Выбрать язык
Книги Ветхого Завета
Книги Нового Завета
с русским текстом1Израильлэн Инмарез Саваоф Кузё-Инмар Моав сярысь тазьы шуэ:
«Куректон-кайгу Неволы! Со таркамын;
Кариафаим сантэмамын, киултэмын;
Мизгав сантэмамын, куашкатэмын.
2Моавлэн табере ӧвӧл ни данлыкез;
Есевонын солы пумит сьӧсь уж малпало:
”Мыноме но калыкъёс пӧлысь сое быдтыса куштоме”.
Тон но, Мадмена, бырод; тон бӧрсьын меч ветлэ.
3Оронаим дорысь викышъяса бӧрдэм кылӥське,
со туж зол куашкатэмын, таркамын.
4Моав куашкатэмын;
солэн нылпиосыз викышъяса бӧрдыны кутскизы.
5Лухитэ тубон дорын бӧрдон бӧрсьы бӧрдон ӝутӥське;
Оронаимысь васькон дорын
куашкан-таркан пумысен викышъямез тушмон кылэ.
6Бызе, асьтэлэсь улондэс уте,
луоё кырысь султэк-куартэк кылем писпулы укшасесь луэ.
7Аслад ужъёсыд вылэ, аслад узырлыкъёсыд вылэ
тон оскиськиськод бере, тон но киултэмын луод,
Хамос но аслаз священникъёсыныз, кивалтӥсьёсыныз ӵош
пленэ мыноз.
8Вань городъёс вылэ таркась-куашкатъясь лыктоз но,
город утиськыны уз быгаты;
нёжал но быроз, ӵошал но тырттэм кылёз, кызьы Кузё-Инмар шуиз.
9Моавлы бурдъёс сётэ, лобӟыса кошкыны мед быгатоз;
солэн городъёсыз кыр дуннелы пӧрмозы,
малы ке шуоно отын улӥсез уз ни луы.
10Кузё-Инмарлэсь ужзэ мылкыдтэк лэсьтӥсь мурт каргамын.
Солэсь мечсэ вирлэсь кутыса возись мурт каргамын.
11Моав пинал дырысеныз каньылэн улӥз, маял-шӧм вылаз пукиз,
сосудысь сосудэ лэзьямын ӧй вал, пленэ но ӧз ветлы;
соин ик солэн шӧмыз со борды кыльылӥз,
зыныз но солэн ӧз воштӥськылы.
12Соин ик, тани, вуо нуналъёс, – шуэ Кузё-Инмар, –
куке Мон со доры одӥгысьтыз сосудысь мукетаз киськасьёсты ысто,
соос кисьталозы но сосудъёссэ тырттэм кельтозы,
кувшинъёссэ сӧрылозы.
13Хамос сульдэрлы луыса Моав возьытэ вуттэмын луоз,
кызьы Израиль выжы Вефильлы, аслаз оскиськонэзлы, луыса
возьытэ вуттэмын вал.
14Кызьы тӥ шуиськоды:
”Ми кышкасьтэм адямиос, ожмаськон понна юнэсь”?
15Моав таркамын-куашкатэмын, солэн городъёсыз ӝуало,
йыг-йыгесь пиосыз тӥр-пурт улэ мынӥзы, – шуэ Эксэй,
Саваоф Кузё-Инмар Солэн нимыз.
16Моавлэн матын ини быронэз, шугадӟонэз туж дыртэ ини со доры.
17Вань бускельёсыз, ваньмыз солэсь нимзэ тодӥсьёс,
жалялэ сое, шуэлэ:
”Кызьы куашкатэмын-чигтэмын
кужымлэн кивалтэт бодыез, данлыклэн бодыез!”
18Нылмурт, Дивонын улӥсь,
сӥё-дано улонлэн вылӥысьтыз лэзиськы но сюэд куасьмыса пук,
уго Моавез таркась тон доры лыктоз но
тынэсьтыд юнматэм каръёстэ куашкатоз.
19Нылкышно, Ароерын улӥсь, сюрес дуре султыса учкы,
пегӟисьлэсь, утиськисьлэсь юа: ”Мар луиз”?
20Возьытэ вуттэмын Моав – со куашкатэмын;
викышъялэ, вузэ, Моав куашкатэмын шуыса, Арнонын ялэ.
21Суд вуиз ӵошалъёслы, Халон вылэ, Яаца вылэ, Мофаф вылэ,
22Дивон вылэ, Нево вылэ, Бет-Дивлафаим вылэ,
23Кариафаим вылэ, Бет-Гамул вылэ, Бет-Маон вылэ,
24Кериоф вылэ, Восор вылэ,
Моав музъем вылысь вань городъёс вылэ,
кыдёкысьёсаз но, матысьёсаз но.
25Моавлэн сюрез ӵогыса уськытэмын,
суйбыгытэз куашкатэмын, – шуэ Кузё-Инмар.
26Кудӟытозяз сое секталэ, уго со Кузё-Инмарлы пумит ӝутскиз;
аслаз ӧскем пӧлаз мед лошъяськоз Моав, ачиз со серекъянлы пӧрмоз.
27Тон дорын Израиль серем карыса воземын ӧй вал-а?
Лушкаськисьёс пӧлысь со кутэмын вал шат, –
со сярысь вераськыны гинэ кутскиськод,
кызьы тон йырыныд сэзъяны кутскиськод вал?
28Моавын улӥсьёс, кошкелэ городъёсысь, изгурезьёсын улэ,
гурезьысь гуэ пырон йылэ каръёс лэсьтӥсь дыдыкъёс кадесь луэ.
29Ми кылӥмы Моавлэн вылтӥяськонэз,
ортчыт юн вылтӥяськонэз сярысь,
ассэ вылӥ карон, муртъёсты ултӥян, серем карон,
сюлмыныз вылтӥяськон сямыз сярысь.
30Мон тодӥсько солэсь возьыттэм луэмзэ, – шуэ Кузё-Инмар, –
но со – оскиськымон ӧвӧл;
солэн тырттэмесь кылъёсыз: озьы уз лэсьтэ.
31Со понна ик Моав пумысен викышъяло,
быдэс Моав пумысен зар бӧрдо;
Кир-Харесысь воргоронъёс пумысен лулӟиськылозы.
32Севамысь виноград бакча,
Иазерлэн бӧрдонэныз тон понна мон бӧрдо;
тынад пушъетъёсыд зарезь сьӧры нюжтӥськизы,
Иазер зарезь дуре вуизы;
туркась-таркась тынад гужем кисьмась емышъёсыд вылэ,
кисьмам виноградэд вылэ урдскиз.
33Шумпотон, шулдыръяськон басьтэмын Кармил бордысь,
Моав музъем бордысь но.
Вина нюртонысь виналы пум поно;
азьланяз отын кырӟаса уз ни лёгалэ;
ожмаськон куара луоз, шумпотон куара уз ни луы.
34Есевонлэсь викышъямзэ кылыса,
Елеала дорозь, Яаца дорозь соос куаразэс ӝутозы,
Сӥгор бордысен Оронаим дорозь, куинетӥ Эгла дорозь,
уго Нимримлэн но вуосыз куасьмозы.
35Моавлэсь гурезь йылъёсын курбон сётӥсьёссэ,
инмаръёсызлы ӵындытӥсьёссэ быдто, – шуэ Кузё-Инмар.
36Соин ик мынам сюлмы Моав пумысен чипчирган кадь ӝуштэ;
Кир-Харесын улӥсьёс пумысен сюлмы чипчирган кадь вузэ,
уго соослэн поттэм узырлыксы быриз:
37ваньзылэн йырзы гольык кылемын, ваньзылэн тушсы бырем;
ваньзылэн киоссы ӵабъяськемын,
кусказы – бышкись ӟустари дӥськут.
38Моавлэн вань липет йылъёсаз, ульчаосаз – ваньмыз бӧрдо,
уго Мон Моавез ярантэм сосудэз кадь куашкатӥ, – шуэ Кузё-Инмар.
39Макем со куашкатэмын, –
со сярысь викышъяса вералозы, –
кызьы Моав, берзэ карыса, возьытэн шобырскиз!
Моав аслаз котыраз вань улӥсьёс понна
серекъян-веранлы, шимес макелы пӧрмоз,
40уго тазьы шуэ Кузё-Инмар:
”Тани, со ӧрӟи кадь лобӟоз но Моав йылысен бурдъёссэ вӧлъялоз.
41Городъёс киултэмын луозы, изкаръёс но киултэмын луозы,
Моавысь кышкасьтэмъёслэн сюлэмъёссы со нуналэ
пиякуз курадӟись кышномуртлэн кадь луоз.
42Калыкъёс пӧлысь Моав быдтэмын луоз,
малы ке шуоно со Кузё-Инмарлы пумит бугырскиз.
43Шимес улон, гу, кыӵес – тон понна Моавын улӥсь,
– шуиз Кузё-Инмар.
44Кин шимес улонлэсь пегӟыны выроз, гуэ усёз;
нош кин гуысь потоз, кыӵесэ сюроз,
уго Мон со вылэ, Моав вылэ, вӧсь карон ар лэзё”, – шуэ Кузё-Инмар.
45Пегӟисьёс катьтэммеменызы Есевонлэн сайулаз дугдӥзы,
нош Есевонысь тыл потӥз, Сӥгон пӧлысь – гомась тыл,
со Моавлэсь урдэссэ,
бугыръяськись нылпиослэсь кымессэс сиёз.
46Куректон-кайгу тыныд, Моав!
Хамослы йыбыртъясь калык быриз,
уго тынад пиосыд пленэ нуэмын, нылъёсыд пленын уло.
47Но берпуметӥ нуналъёсы Моавез пленысь берыкто», –
шуэ Кузё-Инмар.
Моавлы суд мынон сярысь веран таин йылпумъяське.
Глава 48