Выбрать язык
Книги Ветхого Завета
Книги Нового Завета
с русским текстом1«Нош тон, адямилэн пиез, аслыд лэчыт пурт басьты, туш мычисьёслэсь мычиськон пуртсэс кияд кут, соин йырдэ ӵышкы, туштэ но мыч, аслыд вес басьты но йырсидэ люкетъёслы люкылы.2Иерусалимез котыртыса-ёртыса воземысь дугдэм бере йырсиедлэсь куинетӥ люкетсэ город шорын сут; мукетсэ куинетӥ люкетсэ басьты но городлэн котыраз пуртэн юд; кылемзэ куинетӥ люкетсэ тӧлъя-буръя лэзь; нош Мон, мечме поттыса, соосты улляло.3Со пӧлысь кӧнязэ ке басьты но дӥськут сӧзыяд дум.4Но со пӧлысь но эшшо басьтыса тылэ кушты, тылын сут. Отысь быдэс израиль калык вылэ тыл потоз».
5Тазьы шуэ Инмар Кузё-Инмар: «Та Иерусалим! Мон сое калыкъёс пушкы пуктӥ, солэн котыраз – музъемъёс.6Нош со Мынам пуктон-косонъёсылы, Мынам законъёсылы пумитъяськыса улэменыз сэрен язычникъёслэсь но сьӧлыкогес луиз, котырысьтыз шаеръёсын улӥсь калыкъёслэсь но уродгес луиз, уго соос Мынэсьтым пуктон-косонъёсме кулэтэм каризы, Мынам законъёсыя но уг уло.7Соин ик Инмар Кузё-Инмар тазьы шуэ: котырады улӥсь язычникъёслэсь но тросгес законлы пумит ужъёс лэсьтӥды бере, Мынам законъёсыя уд улӥське, Мынэсьтым пуктон-косонъёсме уд быдэсъяське бере, котырады улӥсь язычникъёслэн пуктон-косонъёссыя гинэ но уд улӥське бере,8соин ик Инмар Кузё-Инмар тазьы шуэ: тани, Мон но, Мон Ачим тыныд пумит султӥсько, тон пӧлын, язычникъёслэн син азязы, суд ортчыто.9Тынад вань юрӟым ужъёсыд понна Мон тыныд лэсьто сое, мае ноку но Мон ӧй на лэсьтылы, солы укшасьсэ азьланяз но уг ни лэсьтылы.10Со понна тон пӧлын атайёс пиоссэс сиёзы, пиос атайёссэс сиёзы; Мон тыныд суд лэсьто но тынэсьтыд вань улэп кылем муртъёстэ тӧлъя-буръя пазьго.11Улӥсько Мон! – шуэ Инмар Кузё-Инмар, – Мынэсьтым вӧсяськон интыме аслад вань юрӟым макеосыныд, аслад вань жоб-кырсь макеосыныд саптамед понна Мон тонэ сэрпалто, Мон тонэ уг жаля, пунэмзэ берыктытэк уг кельты.12Тынад куинетӥ люкетэд город шорын яраосын гижлоӟыса быроз, сютэм улыса быроз; куинетӥ люкетэз котыр ёросъёсад меч улэ погралоз, нош куинетӥ люкетсэ тӧлъя-буръя пазьго, мечме поттыса, соосты улляло.13Быдэсмоз Мынам вожпотонэ, йыркурме соос вылэ кисьто, собере буйгатско; соос вылын Мынам йыркуре быдэсмыку, тодозы, Мон, Кузё-Инмар, сюлмаськон-вожомон дыръям вераськи шуыса.
14Мон тонэ кыр дуннелы пӧрмыто, тынад котырад улӥсь калыкъёс пӧлын, котькуд мынӥсь-ветлӥсьлэн син азяз тонэ тышкаськон-куаретонлы пӧрмыто.15Тыныд воже потыку, йыры кур луон дыръя тыныд суд лэсьтыкум, йыры кур луыку тонэ ожалъякум, котырад улӥсь калыкъёс пӧлын тон серекъян-веранлы, тышкаськонлы, шорад чиньыен возьматонлы пӧрмод, калыкъёсты курдатонлы пӧрмод, – Мон Кузё-Инмар тае верай, –16соос вылэ сютэм улонлэсь лек ньӧлъёссэ лэзё, соос тӥледыз погыръялозы, соосты тӥледыз быдтыны ысто, сютэм улонэз пӧлады кема дыр ӵоже возё, тӥ дорысь нянь люкылон инъетэз куашкато.17Тӥ доры сютэм улон, сьӧсь пӧйшуръёсты ысто, нылпитэм тонэ кельтозы; гижлоё-яраё каро, висёнъёс лэзё, тон дорын вир кисьтӥськоз, тынад вылад меч урдо; Мон, Кузё-Инмар, тае верай».
Глава 5