Выбрать язык
Книги Ветхого Завета
Книги Нового Завета
с русским текстом1«Тон, адямилэн пиез, аслыд кирпич басьты но аслад азяд пон, со кирпич вылэ Иерусалимлэсь туссэ суредаса возьматы;2Иерусалимлы пумит урдсконэз суредаса возьматы, солы пумит ожмаськон каланчаос лэсьты, солэн котыртӥз мудэт ӝут, солы пумит султӥсь тушмон станэз интыя, солэн котыраз борддорез куашкатъясь машинаос пуктылы;3аслыд корт пул басьты но сое корт борддорез музэн асэныд город вискы пукты, со город шоры ымнырдэ берыкты, со котыртэмын луоз, тон сое котыртыса возь. Со израиль калыклы тодмет луоз.
4Нош тон паллян пал урдэсад выд но со вылэ израиль калыклэсь законлы пумит улэмзэ пон: паллян пал урдэс вылад кӧня нуналъёс кыллёд, сомында нуналъёс тон соослэсь законлы пумит улэмзэс ас вылад нуллод.5Кӧня ар соос законлы пумит улӥзы, сомында нуналъёс ик Мон тонэ кылльыны косӥсько: куинь сю укмыстон нунал ӵоже тон израиль калыклэсь законлы пумит улэмзэ ас вылад нуод.6Тае быдэстӥд ке, соку кыкетӥ ползэ бурпал урдэсад выд ини но Иуда выжылэсь законлы пумит улэмзэ ньыльдон нунал ӵоже ас вылад ну, нуналэз ар мында кари, нуналэз ар мында кари Мон тыныд.7Аслэсьтыд ымнырдэ, гольык кидэ котыртэм Иерусалим пала берыкты но солы пумит азьпалзэ тодытыса вера.8Тани, тон вылэ Мон жильыетъёс понӥ, котыртэм-ёртэм нуналъёсыдлэн дырзы-вапумзы быдэсмытозь, одӥг пал урдэскысьтыд мукет пал урдэс вылад тон уд берытскы.
9Аслыд чабей, йыды, емыш кӧжы, яснык, тари, вазь кеньыр басьты но одӥг тусьтые соосты пон; соослэсь аслыд урдэс вылад кыллёно нуналъёсыд мында няньёс пыж; куинь сю укмыстон нунал ӵоже тон соосты сиёд.10Сиёно сиёндэ мертаса, нуналлы быдэ кызь сӥкль мында си; сиськон дыр вуыку гинэ си.11Вуэз но мертаса ю, гинлэсь куатетӥ люкетсэ гинэ ю; сюэд туж куасьмыку гинэ ю.12Йыды уднянез кадь сиёно сиёндэ си, соослэн син азязы адями сӥть вылын пыж сое».
13Кузё-Инмар шуиз: «Тазьы израиль пиос соосты улляса лэзем берам мурт калыкъёс пушкын улон дыръязы со юрӟым няньзэс сиёзы».14Соку мон шуи: «Э, Инмаре Кузё-Инмаре! Лулы мынам ноку но ӧз саптаськылы, кулэм пудоез но, сьӧсь пӧйшурен кесям пудо сӥлез но мон пинал дырысеным та нуналозь ӧй сиылы; нокыӵе но юрӟым сӥль мынам ымам ӧз пырылы».15Но Со мыным шуиз: «Тани, Мон тыныд адями сӥть интые скал сӥтез эстӥськонэ кутыны лэзё, со вылын няньдэ пыж».16Мыным шуиз на: «Адямилэн пиез! Тани, Мон Иерусалимысь нянь люкылон инъетэз куашкато но, нянез мертаса сиёзы, куректыса-кайгырыса, вуэз но мертаса, ӝожомыса юозы;17малы ке шуоно соос няньлы но, вулы но ёрмыса улозы; кӧшкемаса-куалектыса соос огзы шоры огзы учкозы но асьсэлэн законлы пумит улэмысьтызы соос куасьмозы-шуялозы».
Глава 4