Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь мыным верамын вал:2«Адямилэн пиез! Иерусалим пала берыктӥськыса, соослэн вӧсяськон интызылы пумит кыл вера, Израиль музъемлэсь азьпал адӟонзэ солы тодытыса вера,3Израиль музъемлы шу: ”Тазьы шуэ Инмар Кузё-Инмар: тани, Мон тыныд пумит султӥсько, меч тырон сепысысь мечме потто но шонер улӥсьтэ но, сьӧлыклэсь кышкасьтэмдэ но быдто.4Тон дорысь шонер улӥсез но, сьӧлыклэсь кышкасьтэмез но быдтон понна лымшорысен уйпалозь улӥсь вань лулмугор вылэ Мынам мече меч тыронысьтыз потоз.5Котькудӥз но лулмугор тодоз, Мон – Кузё-Инмар, меч тыронысьтыз мечме поттӥ, сое отчы берен уг ни поны”.6Нош тон, адямилэн пиез, аслэсьтыд макесъёстэ пыргытыкуд, викышъяса бӧрды, соослэн син азязы куректыса, викышъяса бӧрды.7Тыныд шуизы ке: ”Мар понна тон викышъяса бӧрдӥськод?” Тон шу:
”Лыктӥсь лек иворез кылыса”, соку ваньмызлэн сюлмыз куалектоз, суй-пыдзы юскиськоз, котькудӥз дух кынартэм кылёз, котькудӥзлэн пыдессинъёсыз ву кадь куалекъялозы. Со лыктӥз ке, ваньмыз быдэсмоз», – шуэ Инмар Кузё-Инмар.
8Кузё-Инмар дорысь мыным верамын вал:
9«Адямилэн пиез! Азьпалзэ тодытыса вера но тазьы шу:
”Тазьы шуэ Инмар Кузё-Инмар:
меч, меч лечыт шеремын, волятэмын шу;
10троссэгес коран понна со лечыт шеремын,
чилекъям кадь мед чилялоз шуыса, со волятэмын.
Мынам пиелэн эксэй бодыез вань писпуосты
синазькыль каре шуыса,
асьмелы шумпотоно-а?
11Мон сое волятыны сётӥ, кие басьтыны со дась мед луоз;
адями виисьлэн кияз сётон понна шеремын ни, сузямын ни та меч.
12Адямилэн пиез, лулӟылы, викышъяса бӧрды,
уго со Мынам калыке вылэ,
Израильлэн вань кивалтӥсьёсыз вылэ урдскоз;
Мынам калыкеным огазе соос меч улэ сётэмын луозы;
соин ик макес вылад чабкылы.
13Уго меч уж вылын эскеремын-чакламын ни.
Мар-о бен, эксэй бодыез но со синазькыль каре ке?
Соиз сылыны уз чида, – шуэ Инмар Кузё-Инмар”.
14Нош тон, адямилэн пиез, азьпалзэ тодытыса вера, киыныд чаб, –
кык пол йылоз меч, куинь пол но,
со – быдтоноос вылэ урдскись меч,
быдӟымез но быдтӥсь меч,
соослэн улон интызылэн пушказ пырись меч.
15Сюлэмъёс кышканы мед кутскозы,
пограмъёс тросгес мед луозы шуыса,
вань капкаоссы азе Мон кышкыт мечез пукто,
чилекъям кадь чилясьсэ,
коран-бышкан понна шеремзэ.
16Дасяськыса бурпала мын яке паллян пала мын, –
кудпала меч йылыд берытскоз сопала ик мын.
17Мон но киме чабко, Аслэсьтым йыркурме кисьтӥ ке, буйгатско;
Мон, Кузё-Инмар, шуи».
18Кузё-Инмар дорысь Мыным верамын вал:19«Тон, адямилэн пиез, аслыд кык сюрес пусйы, кудтӥз мыныны кулэ Вавилон эксэйлэн мечез, – кыкез но соос одӥг музъемысь потыны кулэ, та городъёсы мынӥсь сюресъёслэн кутсконазы кытчы мынонэз возьматӥсь пусъёс пукты.20Аммон пиослэн Равва каразы мечлэсь мынон сюрессэ пус вылын возьматы, Иудеяе, юнматэм Иерусалиме мынӥсь мечлэсь сюрессэ но пус пыр возьматы,21малы ке шуоно Вавилон эксэй сюрес воже кык сюресъёслэн кутсконазы тунаськыны дугдӥз: пукыӵ ньӧлъёсты сэзъя, терафимъёслэсь (сульдэръёслэсь) юалляське, мусэз чакласа учке.22Тунаськыкуз солэн бур кияз Иерусалиме сюрес возьматӥсь пус сюриз: отчы борддор куашкатъян машинаос пуктэмын луыны кулэ, ожмаськонэ ӧтись куараос кылӥськозы, куараос шуккиськозы; борддор куашкатъян машинаос капка доры ваемын луозы, мудэт ӝутэмын луоз, ожмаськон каланчаос пуктылозы.23Иерусалимын улӥсьёслэн син азязы та тунаськон ӧрекчаськон кадь потӥз; но соос кыл сётыса веразы бере, соослэсь та кескич ужзэс тодаз вайыса, Вавилон эксэй Иерусалимез киулаз басьтоно кариськиз.24Соин ик тазьы шуэ Инмар Кузё-Инмар: асьтэлэсь законлы пумит улэмдэс асьтэос тодам вайытӥськоды бере, асьтэлэсь йыружъёстэс шарае поттӥськоды, вань ужъёсады сьӧлыкъёсты вань шуыса возьматӥськоды, асьтэос ик соосты тодам вайытӥськоды бере, тӥ, пленэ кутыса, нуэмын луоды.
25Тон но, йӧнтэм адями, Израильлэн йыруж лэсьтӥсь кивалтӥсез,
табере тынад нуналэд,
сьӧлыклэсь кышкатэк улонэдлы пум понон дыр вуиз!
26Тазьы шуэ Инмар Кузё-Инмар: йырысьтыд кидар изьыдэ басьты,
эксэй изьыдэ но кушты: азьланяз тазьы уз ни луы;
ултӥямез ӝутӥськоз, вылӥ каремез ултӥямын луоз.
27Погырто, погырто, погырто, – солэн Кузёез лыктытозь, со уз ни луы; Мон сое Солэн киулаз сёто.28Тон, адямилэн пиез, азьпалзэ тодытон вераса шу: ”Тазьы шуэ Аммон пиос сярысь Инмар Кузё-Инмар, соослэн сантэмамзы сярысь”. Шу: ”Меч, меч кораськон понна поттэмын, виылон понна волятэмын, чилекъян кадь мед чилялоз, –29кызьы тыныд ӧвӧлтэм адӟонъёс веракузы ӧрекчаса тыныд тунакузы, тонэ сьӧлыклэсь кышкасьтэмъёслэн ӵогем йыръёсынызы огазе мед поноз, соослэн нуналзы вуоз, соослэн сьӧлыклэсь кышкатэк улонзылэн пумыз вуиз.
30Меч тырон сепысаз ик мечез берыктоно-а?
Со интыын, кытын тон кылдытэмын,
аслад вордскем музъем вылад Мон тонэ судить каро:
31тон вылэ йыркурме кисьто,
вожпотонлэн тылыныз тон шоры шокчо,
лек, виылыны быгатӥсь адямиослэн киулазы тонэ сёто.
32Тон тыллы сиён луод, вирыд музъем вылэ кылёз;
тонэ тодазы но уз вае, уго тае Мон, Кузё-Инмар, верай”».
Глава 21