Выбрать язык
Книги Ветхого Завета
Книги Нового Завета
с русским текстом1Кузё-Инмаре, тодад вай, милемлы мар луиз;
чакласа учкы милесьтым сантэмаськон улэ шедеммес.
2Ваньбур люкетмы мурт кие выжиз,
милям коркаосмы мурт выжыослы сюризы;
3анайтэм-атайтэм нылпи луимы, атайтэк кылимы;
милям анайёсмы – палкышно кадесь.
4Асьмелэсь вумес азвесь тырыса юиськомы,
пумес но коньдон тырыса басьтӥськомы.
5Милемыз чырты сьӧрамы донгаса лэзё,
ми ужаськомы – шутэтскон дырмы ӧвӧл.
6Нянен кӧтмес тырон понна Египетысь калыклы,
Ассирияысь калыклы кимес мычиськомы.
7Атайёсмы сьӧлыказы, соос табере ӧвӧл ни,
нош ми соослэн законлы пумит улэмзы понна
вӧсь каронэз чидано луиськомы.
8Ляльчиос милемын кузёяськыса уло,
соослэн киулысьтызы милемыз нокин но мозмытӥсь ӧвӧл.
9Меч улын быронлэсь кышкаса,
кыр дуннеысь асьмелы нянь поттӥськомы.
10Сютэм, сиськытэк улыса, милям кумы гур кадь сьӧдэктӥз.
11Кышномуртъёсты Сӥонын, егит нылъёсты
Иудей каръёсын сантэмало.
12Соослэн киынызы кивалтӥсьёс ошемын,
пересь визьнодчиосты гажась-жалясь ӧвӧл.
13Егит пиосты кӧ дуре султыто,
быдэ вуымтэ пиос пу ӝутэт улын пограло.
14Пересь визьнодчиос капка выжыын уг ни пуко;
егит пиос уг кырӟало.
15Сюлэммылэн шумпотонэз дугдӥз-быриз;
бергаса-кырӟаса шудонъёсмы бӧрдонлы пӧрмизы.
16Венец изьымы йырысьтымы усиз;
сьӧлыкаммы понна куректон-кайгу милемлы!
17Соин сэрен ик уго милям сюлэммы сэректэ,
соин сэрен ик синъёсмы гужазы.
18Сӥон гурезь тырттэм кылемен сэрен отӥ ӟичыос ветло.
19Тон, Кузё-Инмаре, пумтэм вапумъёс улӥськод;
Тынад престолэд выжыысь выжые сылэ.
20Мар понна милемыз чылкак вунэтӥськод,
кема дырлы огнамес кельтӥськод?
21Кузё-Инмаре, милемыз Ас палад берыкты, ми Тон пала кариськомы;
вашкала дыръёсы кадь нуналъёсмес выльды.
22Оло, Тон милемыз чылкак кулэтэм карид-а ни,
милемлы мертаны луонтэм вождэ поттӥд-а ни?
Глава 5