Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь мыным верамын вал:2«Израиль музъемын малы та лэчыт веранэз санэ понӥськоды: ”Атайёс чырс виноград мульыосты сиизы, нош пиналъёссылэн пиньёссы долказы”.3Улӥсько Мон! – шуэ Инмар Кузё-Инмар, – азьланяз та лэчыт веранэз Израильын уз ни вералэ.4Уго тани, вань лулъёс – Мынам: атайлэн но лулыз, пилэн но лулыз – Мынам киулам; сьӧлыкась мурт кулоз.5Кин шонер улӥсь, ваньзэ законъя, шонерлыко лэсьтыса улэ,6кин гурезьёсын курбон сиён уг сиы, израиль калыклэн сульдэръёсыз шоры синзэ уг берыкты, матысезлэсь кышнозэ уг сапта, ас кышноезлэн жобъёсызлэсь чылкытатӥськытозяз, матаз уг мыны,7нокинэ ёртыса уг возьы, пунэм тыроно муртэзлы солэсь пунэмзэ тырытозязлы сётыса кельтэм арберизэ (залогзэ) берыктэ, лушкаськыса уг ветлы, няньзэ сютэм муртлы сётэ, гольык муртэ дӥськутэн шобыртэ,8мултэсмытыса пайда басьтон вылысь пунэмен уг сёты, барыш уг потты, шонертэм улонлэсь утиське, адямиос куспысь суд ужъёсты шонерлыко сэрттэ-пертче,9Мынам курон-косонъёсыя улэ-вылэ, Мынэсьтым пуктон-косонъёсме пӧяськытэк быдэсъя ке, со шонер улӥсь, со одно ик улэп луоз, – шуэ Инмар Кузё-Инмар.
10-11Нош солэн йырвандӥсь, вир кисьтӥсь пиез вордскиз ке, кудӥз атаезлэсь ноку но лэсьтылымтэ та йӧнтэм ужъёс пӧлысь кудзэ ке огзэ лэсьтэ: гурезьёсын курбон сиёнэз сие ке, матысезлэсь кышнозэ сапта ке,12начар улӥсь, кураськись муртэ ӝикатыса возе ке, кужмысь тала ке, пунэм тыроно муртэзлы солэсь пунэмзэ тырытозязлы сётыса кельтэм арберизэ уг ни ке берыкты, сульдэръёс пала синъёсыныз мыльккиськыса улэ ке, юрӟым ужъёс лэсьтэ ке,13тросгес пайда басьтон вылысь пунэмен сётэ ке, барыш поттэ ке, со улэп кыльыны кулэ на-а? Уз, со улэп уз ни кыльы. Кин вань та юрӟым ужъёсты лэсьтэ, со одно ик кулоз, солэн вирыз ас вылаз вуоз.14Нош кинлэн ке но пиез вордскиз но атаезлэсь лэсьтэм вань сьӧлыкъёссэ адӟе но атаезлэсь сьӧлыкъёссэ уг ке лэсьты:15Гурезьёсын курбон сиён уг ке сиы, израиль калыклэн сульдэръёсыз пала синъёсыныз уг ке мыльккиськы, матысезлэсь кышнозэ уг ке сапта,16нокинэ но ёртыса-ӝикатыса уг ке возьы, пунэмен сётонзэ барыш поттонлы уг ке пӧрмыты, кужмысь уг ке тала, няньзэ сютэм муртлы сётэ ке, гольык муртэ дӥськутэн шобыртэ ке,17куанер муртэ ӝоже уг ке уськыты, пунэмен сётэмез понна мултэсмытыса ваньбур уг ке люка, барыш уг ке потты, Мынэсьтым косонъёсме быдэсъя ке, Мынам курон-косонъёсыя улэ-вылэ ке, со аслаз атаезлэн законлы пумит улэмез понна уз кулы; со улэп кылёз.18Нош солэн атаез мукетъёсты лек ӝикатыса возиз ке, агай-вынзэ таласа улӥз ке, ас калыкез пушкын умойтэм уж лэсьтылӥз ке, тани, со законлы пумит улэмез понна кулоз.
19Тӥ шуиськоды: ”Малы бен пиез атаезлэн янгышез понна ответ уг куты?” Малы ке шуоно пиез законъя, шонерлыко улэ, Мынэсьтым пуктон-косонъёсме чакла-уте, соосты быдэсъя; со улэп луоз.20Сьӧлыкась лул кулоз; пи атаезлэн сьӧлыкъёсыз понна ответ уг куты, атай но пиезлэн сьӧлыкъёсыз понна ответ уг куты, шонер улӥсьлэн шонерлыкез ас бордаз кыле, законлы пумит улӥсьлэн но законлы пумит улонэз ас бордаз ик кыле.
21Законлы пумит улӥсь но вань лэсьтэм сьӧлыкъёсыз бордысь куштӥськиз ке, Мынэсьтым вань пуктон-косонъёсме чаклаз-утиз ке, законъя, шонерлыко улӥз-вылӥз ке, улэп луоз, уз кулы.22Одӥгез но лэсьтэм йыружез тодэ ваемын уз ни луы; шонерлык лэсьтыны кутскиз бере, со улэп луоз.23Законлы пумит улӥсьлэсь кулонзэ Мон витисько шат? – шуэ Инмар Кузё-Инмар, – со сюрес вылысьтыз мед берытскоз но улэп мед луоз – сое уг-а витиськы?24Шонер улӥсь шонерлыкезлэсь палэнскиз ке, шонертэм лэсьтыны кутскиз ке, законлы пумит улӥсь кадь ик вань со юрӟым ужъёсты лэсьтыны кутскиз ке, улэп луоз-а со? Солэн лэсьтэм ӟеч ужъёсыз тодэ ваемын уз луэ; аслаз законлы пумит лэсьтэм ужъёсыз понна, сьӧлыкъёсыз понна, со кулоз.
25Но тӥ шуиськоды: ”Кузё-Инмарлэн сюресэз шонертэм”. Израиль калык, кылзӥськы! Мынам-а сюресэ шонер ӧвӧл? Тӥляд шонертэм ӧвӧл-а сюресты?26Шонер улӥсь аслаз шонерлыкезлэсь куштӥське но законлы пумит уж лэсьтыны кутске ке, со понна кулэ ке, соку со законлы пумит лэсьтэм ужез понна кулэ.27Нош законлы пумит улӥсь законлы пумит лэсьтэм ужъёсызлэсь куштӥське но кутске ке законъя, шонерлыко улыны, со лулыныз улонэ берытске.28Уго со валатскиз но аслаз вань лэсьтэм йыружъёсызлэсь куштӥськиз, – со улэп луоз, уз кулы.29Нош израиль калык шуэ: ”Кузё-Инмарлэн сюресэз шонертэм!” Мынам-а сюресъёсы шонертэмесь, израиль калык? Тӥляд сюресъёсты шонертэм ӧвӧл меда?30Израиль калык, со понна ик Мон тӥледыз судить каро, улэм-ветлэм сюресъёстэс лыдэ басьтыса, кылдэс юало, – шуэ Инмар Кузё-Инмар; сьӧлыкъёсты понна ӧпкеле, вань йыружъёстылэсь куштӥське – сьӧлыклэсь кышкатэк улон тӥ понна канжаськон медаз лу.31Вань лэсьтэм сьӧлыкъёсты, сьӧлыко ужъёсты бордысь куштӥське, выль сюлэмен, выль духен улыны кутске; малы бен тӥ кулыны кулэ, израиль калык?32Нокинлэсь но кулонзэ Мон уг возьмаськы ук, – шуэ Инмар Кузё-Инмар, – Инмар пала берыктӥське но кема улэлэ ук!»
Глава 18