Выбрать язык
Книги Ветхого Завета
Книги Нового Завета
с русским текстом1Тазьы вал: куамынэтӥ арлэн ньылетӥ толэзяз, толэзьлэн витетӥ нуналаз, Ховар шур дуре улыны выжемъёс пӧлын улыкум, инъёс усьтӥськизы но, соку мон Инмарлэсь адӟытонъёссэ адӟи.2Иоаким эксэйлэн пленэ шедемезлэн витетӥ араз, толэзьлэн витетӥ нуналаз,3Иезекиильлы, Вузийлэн пиезлы, священниклы, Халдей музъемысь Ховар шур дурын Кузё-Инмар дорысь верамын вал; отын Кузё-Инмарлэн киыз со вылын улӥз.
4Мон адӟисько: тани, уйпалась туж бадӟым пилем лыктэ, гомаса ӝуась тыл, бугырес сильтӧл лыктэ, котыр чилекъя-ворекъя,5нош солэн шораз, тыллэн пушказ, гомась тыллэн югытэз пиштэ; солэн шорысьтыз ньыль пудо-животлы укшась макеос адӟисько, таӵе вал соослэн тусбуйзы: туссы адямилы укша;6котькудӥзлэн ньыль ымнырыз, котькудӥзлэн ньыль бурдыз;7нош соослэн пыдъёссы – шонер пыдъёс, пыдтышъёссы – кунянлэн выллемесь, пиштыса улӥсь ыргон кадь чиляло, [нош бурдъёссы капчиесь].8Бурдъёссы улын, ньыль палаз ик, адями киос.9Ньыльназылэн ик ымныръёссы но, бурдъёссы но вал. Бурдъёссы огзы борды огзы йӧтӥськыса улӥзы. Азьлане мыныкузы, соос ӧз берытскылэ, кудпала ымнырзы учке, ваньзы сопала мынӥзы.10Азьпал ласянь соослэн ымныр туссы – адями ымныр; ваньзылэн, ньыльназылэн ик, бурпаласез тусбуез – левлэн ымнырыз; паллян паласез, ньыльназылэн ик, – ошпилэн ымнырыз, нош мышласянь – ӧрӟилэн ымнырыз, ньыльназылэн ик.
11Ымныръёссы но, бурдъёссы но вылласянь люкиськемын, соослэн кыкез бурдзы огзы борды огзы йӧтӥськыса улӥзы, нош мукетъёсыз, кыкез бурдзы, мугорзэс шобыртыса улӥзы.12Соос котькудзы азьпала мынӥзы, отчы, кытчы духлэн мынэмез потэ, отчы ик мынӥзы; азьлане мынон дыръязы берлане ӧз берытскылэ.
13Та лулоослэн тусбуйзы ӝуась эгыръёслы, лампадаослы укша вал; та лулоос вискытӥ тыл ветлӥз, со тыл пиштыса улӥз, тыл пуш чилекъяса-ворекъяса улӥз.14Лулоос чилекъям кадь ӝог отчы-татчы ветлӥзы.
15Лулоос шоры мон учки, – но тани, та лулоослэн ньыль ымнырзы, соослэн котькудзылэн азяз одӥг поглян сылӥз.16Со поглянъёслэн вылтуссы, пушсы но топаз излы укша, ньылезлэн ик поглянъёслэн вылтуссы одӥг кадь; вылтуссы но, пушсы но тазьы лэсьтэмын: поглянлэн пушказ ваменак поглян кылле кадь.17Мыныкузы ньыль пала ик мыныны-ветлыны быгатӥзы; мыныкузы ӧз берытскылэ.18Соослэн эгесъёссы ӝужытэсь, шимесэсь вал; ньылезлэн ик котыразы тросаз синъёс адӟисько.19Лулоос мыныку, соос вӧзын поглянъёс но мынӥзы; нош лулоос музъем бордысь вылэ ӝутскылыку, поглянъёс но ӝутскылӥзы.20Кытчы духлэн мынэмез потэ, отчы ик соос но мыно; дух кытчы гинэ медаз мыны, поглянъёс но соосын огдыре ӝутскылӥзы, уго лулоослэн духсы поглянъёс пушкын вал.21Лулоос мыныку, поглянъёс но азьлане мынӥзы; лулоос сылыку, поглянъёс но сылӥзы; соосыз музъем вылысь ӝутскылыку, соосын ӵош поглянъёс но ӝутскылӥзы, уго лулоослэн духсы поглянъёс пушкын улӥз.
22Лулоослэн йыр йылазы инбуко кадь маке адӟиське, паймымон чилясь-ворекъясь дуно излы со укша, соослэн йыр йылысьтызы дунне соин шобыртэмын вал.23Инбуко улын котькудзылэн кыкез бурдыз огзы борды огзы йӧтӥськыса улӥзы, нош кык бурдынызы соос асьсэдыз шобыртыса возизы.24Соос мынон дыръя мон кылӥ бурдъёссылэсь куаразэс, трос вуослэн шаугетэмзылы укшась куараез, Ваньмызлэсь Кужмолэн куараезлы укшасез, кужмо куашетэмез, ожмаськисьёслэн сылон интыысьтызы куашетэм куаралы укшасез; нош куке соос дугдылӥзы, бурдъёссэс лэзьылӥзы.25Соослэн йыр йылысьтызы инбукоысь кыл-куара вал; дугдылыкузы соос бурдъёссэс лэзьылӥзы.26Соослэн йыр йылысьтызы инбуко йылын престоллы укшась маке адӟиське, солэн вылтусыз сапфир излы кельше; нош престоллы укшась маке вылын, солэн йылӥяз, адямилы укшась пуке.
27Мон адӟи гомаса ӝуась кортлы укшасез, солэн котыраз, пушласянь, тыллы укшась макеез вал. Кускызлэн улӥысьтыз но, кускызлэн вылӥысьтыз но тыллы укшась макеез мон адӟи, солэн котыраз со чиляса-пиштыса улэ вал.28Зор дыръя пилемын вуюисьлэн кыӵе луэ вылтусыз, солэн котыраз сыӵе ик чилян-пиштон адӟиськыса улӥз.
Глава 1