Выбрать язык
Книги Ветхого Завета
Книги Нового Завета
с русским текстом1Сыӵе вал Кузё-Инмарлэн пиштӥсь данлыкезлы укшанэз адӟон. Тае адӟыкум, Мон ымныр вылам уськытски, соку мон Верасьлэсь куаразэ кылӥ, Со мыным шуиз: «Адямилэн пиез! Султы пыд вылад, Мон тонэн верасько».2Со мыным вераса улыку, мон пушкы дух пыриз но монэ пыдъёсы вылэ султытӥз, мыным Верасез мон кылӥ.
3Со мыным шуиз: «Адямилэн пиез! Мон тонэ израиль пиос доры, тэрытскисьтэм калык доры, ыстӥсько, соос Мыным пумит бугырскизы; та калык, соослэн атайёссы но туннэ нуналозь ик Мынэсьтым куштӥськыса уло.4Та пиос чурытомем, лек сюлэмоесь, соос доры Мон тонэ ыстӥсько, тон соослы шуод: ”Тазьы шуэ Инмар Кузё-Инмар!”5Кылзӥськозы-а соос, уз-а, уго соос бугыръяськись калык, но мед тодозы, соос пӧлын пророк вал шуыса.6Нош тон, адямилэн пиез, соослэсь эн кышка, соослэн кылан-буранзылэсь эн кышка, тон понна соос кыйбодыос, бышкись будосъёс ке но луизы, скорпионъёс дорын ке но тон улӥд, – соослэн кылан-буранзылэсь эн кышка, соослэн ымнырзылэсь но эн кышка, уго соос бугыръяськись калык;7соослы Мынэсьтым кылъёсме вера, кылзӥськозы-а соос, уз-а, уго соос вогесь-мыдланесэсь.8Нош тон, адямилэн пиез, кылзы, мар Мон тыныд верало; та бугыръяськись калык кадь вогъяськись-мыдланьяськись эн луы; ымдэ усьты но, мар Мон тыныд сёто, си».
9Мон адӟи, тани, мон пала ки мычемын, нош со киын – бинялтэм книга.10Но Со мон азьын усьтӥз сое, но тани, бинялтэм книга пушласянь но, кырласянь но гожъямын вал, со вылын гожтэмын: «Бӧрдон, ӝуштон, куректон-кайгу».
Глава 2