Выбрать язык
Книги Ветхого Завета
Книги Нового Завета
с русским текстом1Херувимъёслэн йыр йылазы интыяськем инбуко вылысь сапфир из кадь чиляса улӥсь, престоллы укшась макеез мон адӟи.2Кузё-Инмар дэра дэремен дӥсяськем пиосмуртлы шуиз: «Поглянъёс вискытӥ Херувимъёс улэ пыр, Херувимъёс вискысь быдэс сузь ӝуась эгыръёсты басьты но город вылэ куя». Та пиосмурт мынам син азям поглянъёс вискы пыриз.
3Со поглянъёс вискы пырыку, Херувимъёс Вӧсяськон Коркалэн бурпалаз сылӥзы, пушкысь азбарез пилем возъяса улӥз.4Херувим вылысь Кузё-Инмарлэн пиштӥсь данлыкез Вӧсяськон Коркалэн ӧс дораз вуиз. Вӧсяськон Корка пушез пилем шобыртӥз, нош азбар Кузё-Инмарлэн данлыкеныз пиштыса улӥз.5Херувимъёслэн бурдзылэн куараез кылӥське вал педпал азбарын гинэ но, Ваньмызлэсь Кужмо Инмарлэн куараезлы укша вал со.
6Кузё-Инмар дэра дэремен дӥсяськем муртлы таӵе косон сётӥз: «Херувимъёс пӧлын сылӥсь поглянъёс вискысь тыл басьты», со пыриз но поглян доры султӥз, –7соку Херувимъёс пӧлысь одӥгез Херувим аслэсьтыз кизэ тыл пала мычиз но отысь ӝуась эгыръёсты басьтӥз, соосты дэра дэремен дӥсяськемлэн сузяз кисьтӥз. Та пиосмурт, ӝуась эгыръёсты кутыса, Херувимъёс пӧлысь потӥз.
8Херувимъёслэн бурдъёссы улын адямилэн киосызлы укшась киоссы адӟисько вал.9Соку мон адӟи: тани, Херувимъёс вӧзын ньыль поглян, котькуд Херувим вӧзын быдэн одӥг поглян сылӥз, вылтуссыя со поглянъёс топаз излэсь лэсьтэмын шуыса малпалод.10Вылтуссыя ньылез ик поглянъёс огзылы огзы укшало, поглянлэн пушказ ваменак поглян кылле кадь.11Мыно – ньыль пала ик мыно; берлане учкытэк мынӥзы, йырзы кудпала учке, со пала соос мынӥзы; мыныкузы ӧз берытскылэ.12Быдэс мугор вылазы но, тыбыразы но, суйёссы вылын но бурдъёссы вылын но, поглянъёс вылын но котыр ласянь тросаз синъёс вал, ваньмаз, ньыляз ик, поглянзы вылын озьы вал.13Со поглянъёсты, кызьы мон кылӥ, «Галгал»*а шуо.14Котькудӥзлэн улэп макелэн ньыль ымнырыз: нырысетӥез ымныр – Херувим ымныр, кыкетӥез ымныр – адями ымныр, куинетӥез ымныр – лев ымныр, ньылетӥез ымныр – ӧрӟи ымныр.
15Херувимъёс ӝутскизы. Таос со ик улэп макеос вал, кудъёссэ мон Ховар шур дурысь адӟи.16Херувимъёс мыныку, соос вӧзын поглянъёс но мынӥзы; музъем вылысь ӝутскон понна Херувимъёс бурдъёссэс ӝутыку, поглянъёс но соос бордысь ӧз люкиськылэ, соос бордын возиськизы.17Соос сылон дыръя таос но сылӥзы; соос ӝутскылыку, таос но ӝутскылӥзы, уго соос бордын улэп макеослэн духсы улӥз.
18Кузё-Инмарлэн пиштӥсь данлыкез Вӧсяськон Коркалэн ӧс выжыысьтыз кошкиз но Херувимъёс йылэ султӥз.19Херувимъёс бурдъёссэс ӝутӥзы но мынам син азям музъем вылысь ӝутскизы; кошкыкузы поглянъёс но вӧзазы вал; Кузё-Инмарлэн Вӧсяськон Коркаезлэн шундыӝужанпал капкаяз пырон доры султӥзы, Израиль Инмарлэн пиштӥсь данлыкез соослэн вылӥязы улӥз.20Та улэп макеосты мон Израиль Инмарлэн пыд выжыысьтыз Хорив шур дурын адӟи вал. Мон тодмай, таос Херувимъёс шуыса.21Котькудӥзлэн быдэн ньыль ымнырыз, котькудӥзлэн быдэн ньыль бурдыз, бурдъёссы улын адями киослы укшась макеос вал.22Таослэн но ымныр туссы Ховар шур дурысь адӟем Херувимъёслэн кадь ик. Кудпала учке Херувимлэн ымнырыз, ваньзы со пала шонерак мынылӥзы.
*а 10:13 Галгал «бергась питран» шуыса берыктӥське
Глава 10