Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь мыным верамын вал:2«Адямилэн пиез! Бугыръяськись калык пӧлын тон улӥськод; адӟон понна соослэн синзы вань, но уг адӟо; кылон понна соослэн пельзы вань, но уг кыло; малы ке шуоно соос – бугыръяськись калык.3Нош тон, адямилэн пиез, мукет интые улыны выжон понна мар кулэ, аслыд дася, нуназе шорын соослэн син азязы улыны выж; аслад интыысеныд мукет интые соослэн син азязы улыны выж; оло нош соос валатскозы, бугыръяськись калык ке но соос.4Улыны выжыку кулэ макеосты кадь, аслэсьтыд тӥрлыкъёстэ соослэн син азязы нуназе шорын потты, ачид но мурт шаере улыны выжисьёс выллем соослэн син азязы пот.5Соослэн син азязы борддорез пась кар но со пыр тӥрлыкъёстэ потты.6Соослэн син азязы ныпъетэз пельпум вылад пон, ӝомытэн сое потты, музъемез медад адӟы шуыса, ымнырдэ ворса; уго Мон тонэ израиль калыклы паймымон тодмет карыса пуктӥ».
7Мон лэсьтӥ озьы, кызьы мыным косэмын вал; тӥрлыкъёсме, улыны выжон дыръя кулэ макеосты кадь, нуназе поттӥ, нош ӝытазе киыным борддорез пась кари но ӝомалын ныпъетме поттӥ, соослэн син азязы пельпум вылам ӝутӥ.
8Ӵукна пал Кузё-Инмар дорысь мыным верамын вал:9«Адямилэн пиез! Израиль калык, бугыръяськись калык, тыныд тазьы ӧз вералля-а: ”Мар тон лэсьтӥськод?”10Соослы шу: ”Тазьы шуэ Инмар Кузё-Инмар: та – Иерусалимын кузёяськисьлы но, отын улӥсь быдэс израиль калыклы но азьпал адӟонзэс азьвыл ик тодытыса веран”.11Шу: ”Мон тӥ понна паймымон тодмет луисько; мар мон али лэсьтӥсько, озьы луоз соосын: соосты пленэ нуозы, мукет азе улыны выжозы.12Соослэн пӧлысьтызы кузёяськисьсы ӝомыт куазен пельпум вылаз ныпъетсэ ӝутыса потоз. Сое келян понна борддорез пасялозы; со ымнырзэ шобыртоз, ас синъёсыныз та музъемез со уз адӟы.
13Со вылэ калтонме кушто но, со Мынам калтон пыдэсам сюроз, сое Халдей музъеме Вавилонэ нуо, но со Вавилонэз уз адӟы, отчы со кулоз.14Нош ваньзэс, кинъёс соин ӵош ожмаськизы, солэсь вань ожгарчиоссэ пӧртэм шаеръёсы пазьго, мечме поттыса, соосты улляло.15Соосты мукет калыкъёс пушкы пазьгон дыръям, мурт музъемъёсы соосты тӧлӟытон дыръям соос тодозы, Мон Кузё-Инмар шуыса.16Но соослэсь пичи люкетсэ мечлэсь, сютэм улонлэсь, яраё черъёслэсь Мон утё, пленэ улыны нуэм калыкъёс дорын соос асьсэлэн вань юрӟым ужъёссы сярысь соослы мед вералозы, соку тодозы, Мон – Кузё-Инмар”».
17Кузё-Инмар дорысь мыным верамын вал:18«Адямилэн пиез! Аслэсьтыд няньдэ куалекъяса си, вудэ куалекъяса, кайгырыса ю.19Музъем вылысь калыклы шу: ”Инмар Кузё-Инмар Иерусалимын улӥсьёс сярысь, Израиль музъем сярысь тазьы шуэ: со вылын улӥсьёслэн урод-лек ужъёссы понна асьсэлэсь няньзэс кайгырыса сиёзы, вузэс ӝожомыса юозы, малы ке шуоно музъемзы таркамын, ваньбурез таламын луоз.20Калыкен тырмем городъёс таркамын луозы, музъем кыр дуннелы пӧрмоз; соку тӥ тододы, Мон – Кузё-Инмар”».
21Кузё-Инмар дорысь мыным верамын вал:22«Адямилэн пиез! Израиль музъемын малы таӵе вераськонъёс ветло: ”Трос нуналъёс ортчозы но азьпалзэ тодытыса вань веранъёс ышозы-бырозы”?23Со понна ик соослы шу: ”Тазьы шуэ Инмар Кузё-Инмар: таӵе вераськонэз выжытэм быдто, таӵе вераськонэз Израильын улӥсьёс кылазы уз ни кутэ”; но тон соослы вера: ”Нуналъёс матэ вуизы, азьпалзэ тодытыса вань веранъёс быдэсмозы.24Уго одӥгез но азьпалэз тодытыса веран быдэсмытэк уз кыльы ни, израиль калык пӧлын одӥгез но азьпалзэ тодытыса веран ӧрекчиё уз луы ни.25Уго Мон – Кузё-Инмар, Мон верасько: Мынам верам кылы быдэсмоз, берло дырлы кельтэмын уз луы; бугыръяськись калык, Мон кыл верай, тӥляд улон нуналъёсады Мон сое быдэсто, – шуэ Инмар Кузё-Инмар”».
26Кузё-Инмар дорысь мыным верамын вал:27«Адямилэн пиез! Израиль калык тазьы вера: ”Солэн азьпалзэ тодытыса веранэз трос нуналъёс ортчыса быдэсмоз, кыдёкысь вапумъёс сярысь со азьпалзэ тодытыса вера”.28Соин соослы шу: ”Тазьы шуэ Инмар Кузё-Инмар: одӥгез но Мынам верам кылы берлолы кельтэмын уз луы, Мынам верам кылы быдэсмоз, – шуэ Инмар Кузё-Инмар”».
Глава 12