Выбрать язык
Книги Ветхого Завета
Книги Нового Завета
с русским текстом1Дух монэ ӝутӥз но Кузё-Инмарлэн Вӧсяськон Коркаезлэн шундыӝужан палась капкаез доры вуттӥз, со капка шундыӝужан пала учкыса сылэ. Адӟисько: капкае пырон дорын кызь вить мурт сылэ; соос пӧлысь Азурлэсь Иазания пизэ, Ванеялэсь Фалтия пизэ – калыклэсь кивалтӥсьёссэ – мон синйылтӥ.2Кузё-Инмар мыным шуиз: «Адямилэн пиез! Тани та адямиос законлы пумит уж малпало, соос та городын улӥсьёслы урод визь-кенеш сётыса шуо:3”Матын ӧвӧл на; коркаос пуктыломе; со*а – пурты, нош асьмеос – сӥль”.4Азьланьын мар соосты вите, адямилэн пиез, соослэсь азьпал адӟонзэс соослы тодыты».
5Мон вылэ Кузё-Инмарлэн Духез васькиз но мыным шуиз: «Вера: ”Тазьы шуэ Кузё-Инмар: мар тӥ вераськоды, израиль калык, Мон тодӥсько, мар тӥляд визьмады лыктэ.6Та городын тӥ трос адямиосты вииды, солэсь ульчаоссэ шӧйёсын тырмытӥды.7Соин ик тазьы шуэ Инмар Кузё-Инмар: тӥляд вием муртъёсты, городлэн шораз куштыса кельтэмъёсты, – со сӥль, нош город – со пурты; тӥледыз Мон со пушкысь потто.8Тӥ мечлэсь кышкаськоды, Мон тӥ вылэ меч урдо, – шуэ Инмар Кузё-Инмар.9Мон тӥледыз со город пушкысь потто, тӥледыз мурт киулэ сёто, тӥледыз судить каро.10Меч улэ усёды; Израиль музъемын тӥледыз судить каро, соку тӥ тододы, Мон – Кузё-Инмар.11Тӥ понна та город пурты уз луы, тӥ но со пушкын сӥль уд луэ; Израиль музъемын тӥледыз судить каро;12соку тӥ тододы, Мон – Кузё-Инмар; уго Мынам курон-косонъёсыя ӧд улэ, пуктон-косонъёсме ӧд быдэсъялэ, нош тӥ котырады улӥсь калыкъёслэн пуктон-косонъёссыя улӥды”».13Азьпалзэ тодытыса улон дыръям Ванеялэн пиез Фалтия кулӥз. Ымныр вылам мон выдӥ но бадӟым куараен черектӥськыса шуи: «Э, Инмаре Кузё-Инмаре! Израильысь кылем люкетсэ оло нош пумозяз быдтэмед потэ-а ни?»
14Соку Кузё-Инмар дорысь мыным верамын вал:15«Адямилэн пиез! Тынад агай-вынъёсыдлы, тынад агай-вынъёсыдлы, тынад родной агай-вынъёсыдлы, быдэс израиль калыклы, ваньзылы соослы Иерусалимын улӥсьёс шуо: ”Кузё-Инмарлэсь кыдёкын улэ; та музъем милемлы люкетлы сётэмын”.16Та пумысен шу: ”Тазьы шуэ Инмар Кузё-Инмар: Мон соосты мурт калыкъёс пӧлы улляй ке но, музъем вылъёсы пазьги ке но, соослэн кошконо музъемъёсазы Мон соослы огдырлы храм интыын луо”.17Собере шу: ”Тазьы шуэ Инмар Кузё-Инмар: Мон тӥледыз калыкъёс пӧлысь люкало, тӥледыз берыкто со музъемъёсысь, кудъёсаз тӥ пазьгиськемын; тӥледлы Израиль музъемез сёто.18Отчы лыктозы но со пушкысь вань юрӟым макеоссэ, вань кырсь-шакшы макеоссэ поттыса куштозы.19Соослы ваньзылы одӥг кадь сюлэм сёто, соос пушкы выль дух поно, соослэн лулмугорысьтызы измем сюлэмзэс басьто но соослы лулмугоро сюлэм сёто,20Мынам курон-косонъёсыя мед улозы, Мынэсьтым пуктон-косонъёсме мед утёзы но соосты мед быдэсъялозы; соку соос Мынам калыке луозы, нош Мон соослэн Инмарзы луо.21Нош кинъёслэн сюлэмъёссы юрӟым макеоссы доры, кырсь-шакшы макеоссы сьӧры кыстӥськозы, сыӵе ужъёссы понна соослы пунэмзэ берыкто, – шуэ Инмар Кузё-Инмар”».
22Соку Херувимъёс бурдъёссэс ӝутӥзы, вӧзазы поглянъёс сыло; Израиль Инмарлэн пиштӥсь данлыкез соослэн вылӥязы улӥз.23Кузё-Инмарлэн пиштӥсь данлыкез город пушкысь ӝутскиз но городлэн шундыӝужан палысьтыз гурезь йылэ дугдӥз.
24Дух монэ Халдеяе улыны выжемъёс доры ӝутыса нуиз; Инмарлэн Духез тае мыным уйвӧтын выллем адӟонын возьматӥз. Соку мынам та паймымон адӟонэ мон дорысь кошкиз.25Кузё-Инмарлэсь мыным усьтэм-возьматэм ужъёсыз сярысь улыны выжемъёслы верай.
*а 11:3 со – город; Иерусалим
Глава 11