Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь Мыным верамын вал:2«Тон, адямилэн пиез, судить карод-а, виро городэз судить карод-а? Солэсь вань юрӟым ужъёссэ солы аслыз вера.3Тазьы шу: ”Тазьы шуэ Инмар Кузё-Инмар: э, город, тынад дырыд мед вуоз шуыса, ас вылад вир киськаськод, астэ саптан понна ас дорад сульдэръёс лэсьтӥськод!4Вир кисьтыса, тон астэ янгышо карид, аслад лэсьтэм сульдэръёсыныд тон астэ саптад; нуналъёстэ матэ карид, ас арескад вуид. Со понна тонэ калыкъёслы серекъянлы пӧрмыто, вань музъемъёсын улӥсьёслы сантэманы сёто.5Матысьёс но, кыдёкысьёс но тонэ, аслэсьтыд нимдэ саптасез, бугыръяськон сямыныд данэ потэмез, куаретозы.6Тани, Израильлэн кивалтӥсьёсыз котькудӥз аслаз кужымезъя тон дорын вир кисьтыса улӥзы.7Тон дорын атаез, анаез урод кылын куарето, тон пӧлын лыктэм муртэз ӝоже уськыто, тон дорын анайтэм-атайтэм нылпиез, палкышноез ёртыса возё.8Мынэсьтым святыняосме тон санэ уд понӥськы, субботаосме уд утиськы.9Вир кисьтыны малпасьёс, кыл нуллыса ветлӥсьёс тон дорын уло – тынад гурезьёсад сульдэръёслы сётэм курбонъёсыз сиё, тон пушкын юрӟым сьӧлык лэсьто.10Тон дорын атайлэсь гольыксэ усьто, кышномуртэз чылкытатӥськон-сузяськон дыръяз тон дорын эриктэмало.11Одӥгез юрӟым сьӧлык лэсьтэ матысезлэн кышноеныз, мукетыз аслэсьтыз кензэ сапта, мукетыз аслэсьтыз сузэрзэ, атаезлэсь нылзэ, эриктэма.12Вир кисьтон понна тон дорын лушкемен кузьымъёс окто; тон мултэссэ табыш басьтон вылысь пунэмен сётӥськод, барыш басьтӥськод, матыседлэсь кужмысь кыскыса, аслыд узырлык люкаськод, нош Монэ вунэтӥд, – шуэ Инмар Кузё-Инмар.13Мон киосыным чабкиськи аслыд узырлык люканэд пумысен, тон дорын пумиськись вир кисьтон пумысен но.14Чидалоз-а сюлмыд, юнэсь луозы-а киосыд тынэсьтыд кылдэ юан нуналъёсам? Мон, Кузё-Инмар, мар ке верай, сое быдэсто.15Мукет калыкъёс пӧлы тонэ пазьго, мурт музъемъёсы тонэ кизё, тон пӧлын лэсьтӥськись юрӟым ужъёслы пум поно.16Калыкъёслэн син азязы астэ ачид синазькыль карод, соку тодод, Мон – Кузё-Инмар”».
17Кузё-Инмар дорысь мыным верамын вал:18«Адямилэн пиез! Израиль калык Мон азьын азвесьлэсь ӵыжатыса висъям сураськем-пожаськем люкетэзлы пӧрмиз; ваньзы соос – гурысь тӧдьы узвесь, ыргон, корт, узвесь; азвесьлэсь ӵыжатыса висъям сураськем-пожаськем пырыос кадесь луизы.19Соин ик тазьы шуэ Инмар Кузё-Инмар: ваньды тӥ сураськем-пожаськем пырыослы пӧрмиды бере, Мон тӥледыз Иерусалиме люкало.20Кызьы ӟырдатэм гуре огазе тыро азвесез но, ыргонэз но, кортэз но, узвесез но, тӧдьы узвесез но соос вылэ тылын пельтыса ӵыжатыны мед луоз шуыса; озьы Мон Аслам вожпотонэ дыръя, Аслам йыркуре ӝутскон дыръя люкало но гуре поно, ӵыжато тӥледыз.21Тӥледыз люкало но Аслэсьтым ӝуась вожпотонме тӥ вылэ тылын пельто, со пушкын ӵыжалоды.22Кызьы ӟырдатэм гурын азвесь ӵыжа, тӥ но озьы ик Иерусалим пушкын ӵыжалоды, тододы, Мон – Кузё-Инмар, Аслэсьтым йыркурме тӥ вылэ кисьтӥ шуыса».
23Кузё-Инмар дорысь мыным верамын вал:24«Адямилэн пиез! Вера солы: ”Тон сузямтэ-чылкытатымтэ, вожпоттон нуналэ зор вуэн киськамтэ музъем!”25Со пушкын пророкъёсызлэн огазеяськонзы – сиён мылессэ йырйись, бурсӥсь левлы со укша; лулъёсты сиё, ваньбурез, дуно арбериосты талало, кузпалтэк кылем кышноослэсь лыдзэс йылэто.26Священникъёсыз Мынэсьтым законме сӧрыло, Мынэсьтым дун-чылкыт арбериосме (святыняосме) саптало, дун-чылкыт луисез дун-чылкыт луымтэлэсь уг висъяло, чылкыт но кырсь макеос вискысь пӧртэмлыкез калыклы уг возьмато, субботаосме кулэтэм карылӥзы, Мон соос дорын ултӥямын.27Солэн кивалтӥсьёсыз сиён мылес лушкась кионъёс кадесь; асьсэлы барыш-ваньбур люкан понна вир кисьто, лулъёсты быдто.28Нош солэн пророкъёсыз ваньзэ избурен наштало, ӧвӧлтэмзэ адӟо, соослэн азьпал адӟонъёссы сярысь ӧрекчаськыса тазьы верало, соос шуо: ”Тазьы шуэ Инмар Кузё-Инмар”, – Кузё-Инмар тае ӧз ке но вера вал.29Нош калык пушкын огзэс огзы ултӥяло, талало, куанерез, кураськисез ӝикатыса возё, палэнысь лыктэм муртэ шонертэм ултӥяло.
30Соос пӧлысь борддор пуктыны мылкыд карись адямиез утчай, та музъемез Мон медам быдты шуыса Мынэсьтым курыны со борддорысь пась доры Мынам азям мед султысал, но сыӵе адямиез Мон ӧй шедьты.31Озьыен, Аслэсьтым вожпотонме соос вылэ кисьто, йыркурелэн тылыныз соосты быдто, сямъёссэс-выросъёссэс йыр вылазы берыкто», – шуэ Инмар Кузё-Инмар.
Глава 22