Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь мыным верамын вал:2«Адямилэн пиез! Иерусалимлы юрӟым ужъёсыз сярысь вера,3тон солы шу: ”Иерусалимлэн нылызлы тазьы шуэ Инмар Кузё-Инмар: тынад выжыед, тынад вордскем шаеред Ханаан музъемын, атаед аморрей пи, анаед хеттей ныл;4тон вордскыку, тон вордскон нуналэ, гогыдэ ӧз вандэ, чылкытатон понна вуэн гылтэмын тон ӧй вал, сылалэн но зырамын ӧй вал, кутэтэн но бинямын ӧй вал.5Тонэ гажаса-жаляса та ужъёс пӧлысь одӥгзэ ке но тыныд лэсьтыны вылысь нокин но тонэ ӧз жаля; тынад вордскем нуналад, тынэсьтыд улондэ кулэтэм карыса, тон бусые куштэмын вал.
6Тон вӧзтӥ Мон ортчи но тонэ орсмем вир пӧлад погылляськыса кыллемдэ адӟем берам шуи: ”Вир пӧлад ул!” Озьы Мон тыныд шуи: ”Вир пӧлад ул!”7Луд вылысь будосъёсты выллем тонэ йылэтӥ; быдэ вуид, бадӟым будӥд, чеберлэсь но чебер луид, гадьёсыд ӝутскизы, йырсиед будӥз; но тон гольык вал, шобыртэмын ӧй вал.8Тон вӧзтӥ ортчыкум, Мон тонэ адӟи но, тани, тынад вапумед, яратонлэн дырыз вуэмын вал; дӥсянэлэн сӧзыосыныз тонэ шобыртӥ, гольык интыдэ ватӥ; тыныд кыл сётӥ но тонэн огазе кариськи, – шуэ Инмар Кузё-Инмар, – тон Мынам луид.9Тонэ вуэн миськи, вылысьтыд вирдэ гылтӥ, тонэ вӧйын зырай.10Вылад пужыё дэрем дӥсяй, пыдад сафьян сандали понӥ, векчи етӥн дэраен кустэ думи, буртчин сюлыкен тонэ шобыртӥ.11Чеберъянъёсын тонэ чеберъяй, кияд поскесъёс понӥ, чыртыяд – весь.12Ныр пелесад кульчо понӥ, пеляд – угы, йыр вылад синмаськымон венец изьы изьыяй.13Озьыен, тон зарниен но азвесен чеберъяськид, дӥськутэд векчи етӥн дэралэсь, буртчинлэсь, пужъятэм басмаослэсь вал; дуно чабей пызьлэсь пыжем нянь, чечы, вӧй сиыса улӥд; тон верантэм чебер вал, эксэй вӧзысь сӥё-дано инты басьтыны ярамон луид.14Чеберед понна калыкъёс пӧлы данэд вӧлмиз, малы ке шуоно Мынам тонэ дӥсям туж чебер дӥсянэным тон чеберлэсь но чебер вал, – шуэ Инмар Кузё-Инмар.
15Нош тон аслад чеберед вылэ оскиськид, данэд ваньмызлы тодмо луиз но, тон юмшаса-калгыса улыны кутскид, вань ортчись-кошкисьёсын тон дась вал азон сьӧлыке пырыны, ваньмыныз азыса-калгыса улӥд.16Дӥськутэд пӧлысь мае но сое басьтыса, гурезь йылъёсы пӧртэм буёло вӧсяськон интыос тон аслыд лэсьтӥд, соос вылын азон сьӧлык лэсьтыса улӥд, озьы уз ни пӧрмы, уз ни луы таре.17Мынам тыныд сётэм, Мынам зарниелэсь, азвеселэсь лэсьтэм чеберъяськон арбериостэ басьтыса, тон аслыд пиосмурт сульдэръёс лэсьтӥд но соосын азыса-сьӧлыкаса улӥд.18Пужыё дэремъёсыныд сульдэръёстэ дӥсяд, Мынэсьтым вӧйме, Мынэсьтым ческыт зыно ӵындытонме соослэн азязы пуктылӥд,19кӧттэ тырыны тыныд сётъям няньме но, чабей пызьме, вӧйме, чечыме но тон ческыт зын поттылыны соослэн азязы пуктылӥд: та но вал, – шуэ Инмар Кузё-Инмар.
20Мон понна вордэм пиостэ, нылъёстэ басьтӥд но, соосты курбон карыса, соослы сиыны сётӥд. Азыса-калгыса улэмед гинэ уг тырмы вал-а?21Нош тон Мынэсьтым пиосме вандылӥд но, тыл пыр поттыса, соослы сётылӥд.22Вань юрӟым ужъёстэ, азон сьӧлыкъёстэ лэсьтылыкуд, пинал дырысьтыд нуналъёсты тодад ӧд вайы, соку тон гольык, шобыртымтэ вал, орсмем вир пӧлад погылляськыса кылльыны куштэмын вал.23Вань со лек-сьӧлыко ужъёсыд бере – кайгу, кайгу тыныд! – шуэ Инмар Кузё-Инмар, –24тон аслыд азон интыос лэсьтӥд, вань падвожъёсы аслыд ӝужытэсь интыос лэсьтылӥд;25вань сюресъёслэн кутсконазы аслыд вӧсяськон интыос лэсьтылӥд, аслэсьтыд чеберлыктэ сантэмад, вань мынӥсь-ветлӥсьёс азе пыдъёстэ вайялляд, азон сьӧлыкъёстэ йылэтӥд.26Аслад бускельёсыныд, ӝужыт мугоро египет пиосын, азыса-калгыса улӥд, Мынэсьтым вожме поттыса, азон сьӧлыкъёстэ йылэтӥд.
27Но тани, тон вылэ Мон киме ӝутӥ, тыныд дасям люкетме пичиятӥ но тонэ синазькыль карись филистим нылъёслэн киулазы тонэ сётӥ, соос тынад юрӟым выросъёсыдлэсь возьдаськизы.28Кӧтыд ӧз тыры бере, ассур пиосын но азыса-калгыса улӥд, соосын азыса-калгыса улӥд, но соин но кӧтыд ӧз тыры;29Ханаан музъемысен Халдеяозь тон укыр трос азыса-калгыса улӥд, но соин но кӧтыд ӧз тыры.30Макем жадемын-катьтэммемын луыны кулэ тынад сюлэмыд, – шуэ Инмар Кузё-Инмар, – куке тон ваньзэ тае возьытэз чик валасьтэм калгись кышномурт кадь лэсьтӥд!31Вань сюресъёслэн кутсконъёсазы азон интыос пуктылыкуд, вань падвожъёсы вӧсяськон интыос лэсьтылыкуд, тон азӥсь-калгись кышномуртлы уд укшаськы вал, малы ке шуоно азон-калгон понна сётоно кузьымъёсты тон ӧд курылы,32аслаз кузпалэз интые мукет пиосмуртъёсын улӥсь азэм кышномурт кадь тон вал.33Ваньмызлы азыса-калгыса улӥсь кышномуртъёслы кузьым сёткало, нош тон вань дусымъёсыдлы ачид кузьымъёс сётъяд, вань палъёсысь тонэн асэныд азон сьӧлык лэсьтыны мед лыктозы шуыса, саламъёсыныд соосты ас палад берыктылӥд.34Тынад азыса улонэд азыса-калгыса улӥсь кышномуртъёслэн сямзылэсь чылкак пӧртэм вал – тон сьӧры ӧз уйиськылэ, тыныд кузьымъёс ӧз сётъялэ, тон ачид кузьымъёс сёткад; соин ик тон, мукетъёсын ӵошатыса, мыдлань лэсьтылӥд.35Соин ик, азыса улӥсь кышно, Кузё-Инмарлэсь верам кылзэ пеляд пон!
36Тазьы шуэ Инмар Кузё-Инмар: коньдондэ тазьы киськамед понна, азон сьӧлык лэсьтон дыръяд дусымъёсыд азьын, вань юрӟым сульдэръёсыд азьын гольыктэ возьматыса улэмед понна, сульдэръёсыдлы курбонлы сётылэм пиосыдлэн вирзы понна, –37вань та ужъёсыд понна тынэсьтыд азыса-калгыса улэм вань яратоно дусымъёстэ Мон люкало, пӧртэм палъёсысь вань синазькыль карем муртъёстэ тыныд пумит султытыны люкало но соос азьын тонэ гольык каро, вань юрӟымдэ адӟозы.38Азыса-калгыса улӥсь, вир кисьтӥсь кышномуртъёсты кадь ик тонэ судить каро, вожпотонэ пурӟыку, йыры кур луон дыръя тынэсьтыд вирдэ кисьтыто;39соослэн киулазы тонэ сёто, азыса улон интыостэ таркалозы, тынэсьтыд лэсьтэм вӧсяськон интыостэ пазялозы, вылысьтыд дӥськуттэ ишкалтозы, чеберъяськонъёстэ басьтозы, тонэ гольык, шобыртымтэ куен кельтозы.40Тыныд пумит калыкез люкалозы, тонэ изъёсын зӥръяса жугозы, тонэ мечъёсынызы коралозы.41Коркаостэ тылын сутозы, трос кышномуртъёслэн син азязы тыныд суд лэсьтозы; азыса улонэдлы пум поно, кузьымъёс уд ни сётка.42Тон вылэ вожпотонме кисьтӥ ке, буйгатско, тон вылэ ӝуатскем йыркуре сӥялоз, буйгатско но вожме уг ни потты.
43Аслэсьтыд пинал дырдэ тодад вайымтэед понна, вань ужъёсыныд Монэ керӟегъяськытэмед понна, тани, тынад йӧнтэм ужъёсыд понна кылдэ юало, – шуэ Инмар Кузё-Инмар, – вань та юрӟым ужъёсыд бере азон сьӧлыке медад ни пыра.44Тани, мадёнъёс пыр вераськись адями тон сярысь тазьы шуыны быгатэ: ”Кыӵе анаез, сыӵе ик нылыз”.45Тон анаедлы укшась ныл, со кузпалзэ но, нылпиоссэ но куштыса кельтӥз; тон сузэръёсыдлы укшась сузэр, соос картъёссэс но, нылпиоссэс но куштыса кельтӥзы. Тӥляд анайды хеттей ныл, атайды аморрей пи.46Нош тынад бадӟым апаед – Самария, аслаз нылъёсыныз паллян палад (уйпалад) улӥсь; нош покчи сузэред, тынад бур (лымшор) палад улӥсь, со – Содом аслаз нылъёсыныз.47Но тон соослэн сюрестӥзы ӧд ветлы, соослэн юрӟым ужъёссыя ӧд лэсьтылы; со уг тырмы вал: вань сюресъёсад тон соослэсь золгес азыса-сӧриськыса улӥд.48Улӥсько Мон! – шуэ Инмар Кузё-Инмар, – Содом, тынад сузэред, ачиз но, солэн нылъёсыз но ӧз лэсьтэ сое, мае тон но тынад нылъёсыд лэсьтӥды.49Тани мар бордын вал тынад Содом сузэредлэн, солэн нылъёсызлэн законлы пумит улэмзы: вылтӥяськыса, узырлык пӧлын куаныса, шулдыръяськыса майбыр улӥзы, начар муртлы, кураськисьлы со ӧз юрттӥськылы.50Вылтӥяськыны соос кутскизы, Мынам син азям юрӟым ужъёс лэсьтылӥзы, сое адӟыса, Мон соосты кулэтэм кари.51Самария тынад сьӧлыкъёсыд пӧлысь ӝынызэ но ӧз лэсьты; аслад юрӟым ужъёсыныд тон соосты ортчид, тынад лэсьтэм вань юрӟым ужъёсыныд сэрен тынад сузэръёсыд тынэсьтыд шонерегес потӥзы.52Аслэсьтыд сузэръёстэ куаретыса-пыкылыса улӥсь, аслэсьтыд возьытэ усёндэ вылад ну ук тон, аслад сьӧлыкъёсыныд соосын ӵошатыса тон астэ соослэсь но золгес возьытэ уськытӥд, соин ик соос тынэсьтыд шонерегес потэмын. Возьытэ вуыса, тон но ӵыжекты ук, возьытэ усёндэ вылад ну, соку тон аслэсьтыд сузэръёстэ шонере поттод.
53Мон соосты пленысь берыкто, Содомез, солэсь нылъёссэ но пленысь берен ваё, Самарияез, солэсь нылъёссэ но пленысь берен ваё, соос вискы тынэсьтыд пленэ шедемъёстэ берен ваё,54аслэсьтыд возьытэ усёндэ вылад мед нуод, ваньмыз понна, мар тон лэсьтӥд, возьдаськыса мед улод, – озьы тон сузэръёстэ буйгатод.55Тынад сузэръёсыд, Содом но солэн нылъёсыз, нырысь кыӵеесь вал, берен сыӵеесь ик луозы, Самария но солэн нылъёсыз нырысь кыӵеесь вал, нош ик сыӵеесь ик луозы, тон но, тынад нылъёсыд но кутсконазы ик кыӵеесь вал, нош ик сыӵеесь ик луоды.56Вылтӥяськыса улон нуналъёсад Содом сузэред сярысь тодэ ваёнэд кылад-ымад ик ӧй но вал,57соку тынад сьӧлыклэсь кышкатэк улонэд шарае поттэмын ӧй на вал, нош табере тон возьытэ вуттэмын, тонэ Сириялэн нылъёсыз, соослэн ёросъёсазы улӥсь вань бускельёссы, Филистим музъемысь нылъёс но котыр ласянь тон шоры синазькыль карыса учко.58Азыса-калгыса улэмед понна, юрӟым ужъёсыд понна курадӟон адӟиськод, – шуэ Кузё-Инмар.
59Уго тазьы шуэ Инмар Кузё-Инмар: сётэм кылдэ быдэстытэк кусыпез сӧремед понна Мон тыныд лэсьто озьы, кызьы тон лэсьтӥд.60Озьы ке но Аслэсьтым тонэн егит дыръяд кылдытэм кусыпме Мон тодам ваё, тонэн пумтэм дауръёс ӵоже валче улоно кусыпме выльысен улӟыто.61Тон аслэсьтыд сюресъёстэ тодад ваёд, ас бордад аслэсьтыд бадӟымъёссэ но, покчиоссэ но сузэръёстэ кутылыкуд, тыныд возьыт луоз; Мон соосты тыныд ныллы сётыло, но соос Мынам тонэн кылдытэм кусыпе бордысь уг пото.62Тонэн Аслэсьтым кусыпме Мон выльысен улӟыто, тон мед тодод, Мон Кузё-Инмар шуыса.63Та ваньмыз луоз со понна: вань сьӧлыкъёстэ Мон куштэм бере тон тодад мед возёд, мед возьдаськод, азьланяз, возьытэ усёнлэсь кышкаса, ымдэ но усьтыны медад ни дӥсьты, – шуэ Инмар Кузё-Инмар”».
Глава 16