Выбрать язык
Книги Ветхого Завета
Книги Нового Завета
с русским текстом1Со мыным шуиз: «Адямилэн пиез! Си, мар тынад азяд, та книга бинялтэтэз си но израиль калыклы мыныса вера».2Соку мон аслэсьтым ымме усьтӥ но, Со та книга бинялтэтэз сиыны сётӥз.3Со мыным шуиз: «Адямилэн пиез! Аслэсьтыд кӧттэ тыр, та тыныд сётэм книга бинялтэтэным кӧтпуштэ тырмыты». Мон сии, ым пушкам со чечы кадь ческыт вал.
4Со мыным шуиз: «Адямилэн пиез! Султы но израиль калык доры мын, Мынэсьтым кылъёсме соослы вера:5Уго могаса, валантэм кылын вераськись калык доры Мон тонэ уг ыстӥськы, израиль калык доры тонэ ыстӥсько.6Могаса, тон понна валантэм кылын вераськись трос калыкъёс доры тонэ уг ыстӥськы; Мон тонэ соос доры ыстоно луысал ке, соос тынэсьтыд кылзӥськысалзы;7Нош израиль калыклэн тонэ кылзэмез уг поты, уго соослэн Монэ кылзэмзы уг поты, малы ке шуоно быдэс израиль калык чурыт сюлэмо, вогъяськись сямо.8Тани, Мон тонэ но со калыклы ваче ымныр кари, тынэсьтыд кыместэ солэн кымесэзлы ваче пумит кари.9Тынэсьтыд кыместэ Мон излэсь юнгес, алмаз кадь кари; соослэсь эн кышка, соослэн ымныр азязы эн куалекты, уго соос бугыръяськись калык».
10Со мыным шуиз: «Адямилэн пиез! Мынэсьтым тыныд верано вань кылъёсме вань сюлмыныд кабыл басьты, пельыныд кылзӥськы;11султы но кужмысь улыны выжытэмъёс доры, ас калыкедлэн нылпиосыз доры, мын, вера, соослы шу: ”Тазьы шуэ Инмар Кузё-Инмар!” Кылзӥськозы-а соос, уз-а кылзӥське».
12Соку монэ дух ӝутӥз; мышкысьтым туж кужмо гудыръясь куара кылӥ: «Ас интыысеныз дано мед луоз Кузё-Инмарлэн пиштӥсь данлыкез!»13Нош озьы ик лулоослэн огзы борды огзы йӧтӥськылӥсь бурдъёссылэсь куашетэмзэс, соос вӧзысь поглянъёслэсь йыггетэмзэс но кужмо гудырилэсь куаразэ кылӥ.14Дух монэ ӝутыса басьтӥз. Ӝожомыса, воже потыса, мон мынӥ; Кузё-Инмарлэн киыз мон вылын зол улӥз.15Ховар шур дурысь Тел-Авиве улыны выжытэмъёс доры мон лыктӥ, соослэн улон интыязы дугдӥ, соос пӧлын сизьым нунал ӵоже туж-туж паймыса улӥ.
16Сизьым нунал ортчем бере Кузё-Инмар дорысь мыным верамын вал:17«Адямилэн пиез! Израиль калыклы Мон тонэ возьмаськисе пуктӥ, Мынам ымысьтым потэм кылэз тон кылзод но Мынам нимыным соосты визьнодалод.18Законлы пумит улӥсьлы Мон шуи ке: ”Кулонэн кулод!”, нош тон, со улэп мед кылёз шуыса, сое ӧд ке визьнода, законлы пумит улӥсь законлы пумит улон сюрес вылтӥ медаз ветлы шуыса ӧд ке валэкты, со законлы пумит улӥсь мурт законлы пумит улон пушкы кулоз, но Мон солэсь вирзэ тынад киулысьтыд утчало.19Законлы пумит улӥсез тон визьмад-нодъяд ке, нош со законлы пумит улонэзлэсь ӧз ке куштӥськы, законлы пумит мынон сюрес вылысьтыз ӧз ке поты, со аслаз законлы пумит улон пӧлаз кулоз, нош тон аслэсьтыд лулдэ утёд.20Шонер улӥсь шонерлыко улонэзлэсь куштӥськиз ке, законлы пумит ужъёс лэсьтӥз ке, Мон со азе сьӧлтэт пукто но, со кулоз; тон сое ӧд ке визьма-нодъя, со сьӧлыкъёсыз понна кулоз, солэн лэсьтылэм шонер ужъёсыз санэ уз понӥське; солэсь вирзэ Мон тынад киулысьтыд утчало.21Нош тон, шонер улӥсь медаз сьӧлыка шуыса, шонер улӥсез визьмад-нодъяд ке, со мурт визьмам-нодъям бере ӧз ни ке сьӧлыка, соку со улэп кылёз, соку тон но аслэсьтыд лулдэ утёд».
22Отын мон вылын Кузё-Инмарлэн киыз вал; Со мыным шуиз: «Султы, пот бусые, отын Мон тонэн верасько».23Мон султӥ но бусые потӥ; но тани, отын Кузё-Инмарлэн данлыкез пиштыса улэ вал, – Ховар шур дурысь азьвыл мынам адӟем пиштӥсь данлыклы таиз но укша вал; мон ымныр вылам уськытски.24Мон пушкы дух пыриз но монэ пыдъёсы вылэ султытӥз, Со монэн вераськиз, Со мыным шуиз: «Мын, аслад коркад ворсаськы.25Тон, адямилэн пиез, тани, тон вылэ жильыетъёс понозы, тонэ думылозы, соку тон калык пӧлтӥ уд ни ветлы.26Тынэсьтыд кылдэ Мон ньылон бордад ляко, тон кылтэм-ымтэм луод, со калыклэсь сьӧлыкъёссэ шарае поттылыны уд быгаты, со бугыръяськись калык уго.27Нош Мон тонэн вераськыны кутски ке, соку кылдэ-ымдэ усьто но, тон соослы тазьы шуод: ”Тазьы шуэ Инмар Кузё-Инмар!” Кинлэн кылзэмез потэ, кылзэ; нош кинлэн кылзэмез уг поты, эн кылзэ, уго та бугыръяськись калык».
Глава 3