Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь мыным верамын вал:2«Адямилэн пиез! Мадиськон ӵекты, израиль калыклы мадён вера.3Шу: ”Тазьы шуэ Инмар Кузё-Инмар:
Ливан вылэ бадӟым бурдо, кузь тылыё, гоно, ворпо бадӟым ӧрӟи
лобӟыса лыктӥз но кедырпулэсь йылзэ басьтӥз,
4выль пушъетъёс пӧлысь йылысьсэ тӥялтӥз но
Ханаан музъеме вайиз,
вузкарисьёслэн городазы понӥз сое;
5та музъемысь одӥгзэ кидысэз басьтӥз но
сое удалтӥсь музъеме мерттӥз,
бадьпуэз музэн сое бадӟым вуос дуре интыяз.
6Со будӥз, солэсь виноградпуд пӧрмиз,
паськыт, лапег мугоро будӥз,
вайёсыз солэн бордаз мыкыртӥськыса улӥзы,
выжыосыз но солэн улаз ик вал,
озьы виноград модос луиз, пушъет сётӥз, вайёс лэзиз.
7Вал на мукетыз бадӟым бурдо, гоно ӧрӟи;
но тани, та виноград модос аслаз выжыосыныз
со доры кыстӥськыны кутскиз,
со доры вайёссэ вӧлъяз, мерттэм интыезлэн бороздаысь
со ву мед киськалоз шуыса.
8Со ӟеч музъеме, бадӟым вуос дуре мерттэмын вал, –
вайёс лэзиз но емыш сётӥсь луиз, туж ӟеч модослы пӧрмиз”.
9Шу: ”Тазьы шуэ Инмар Кузё-Инмар: солэн азинлыкез луоз-а? Солэсь выжызэ уз порылэ-а, емышъёссэ уз ишкалэ-а, соин сэрен со уз куасьмы-а? Ваньмыз со бордысь пушъем выль вайёсыз куасьмозы. Бадӟым кужым понытэк, трос муртъёстэк сое выжыеныз валче ишкалтозы.10Со мерттэмын ке но, азинлыкез луоз меда? Шундыӝужанысь потэм тӧл со борды йӧтӥськиз ке, уз куасьмы-а со? Аслаз будэм убо вылаз со куасьмоз”».
11Кузё-Инмар дорысь мыным верамын вал:12«Бугыръяськись калыклы тазьы шу: ”Уд тодӥське шат, мар шуэм со?” Шу: ”Тани, Иерусалиме Вавилон эксэй лыктӥз, солэсь эксэйзэ, кивалтӥсьёссэ кутӥз но соосты Вавилонэ ас дораз вайиз.13Эксэй выжыысь мукетсэ басьтӥз но соин кусып кылдытӥз, сое кыл сётытӥз, со музъемысь кужмо муртъёсты ас сьӧраз басьтӥз,14эксэйлык тэрытскись мед луоз, ӝутскыны медаз быгаты, кылдытэм кусыпез мед утёз, кусып юн мед возиськоз шуыса.15Нош Вавилон эксэй бордысь со куштӥськиз, солы валъёс но трос калык мед сётозы шуыса, посолъёссэ Египетэ ыстӥз. Солэн азинлыкез луоз-а? Тае лэсьтӥсь быдэс кылёз-а? Со кусыпез сӧриз – улэп кылёз-а?16Улӥсько Мон! – шуэ Инмар Кузё-Инмар, – сое эксэй карыса пуктэм эксэйлэн улон интыяз, со эксэй дорын Вавилонын со кулоз, малы ке шуоно солы сётэм кылзэ ӧз быдэсты, соин кусыпсэ сӧриз.17Трос лулъёсты быдтон понна мудэт ӝутэмын ке луиз, ожмаськон каланчаос пуктэмын луизы ке, туж бадӟым кужымен, туж трос калыкен но та ожмаськонын фараон со понна номыр но уз лэсьты.18Кусыпез сӧрон понна сётэм кылзэ со санэ ӧз поны, но тани, со кизэ сётӥз но ваньзэ тае лэсьтӥз; со быдэс уз кыльы.
19Со понна ик тазьы шуэ Инмар Кузё-Инмар: улӥсько Мон! Мынэсьтым сётэм кылме со кулэтэм кариз бере, Мынэсьтым кылдытэм кусыпме сӧриз бере, солэн йыр вылаз Мон солэсь ужзэ берыкто.20Со вылэ казьме кушто, Мынам вотэсам-сьӧлтэтам со сюроз; сое Вавилонэ ваё но Мыным пумит лэсьтэм кескич ужъёсыз понна отын солэсь кылзэ юало.21Нош солэн вань полкъёсысьтыз пегасьёсыз меч улын бырозы, нош улэп кылемъёсыз тӧлъя-буръя пазьгемын луозы; соку тӥ тододы, Мон, Кузё-Инмар, тае верай шуыса.
22Тазьы шуэ Инмар Кузё-Инмар: ӝужыт кедырпулэн йылысьтыз Мон пушъетсэ басьтыса мертто; йылӥ пушъетъёсысьтыз ненег вайзэ чигто но ӝужыт, быдӟым гурезь йылэ мертто.23Израильлэн ӝужыт гурезяз сое мертто, вайёс лэзёз, собере емыш ваёз, бадӟымлэсь но бадӟым кедырпу луоз, солэн вайёсыз улын пӧртэм тылобурдоос каръяськозы, вайёсызлэн вужер улазы соос улозы.24Бусыысь вань писпуос тодозы, Мон – Кузё-Инмар, ӝужыт писпуэз лапегатӥсько, лапег писпуэз ӝужыт карисько, вожектӥсь писпуэз куасьтӥсько, нош куасьмем писпуэз сяськаяськись карисько: Мон – Кузё-Инмар, тае верай, тае лэсьто но”».
Глава 17