузё-Инмарлэн пунэмзэ берыктэмез сярысь,
Солэн храмез понна пунэм берыктэм сярысь,
Сӥонын ивортон понна бызисьёслэн,
Вавилон музъемысь пегӟисьёслэн куаразы кылӥське.
29Вавилонлы пумит ыбылӥськисьёсты ӧте;
ваньды пукыӵ золтӥсьёс, со котыре люкрак интыяське, –
отысь нокин но утиськыны медаз быгаты,
ужъёсызъя солы пунэмзэ берыктэ,
кызьы со кариз, тӥ но озьы ик каре,
уго со Кузё-Инмарлы пумит,
Израильлэн Дун-Сьӧлыктэмезлы пумит ӝутскиз.
30Со понна солэн егит пиосыз ульчаосаз погралозы,
со нуналэ солэн вань ожгарчиосыз быдтэмын луозы, –
шуэ Кузё-Инмар.
31Тани, Мон – тыныд пумит султӥ, вылтӥяськись, –
шуэ Саваоф Инмар Кузё-Инмар, –
уго тынад нуналыд вуиз, тонэ вӧсь карыны лыктон дыр вуиз.
32Вылтӥяськон канжаськоз но усёз, нокин но сое уз ӝуты;
солэн городъёсаз тыл ӝуато – солэн котырысьтыз со ваньзэ ньылоз.
33Тазьы шуэ Саваоф Кузё-Инмар:
израиль пиос Иудалэн пиосыз кадь ик ултӥямын,
ваньмыз, соосты пленэ басьтӥсьёс, соосты юн кутыса возё,
лэзьыны уг малпало.
34Но соослэн Мозмытӥсьсы кужмо,
Солэн нимыз – Саваоф Кузё-Инмар;
музъемез буйгатон понна,
Вавилонысь улӥсьёсты куалекъятон понна
Со сэрттоз-пертчоз соослэсь ужзэс.
35Меч – халдейёс вылэ, – шуэ Кузё-Инмар, –
Вавилонын улӥсьёс вылэ,
солэн кивалтӥсьёсыз вылэ, солэн визьнодоосыз вылэ;
36меч – визь тугасьёс вылэ, соос визьтэммозы,
меч – солэн ожгарчиосыз вылэ, соос куалектозы;
37меч – солэн валъёсыз вылэ, ожмаськон уробоосыз вылэ,
пӧлысьтыз пӧртэм кыло калыкъёс вылэ,
соос кышномурт кадесь луозы;
меч – солэн узырлыкъёсыз вылэ, соос лушкамын-таркамын луозы;
38куасьмон-пыжон – солэн вуосыз вылэ, соос бырозы;
уго та сульдэръёслэн музъемзы,
соос визьтэммозы асьсэлэн шимесэсь идолъёссылэсь.
39Отчы кыр пӧйшуръёс шакалъёсын валче улыны интыяськозы,
отын страусъёс улозы, пумтэм вапумъёс ӵоже отын адями уз улы,
выжыысь выжыосы улӥсез уз луы.
40Кызьы Инмар Содомен Гоморраез,
соослэсь бускель городъёссэс сэрпалтӥз, – шуэ Кузё-Инмар, –
озьы ик татын но одӥг адями но уз улы, адями пи но уз дугдылы.
41Тани, уйпалась калык лыктэ, туж кужмо калык лыктэ,
музъемлэн пумъёсысьтыз трос эксэйёс ӝутӥсько.
42Киязы пукыӵ, шибоды возё;
соос жалянэз валасьтэмесь, лек сюлэмоесь;
соослэн куаразы зарезь кадь шаугетӥсь;
буш вал вылын лыкто, одӥг мурт кадь чурен султӥзы,
Вавилон ныл, тонэн ожмаськон понна!
43Вавилонлэн эксэез соос сярысь ивор кылӥз но,
суйыз-пыдыз юскиськиз;
куректон сое ӝикатӥз,
нылпи вайись кышномуртэз музэн курадӟон сое шымыртӥз.
44Тани, со Иорданлэн вырйылысьтыз сьӧсь пӧйшур музэн
юнматэм каръёс вылэ ӝутӥське;
но Мон соосты отысь ӝог кошкыто:
кин быръемын, солы сое сёто, уго кин Мыным укша?
Кин Мынэсьтым ответ куроз?
Кыӵе уллё возьмась Мыным пумит султоз?
45Озьыен, кылзэлэ Кузё-Инмарлэсь Вавилон пумысен
мар карыны турттэмзэ,
Солэсь малпанъёссэ – мар карыны Со ӧдъя Халдей музъемен;
зэм ик, самой пичиесь уллёос соосты валтыса нуозы;
зэм ик, со асэнызы ӵош таркалоз, тырттэм кельтоз
соослэсь улон интызэс.
46Вавилонэз киултыку ӝутскем куара музъемез зуркатоз,
вузэм-викышъям куара калыкъёс пушкы вӧлмоз».
Глава 50