Выбрать язык
Книги Ветхого Завета
Книги Нового Завета
с русским текстом1«Израильлэн кивалтӥсьёсыз пумысен тон кыласа-бураса бӧрдыны кутскы,2шу:
”Кыӵе мумы лев тынад анаед?
Сьӧсь пӧйшуръёс пушкы интыяськиз,
левпиоссэ пинал левъёс куспын будэтӥз.
3Левпиос пӧлысь огзэ быдэ вуттӥд;
со пинал лев луиз, сиён кутылыны дышиз, адямиосты сиылӥз.
4Со сярысь калыкъёс кылӥзы;
гуысьтыз сое кутӥзы но жильыяса сое Египет музъеме нуизы.
5Мумы лев возьмаса улӥз, улӥз но мар луэмез адӟиз, осконэз быриз,
соку со мукетсэ левпизэ басьтӥз но
солэсь йыг-йыг пинал лев будэтӥз.
6Пинал лев луэм бераз со кутскиз левъёс пӧлтӥ ветлыны,
аслыз сиён кутылыны дышиз, адямиосты сиылӥз,
7соослэсь палкышнооссэс сапталляз,
городъёссэс тырттэм кельтылӥз;
солэн вузэмезлы чидатэк, музъем буш кылиз,
вань гуртъёс тырттэм кылизы.
8Соку бускель ёросъёсысь калыкъёс солы пумит ӝутскизы но
со вылэ казьзэс куштӥзы,
соослэн гуазы со шедиз.
9Сое, жильыен думылыса, корт четлыке пуктӥзы но
Вавилон эксэй доры нуизы;
Израиль гурезьёсын солэн куараез медаз ни кылӥськы шуыса,
сое изкар пушкы нуизы.
10Тынад анаед ву дуре мерттэм виноград модос кадь вал;
ву тырмыт вал бере, со емыш сётыса улӥз, уло-ваё будӥз.
11Кузёяськисьёслы эксэй боды лэсьтон понна
солэн юнэсь вал вайёсыз,
нап вайёс вискытӥ вылэ ӝутскиз солэн модосэз;
висъяське вал со аслаз ӝуждалаеныз, трос-трос вайёсыныз.
12Но вожпотон дыръя сое ишкалтыса музъем вылэ куштӥзы но,
шундыӝужан палась пельтӥсь тӧл солэсь емышсэ куасьтӥз;
коразы, куасьмизы солэн юнэсь вайёсыз, тыл соосты ньылӥз.
13Нош табере со луоё кыр дуннее,
вулы ӟудӥсь, кӧс музъеме мерттэмын.
14Вайёсызлэн модосысьтыз тыл потӥз, емышъёссэ тыл ньылӥз,
кузёяськисьлы эксэй боды лэсьтыны
солэн бордаз юнэсь вайёсыз ӧз ни кыльы”.
Та – бӧрдыса кырӟан, со бӧрдыса кырӟанлы пӧрмыса кылёз».
Глава 19