Выбрать язык
Книги Ветхого Завета
Книги Нового Завета
с русским текстом1Аммон пиос сярысь Кузё-Инмар тазьы шуэ:
«Израильлэн пиосыз ӧвӧл шат?
Люкет басьтоно муртэз ӧвӧл шат солэн?
Малы бен Малхом Гадэз киултӥз, солэн калыкез городъёсаз улэ?
2Со понна ик, тани, вуо нуналъёс, – шуэ Кузё-Инмар, –
куке Аммон пиослэн Равва городазы ожмаськон куараос кылӥськозы,
со куашкам люклы пӧрмоз,
солэн городъёсыз тылын сутэмын луозы.
Израиль киултоз соосты, кудъёсыз сое киулазы возизы, –
шуэ Кузё-Инмар.
3Викышъя, Есевон, уго Гай таркамын;
Раввалэн нылъёсыз, кесяське,
чурыт бышкись дӥськутэн кустэс думе,
бӧрдэлэ но ыж кенеръёс кузя костаськыса ветлэ,
уго Малхом священникъёсын ӵош,
аслаз кивалтӥсьёсыныз валче пленэ мыноз.
4Мар-о нёжалъёсын ушъяськиськод?
Тынад нёжалэд вирен ӧръяськоз,
кескич-кышкыт нылъёсмурт, –
аслаз узырлыкъёсыз вылэ оскиськись,
”Кин мон доры лыктоз?” шуись.
5Тани, Мон вань ёрос музъемъёсысьтыд
тон вылэ шимес кышкан лэзё, –
шуэ Саваоф Инмар Кузё-Инмар, –
кин кытчы вуэм, отчы бызьыса кошкоды,
но нокин пегӟыса кошкемъёсты уз ни люка.
6Нош собере Аммон пиосты пленысь берыкто», – шуэ Кузё-Инмар.
7Едом пумысен тазьы шуэ Саваоф Кузё-Инмар:
«Феманын визьлык ӧвӧл ни шат?
Визьнодоослэн кенешсы ӧвӧл ни шат?
Соослэн визьлыксы кулэсмиз шат?
8Деданын улӥсьёс, бызе, мышкин кариськыса,
гурезьысь гуосын ватӥськыса улэ,
уго Исавлэсь быронзэ со вылэ лэзё, –
Аслам вӧсь карыны лыктон дыръям.
9Виноград бичасьёс тон доры лыктысалзы ке,
зэм ик, бичатэк кӧня ке но емыш кельтысалзы.
Лушкаськисьёс уйин лыктысалзы ке,
кӧня соослы кулэ, сомында лушкасалзы.
10Нош Мон Исавез гольык кельтытозь талало,
ватэг интыоссэ усьто, ватӥськыны со уз ни быгаты.
Солэн выжыез, агай-вынъёсыз, бускельёсыз быдтэмын луозы;
со уз ни луы.
11Анайтэм-атайтэм нылпиостэ кельты, Мон соосты утьыса возё,
кузпалтэк кылем кышномуртъёсыд но Мон вылэ мед оскиськозы.
12Уго тазьы шуэ Кузё-Инмар: тани, соос но, чашаез юыны кылдытымтэос, одно ик сое юозы, тон-а бен вӧсь карытэк кельтэмын луод? Уд, вӧсь карытэк кельтэмын уд луы, но одно ик чашаез юод.13Уго Асэным кыл сётӥсько, – шуэ Кузё-Инмар, – кышкан-куалекъянлы, серекъян-веранлы, кыр дуннелы, карган интылы пӧрмоз Восор, солэн вань городъёсыз пырак дауръёс ӵожелы кыр дуннелы пӧрмозы».
14Мон Кузё-Инмарлэсь верамзэ кылӥ,
ыстэм мурт калыкъёслы тазьы вераны келямын:
«Люкаськыса солы пумит мынэ, ожмаськонэ ӝутскелэ».
15«Уго тани, калыкъёс пӧлын Мон тонэ покчи каро,
адямиос пӧлын синазькыль луод.
16Тынад кышкыт сямыд но сюлмыдлэн вылтӥяськонэз
тынэсьтыд – изгурезьысь гудӟем гуосын улӥсьлэсь,
гурезь йылъёсты киултыса возисьлэсь – визьдэ тугазы.
Ӧрӟи музэн вылӥе ке но кардэ лэсьтӥд,
отысен но Мон тонэ сэрпалто, – шуэ Кузё-Инмар.
17Едом шимес интылы пӧрмоз; ваньмыз со вӧзтӥ ортчисьёс абдралозы но, яраосыз шоры учкыса, шултыса кошкозы.18Кызьы сэрпалтэмын Содомен Гоморра но соослэн ёросысьтызы мукет городъёс, – шуэ Кузё-Инмар, – озьы ик отын но одӥг адями но уз улы, адями пи отчы уз дугдылы.
19Тани, со лев музэн Иордан дурысь ӝужыт будосъёс пӧлысь
юнматэм улон юртъёс вылэ ӝутске;
но Мон соосты Идумеяысь ӝог кошкыто.
Кин быръемын, сое солы кузёе пукто.
Кин Мыным укша? Кин Мынэсьтым кылме юалоз?
Кыӵе уллё возьмась Мыным пумит султыны быгатоз?
20Озьыен, кылзэлэ Кузё-Инмарлэсь Едом пумысен пуктонзэ,
Феманын улӥсьёс пумысен Солэсь малпанъёссэ:
зэм ик, уллёос пӧлысь самой пичиосыз соосты нуозы,
соослэсь улон интыоссэс таркалозы.
21Соослэсь пограм куаразэс кылыса, музъем зуркалоз,
черекъям куаразылэн шуккиськемез
Горд Кам зарезь дурын кылӥськоз.
22Тани, со ӧрӟи кадь ӝутскоз но лобӟыса кошкоз,
Восор йылысен бурдъёссэ лэзёз;
кышкасьтэм идумейёслэн сюлэмзы со нуналэ
нуны вайись кышномуртлэн кадь луоз».
23Дамаск сярысь. – «Емаф но Арпад возьытэ вуттэмын,
уго ӝож ивор кылэм беразы соос йырзэс ошизы;
зарезь вылын куалектэмын, буйгатскыны уг ни быгато.
24Дамаск куалектӥз но бызьыса пегӟыны кутскиз;
кышкан киултӥз сое;
нуны вайись кышномуртэз музэн вӧсь луон, курадӟон кырмизы сое.
25Кызьы бен ӧз утиськы данлыко город, шумпотон сётӥсь городэ?
26Озьы, егит пиосыз ульчаосаз усьылозы,
со нуналэ вань ожгарчиосыз кулозы, – шуэ Саваоф Кузё-Инмар.
27Дамасклэн борддор йылъёсаз тыл ӝуато,
со тыл Венададлэсь юртъёссэ-четлыкъёссэ быдтоз».
28Вавилонлэн Навуходоносор эксэеныз пазьгем Кидар сярысь, Асор эксэйлыкъёс сярысь тазьы шуэ Кузё-Инмар:
«Султэлэ, Кидарлы пумит мынэ,
шундыӝужанлэсь пиоссэ таркаса тырттэм кельтэ!
29Балаганъёссэс но ыжъёссэс асьсэлы басьтозы,
шобретъёссэс, вань тусьты-пуньыоссэс, верблюдъёссэс басьтозы но
соослы тазьы кесяськозы:
”Котыр ласянь кышкытлык!”
30Асорын улӥсьёс, пегӟе, ӝоггес кошкелэ,
гурезь висъёсы ватӥське, – шуэ Кузё-Инмар, –
Вавилонлэн эксэез Навуходоносор тӥ пумысен таӵе малпан поттӥз,
тӥледлы пумит ужрад малпаз.
31Султэлэ, синмаськытэк, сюлмаськытэк улӥсь калыклы пумит
ӝутскелэ, – шуэ Кузё-Инмар, –
ӧсъёсыз но, тунгонъёсыз но ӧвӧл солэн,
одӥгназы уло.
32Верблюдъёссэс таланы, трос пудо уллёоссэс лушканы-тарканы
эрик сётэмын луоз;
пельдӥньысьтызы йырсизэ ӵышкисьёсты тӧл пельтонлэн
вань палъёсаз пазьгыса лэзё,
котькуд палысьтызы соос вылэ бырон лэзё, – шуэ Кузё-Инмар.
33Асор шакалъёслы улон интылы пӧрмоз,
вань дауръёс ӵоже отын кыр дунне луоз;
адями отын уз улы, адями пи отчы уз дугдылы».
34Иудей эксэйлэн Седекиялэн эксэе пуксёнэзлэн кутсконаз Еламлы пумит Кузё-Инмарлэн Иеремия пророклы верам кылыз:
35«Тазьы шуэ Саваоф Кузё-Инмар:
тани, Еламлэсь пукыӵсэ, соослэсь оскиськон кужымзэс, чигто.
36Елам вылэ инлэн ньыль палысьтыз ньыль тӧлъёсты лэзё но
соосты вань та тӧлъёс кузя пазьгыто, –
уллям еламитъёсты вань калыкъёс пӧлысь пумитаны луоз.
37Еламын улӥсьёсты тушмонзылэн син азяз,
лулъёссэ утчасьёссы азьын кышкатыса погырто;
соос вылэ шугадӟонъёс лэзё, вожпотонме уськыто, –
шуэ Кузё-Инмар, –
ваньзэс быдтытозямлы пытьы кузязы меч лэзё.
38Еламе Аслэсьтым престолме пукто,
отысь эксэез но кивалтӥсьёссэс быдто, – шуэ Кузё-Инмар.
39Но берпуметӥ нуналъёсы Еламез пленысь берыкто, –
шуэ Кузё-Инмар».
Глава 49