Выбрать язык
Книги Ветхого Завета
Книги Нового Завета
с русским текстом1Сизьыметӥ арын, витетӥ толэзьын, толэзьлэн дасэтӥ нуналаз, Израильлэн тӧроосыз пӧлысь воргоронъёс Кузё-Инмарлэсь визь-кенеш юаны лыктӥзы, мынам азям пуксизы.2Кузё-Инмар дорысь мыным верамын вал:
3«Адямилэн пиез! Израиль тӧроосын вераськы, соослы шу: ”Тазьы шуэ Инмар Кузё-Инмар: тӥ Мынэсьтым визь-кенеш юаны лыктӥды? Улӥсько Мон, тӥледлы ответ уг сёты, – шуэ Инмар Кузё-Инмар”.
4Соосын судэ пыремед потэ-а, адямилэн пиез, соосын судэ пыремед потэ-а? Атайёссылэсь юрӟым ужъёссэс соослы вера,5соослы шу: ”Тазьы шуэ Инмар Кузё-Инмар: Израилез быръён нуналам, киме ӝутыса, Иаковлэн выжыезлы кыл сётӥ, Аслэсьтым Кин луэмме Египет музъемысен соослы усьтӥ, киме ӝутыса, соослы шуи: ”Мон тӥляд Инмарды Кузё-Инмар”, –6со нуналэ, Аслэсьтым киме ӝутыса, соосты Египет музъемысь соослы чаклам Аслам музъемам, йӧлын чечыен бызись музъеме, вань музъемъёс пӧлысь чеберлыко интые, поттыны Мон кыл сётӥ.7Соослы шуи: ”Ваньды син азьысьтыды юрӟым макеосты палэнтэ, Египетлэн сульдэръёсыныз асьтэдыз эн сапталэ, Мон тӥляд Инмарды Кузё-Инмар!”8Нош соос Мыным пумит бугырскизы, Монэ кылзӥськемзы ӧз поты; нокин но син азьысьтыз юрӟымлыкез ӧз палэнты, Египетлэн сульдэръёсызлэсь ӧз палэнскы. Соку Мон шуи: ”Вожпотонме вылазы кисьто, Египет музъем шорын соос вылэ йыркурме палькко”.9Мукет калыкъёс пӧлын Мынам нимы ултӥямын медаз луы шуыса, Мон озьы ӧй лэсьты, уго со калыкъёс пӧлын израиль пиос уло вал, Египет музъемысь соосты поттон понна со калыкъёслэн син азязы Мон Аслэсьтым Кин луэмме израиль пиослы усьтӥ.
10Мон соосты Египет музъемысь поттӥ но луоё кыр дуннее вайи,11соослы Аслэсьтым курон-косонъёсме сётӥ, Аслэсьтым пуктон-косонъёсме соослы ялӥ, – соосты быдэсъяса, соос пыр адями кема мед улоз шуыса сётӥ, ялӥ.12Аслэсьтым субботаосме но соослы сётӥ, Мынам соосын кусып возёнэ паймымон тодмет мед луоз, Мон соосты дун-чылкыт карись Кузё-Инмар луисько шуыса мед тодозы.13Нош израиль калык кыр дуннеысен Мыным пумит бугырскиз – Мынам курон-косонъёсыя соос ӧз лэсьтэ, пуктон-косонъёсме палэнтӥзы, соосты быдэсъяса, адями соос пыр улэп луысал; Мынэсьтым субботаосме но ӧз уте, соку Мон шуи: ”Соосты быдтон вылысь кыр дуннеысен Аслэсьтым йыркурме соос вылэ кисьто”.14Но Мон Аслам нимы понна озьы ӧй лэсьты, калыкъёс пӧлын со ултӥямын медаз луы вал шуыса, со калыкъёслэн син азязы Мон соосты Египетысь поттӥ уго.
15Кыр дуннеысен, соослы пумит киме ӝутыса, Мон кыл сётӥ: соослы сётыны сӥзем Аслам музъемам, йӧлын чечыен бызись музъеме, вань музъемъёс пӧлысь чеберлыко интые, Мон соосты уг пырты,16Мынэсьтым пуктон-косонъёсме палэнтэмзы понна, Мынам курон-косонъёсыя улымтэзы понна, Мынэсьтым субботаосме утьымтэзы понна, уго соослэн сюлэмъёссы сульдэръёссы-идолъёссы пала кыстӥськылӥз.17Но соосты быдтыны Мон жаляй; кыр дуннеысен Мон соосты ӧй быдты.18Кыр дуннеысен соослэн пиоссылы Мон верай: ”Атайёстылэн тупатэм улонтӥзы эн ветлэ, соослэсь пуктон-косонъёссэс эн чаклалэ, асьтэдыз соослэн сульдэръёсынызы эн сапталэ.19Мон тӥляд Инмарды Кузё-Инмар: Мынам курон-косонъёсыя улэ, Мынэсьтым пуктон-косонъёсме чаклалэ-уте, соосты быдэсъялэ.20Дун-чылкыт уте Мынэсьтым субботаосме, Монэн тӥ куспын паймымон тодмет соос мед луозы, тӥ мед тододы: Мон тӥляд Инмарды Кузё-Инмар”.21Но пиоссы но Мыным пумит бугырскизы – Мынам курон-косонъёсыя ӧз улэ, пуктон-косонъёсме ӧз чаклалэ-уте; ӧз быдэсъялэ сое, мае быдэсъяса адями кема улэ; субботаосме санэ ӧз понылэ, соку Мон шуи: ”Кыр дуннеысен соос вылэ вожпотонме кисьто, соос вылэ йыркурме палькко”;22нош Мон Аслэсьтым киме палэнтӥ, Аслам нимы калыкъёс пӧлын ултӥямын медаз луы вал шуыса, озьы лэсьтӥ, со калыкъёслэн син азязы Мон соосты Египетысь поттӥ уго.
23Озьыен, кыр дуннеысен, киме ӝутыса, Мон кыл сётӥ: мукет калыкъёс пӧлы кизё, мурт музъемъёсы соосты пазьго,24малы ке шуоно соос пуктон-косонъёсме ӧз быдэсъялэ, курон-косонъёсме кулэтэм каризы, субботаосме ӧз уте, синъёсынызы атайёссылэн сульдэръёссы вылэ мыльккиськыса улӥзы.25Соку Мон но соослы умойтэм курон-косонъёс, улон сётӥсьтэм пуктон-косонъёс сётӥ.26Соосты куашкатон-таркан понна Мон соослы курбон сётонъёсынызы саптаськыны эрик сётӥ, куке соос тыл пыр нырысь вордскем вань пичи пиосты поттаны кутскизы, – мед тодозы, Мон – Кузё-Инмар”.
27Соин ик, адямилэн пиез, израиль калыклы вера, соослы шу: ”Тазьы шуэ Инмар Кузё-Инмар: тани, тӥляд атайёсты, Мыным пумит кескич амалъёсын вырыса, Монэ маин меда эшшо сантэмалозы на:28Мон соосты, киме ӝутыса, соослы сётыны сӥзем музъемам вайи, нош соос утчаськыса асьсэлы олокыӵе но ӝужытэсь мувыръёс, уло-ваё писпуос шедьтӥзы но кутскизы курбонъёссэс сётылыны, Мынэсьтым вожме поттӥсь саламъёссэс-кузьымъёссэс отчы вайылӥзы, ческыт зыно ӵындытонъёссэс отын ортчытъязы, кисьтоно курбон-саламъёссэс отчы кисьтылӥзы.29Мон соослы верай: ”Мар со сыӵе тӥляд ветлоно мувырды?” Соин ик со туннэ нуналозь Бама шуыса нимаське”.
30Соин ик израиль калыклы шу: ”Тазьы шуэ Инмар Кузё-Инмар: атайёстылэсь адӟем карыса тӥ асьтэдыз уд саптаське-а, соослэн юрӟым ужъёсын саптаськем пытьыоссы кузя ветлыса, азыса-калгыса уд улӥське-а?31Асьтэлэсь кузьымъёстэс-курбонъёстэс вайыса, пиостэс тыл вамен поттаса, тӥ асьтэдыз туннэ нуналозь вань сульдэръёсыныды саптаськоды, эшшо ке Мынэсьтым визь-кенеш курыны-басьтыны медӥськод, израиль калык? Улӥсько Мон, – шуэ Инмар Кузё-Инмар, – тӥледлы ответ уг сёты.
32Мар тӥляд визьмады лыктэ, чик уз быдэсмы. Тӥ шуиськоды: ”Язычникъёс музэн мурт шаеръёсысь выжыос кадь писпуослы, изъёслы ужаломы-йыбыртъяломы”.33Улӥсько Мон! – шуэ Инмар Кузё-Инмар, – кужмо киын, киосме вӧлъяса, йыркурме пальккаса, тӥледын Мон кузёяськыса уло.34Мукет калыкъёс пушкысь, пазьгиськыса улон шаеръёсысьтыды тӥледыз потто, кужмо киын, киосме вӧлъяса, йыркурме пальккаса, тӥледыз люкало.35Калыкъёслэн луоё кыр дуннеязы тӥледыз ваё но отысен ваче син вутто – тӥлесьтыд кылдэс юало.36Кызьы Мон тӥляд атайёсыныды Египет музъемлэн луоё кыр дуннеяз ваче вуи, озьы ик тӥледын но судэ пыро, – шуэ Инмар Кузё-Инмар.37Эксэй бодые ултӥ тӥледыз потто но сӥзён-косонлэн утиськонэзлы тӥледыз тэрытскись каро.38Тӥ пӧлысь бугыръяськисьёсты, Мыным тэрытскисьтэмъёсты висъяло. Улон-вылон музъемысьтызы соосты потто, но Израиль музъеме соос уз пыре, соку тӥ тододы, Мон – Кузё-Инмар.
39Нош тон, израиль калык, – тазьы шуэ Инмар Кузё-Инмар, – Монэ уд кылзӥськиське бере, мынэ, ваньды асьтэлэн сульдэръёсты доры но соослы йыбыртъяса улэ, нош Мынэсьтым дун-сьӧлыктэм нимме асьтэлэн кузьымъёсыныды-курбонъёсыныды, сульдэръёсыныды азьланяз эн ни сапталэ.40Уго Мынам святой гурезям, Израильлэн ӝужыт гурезь йылаз, – шуэ Инмар Кузё-Инмар, – отын вань израиль калык Мыным ужаса-тыршыса улоз, – ваньзы, кӧня муртсы улэ музъем вылын; отысен Мон соосты ӟеч мылкыдын Ас бордам каро но отысен саламъёстэс-кузьымъёстэс, нырысь кисьмам-вуэм емышъёстэс вань дун-чылкыт макеосыныды валче вайыны куро.41Тӥледыз мукет калыкъёс пӧлысь поттэм берам, пазьгиськыса улон шаеръёсысьтыды люкам берам ческыт зыно ӵындытонэз кадь тӥледыз кабыл басьто но калыкъёслэн син азязы тӥ пушкын дун-сьӧлыктэм луэмме возьмато.42Мон тӥледыз Израиль музъеме, киме ӝутыса, тӥляд атайёстылы сётыны сӥзем музъемам пыртыкум, тӥ тододы, Мон Кузё-Инмар шуыса.43Отысен асьтэлэн йӧнтэм улэм сюресъёстэс тодады ваёды, асьтэдыз сапталлям вань урод ужъёсты син азяды пуксёзы, соку тӥ вань лек ужъёсты лэсьтэмды понна асьтэлэсь асьтэос юрдоды.44Лекесь сюресъёсты понна, юрӟым ужъёсты понна ӧвӧл, Аслам нимы понна тӥледлы гажан-жалянме возьмато, соку тӥ, израиль калык, тододы, Мон Кузё-Инмар шуыса, – шуэ Инмар Кузё-Инмар”».
45Кузё-Инмар дорысь мыным верамын вал:46«Адямилэн пиез! Лымшор пала ымнырдэ берыкты но лымшор паллы пумит кылдэ вера, лымшор пал бусыысь нюлэслы азьпал адӟонзэ тодытыса вера.47Лымшор пал нюлэслы шу: ”Кузё-Инмарлэсь верамзэ кылзы; тазьы шуэ Инмар Кузё-Инмар: тани, Мон тынад пушкад тыл ӝуато, тон пушкысь вань вожектӥсь писпуэз, вань куасьмем писпуэз со тыл ньылоз; гомась тыл уз кысы, лымшорысен уйпалозь ваньмыз ӵушкамын луоз.48Котькудӥз лулмугор адӟоз, Мон – Кузё-Инмар – сое кенжытӥ бере, со уз ни кысы шуыса”».49Соку мон шуи: «Э, Инмаре Кузё-Инмаре! Соос Мон сярысь шуо: ”Мадёнъёс гинэ со уг вера меда?”»
Глава 20