Выбрать язык
Книги Ветхого Завета
Книги Нового Завета
с русским текстом1Макем сьӧдэктӥз зарни, ваньмызлэсь устоез зарни воштӥськиз!
Вань сюрес вожъёсы-падвожъёсы вӧсяськон интылэн изъёсыз
зӥръямын-пазямын.
2Дуно-дано Сӥон пиос, чылкыт зарниен огкадьёс,
кызьы соос горд сюй посудаен ӵошкатэмын,
горшок лэсьтӥсьлэн киызлэн арбериеныз огдунъем каремын!
3Лобась кыйёс но пиоссэс нонто, сюдо,
нош мынам калыкелэн нылыз луоё кырысь
страус тылобурдоос выллем чурытэсь-лекесь луизы:
4нонӥсь нунылэн кылыз сюэз куасьмемен сэрен
гульым выжыяз лякиське;
пичи пиналъёс нянь куро, но нокин но соослы уг сёты.
5Ческыт сиисьёс ульчаосын катьтэммыса пограло;
дуно нап-горд басмаен дӥсяськемъёс кыед люк пӧлысь сиён утчало.
6Мынэсьтым калыкме сьӧлыко ужъёсыз понна вӧсь карон
Содомлэн сьӧлыкъёсыз понна виылон-быдтонлэсь ортчытгес:
со син куспын куашкатэмын вал,
адями киос со борды ӧз йӧтылэ.
7Солэн кивалтӥсьёсыз отын лымылэсь чылкытгес,
йӧллэсь тӧдьыгес вал;
мугорын соос кораллэсь чебересьгес вал,
соослэн тусбуйзы сапфир излы укшась вал;
8нош табере вань сьӧд макелэсь но пеймытгес ни соослэн ымнырзы;
ульчаосысен уг ни тодмало соосты:
соослэн кузы лызы борды лякиськиз, пу кадь кӧс луиз.
9Мечен виылэмъёс шудоесьгес сютэм возьыса виылэмъёслэсь,
малы ке шуоно бусы емыш тырмымтэен сэрен
соос катьтэммыса быризы.
10Мынам калыкелэн бырон вакытаз небыт сюлэмо
кышномуртъёслэн киоссы асьсэлэсь нылпиоссэс
пӧзьтылӥзы асьсэлы сиён карон понна.
11Кузё-Инмар Аслэсьтыз вожпотонзэ быдэстӥз,
йыркурезлэсь лексэ кисьтӥз,
Сӥонэ тыл ӝуатӥз но, со тыл солэсь инъетъёссэ ньылӥз.
12Музъемлэн эксэйёсыз,
дунне вылын вань улӥсьёс но Иерусалим капкатӥ тушмон,
синазькыль-албасты пыроз шуыса ӧз оске.
13Ваньмыз та солэн ӧрекчи пророкъёсызлэн сьӧлыкъёссы понна,
священникъёсызлэн законлы пумит улэмзы понна,
кудъёсыз со пушкын шонер улӥсьёслэсь вирзэс кисьтылӥзы;
14синтэмъёс музэн ульчаос кузя калгизы-ветлӥзы,
вирен саптаськылӥзы, озьы,
соослэн дӥськут бордазы ик йӧтӥськыны уг луы вал.
15«Палэнскелэ! Со кырсь-саптаськем!» Соослэн азязы кесяськизы:
«Палэнске, палэнске, эн йӧтӥськелэ»;
соос паймыса-ӝожомыса кошкылӥзы,
калыкъёс пӧлын шуылӥзы: «Азьланяз соос татын медаз ни улэ!»
16Кузё-Инмар соосты пазьгоз; соос шоры Со уз ни учкы,
малы ке шуоно соос священникъёсты санэ уг поно,
пересь визьнодчиосты уг жаляло.
17Юрттэт витьыса, милям синъёсмы жадемын;
возьмаськон каланча йылысенымы милемыз утьыны быгатӥсьтэм
калыкез ми юнме гинэ витимы.
18Нош соос милесьтым вамышъёсмес чакласа улӥзы,
асьме ульчаос кузя ветлыны медам быгатэ шуыса;
милемлы пум матэ вуиз, нуналъёсмы быдэсмизы;
милемлы пум вуиз.
19Ми сьӧрын уйиськисьёс инмысь ӧрӟиослэсь шаплыесьгес вал;
гурезьёстӥ ми сьӧрын уйиськизы,
милемын ожмаськыны кыр дуннее лушкемен ыбылӥськон
интыос лэсьтылӥзы.
20Кузё-Инмарлэн зырӟыса пуктэмез, милям улонмылэн шоканэз,
соослэн гуосазы кутэмын, – со, кин сярысь ми шуылӥмы:
«Солэн вужер улаз калыкъёс пӧлын уломы».
21Уц музъемын улӥсь, Едом ныл, шумпот, шулдыръяськы.
Тон доры чаша вуоз но,
кудӟытозяд юод, шыр гольык кылиськод.
22Сӥон ныл! Законлы пумит улэмед понна вӧсь карон пумаз вуэ;
азьланяз Со тонэ уз ни улля;
Едом ныл, законлы пумит улэмед понна
Со вӧсь карыны лыктоз но тынэсьтыд сьӧлыкъёстэ шарае поттоз.
Глава 4