Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь мыным верамын вал:2«Адямилэн пиез! Вал кык кышномуртъёс, одӥг анайлэн нылъёсыз,3соос Египетын азыса-калгыса улӥзы, егит дыръязы азыса-калгыса улӥзы; отын нонокъёссы ныркиськизы, отын ныллык ноныоссэс сисьтӥзы.4Соослэн нимъёссы: бадӟымезлэн – Огола, нош сузэрезлэн – Оголива. Соос Мынамъёс луизы, пиос, нылъёс вордылӥзы; Огола Самария шуэм луэ, нош Оголива – со Иерусалим.5Огола, Мон бордысь куштӥськыса, азыса-калгыса улыны кутскиз, дусымъёсыз борды думиськиз, бускельёсыз, Ассирияысь пиос, борды лякиськиз,6чагыр буёло басмаен дӥсяськемъёсыз борды кариськиз, ёросъёсын, городъёсын кивалтӥсьёс борды кыстӥськиз, вань чебер пиос, буш вал вылын ветлӥсьёс вылэ мылкыдыз ӝуатскиз,7Ассурлэн вань быръем пиосыныз азыса-калгыса улӥз; мылкыдыныз соос борды думиськиз, соослэн вань сульдэръёсынызы ассэ сапталляз;8египет пиосын но калгемысь ӧз дугдылы, малы ке шуоно егит дыръяз соин соос кӧлаллязы но ныллык ноныоссэс сисьтылӥзы, лулмугорзылэсь ӝуатскем кулэ каронъёссэс со вылэ кисьтылӥзы.9Со понна Мон сое дусымъёсызлэн киулазы сётӥ, ассур пиослэн киулазы, кудъёсыз борды солэн мылкыдыз ӝуатскиз.10Соос солэсь гольыксэ кыре поттӥзы, солэсь пиоссэ, нылъёссэ басьтӥзы, нош ассэ мечен бышкалтыса виизы. Сое вием беразы, со нылкышноос пӧлын серекъян-веранлы пӧрмиз.
11Оголива, солэн сузэрез, тае адӟиз, но мугор кулэ каронэз ӝуатскем бере со эшшо но шимесгес луиз, апаезлэсь но ортчыт азыса-калгыса улыны кутскиз.12Со ассур пиос борды думиськиз, ёросъёсын, городъёсын кивалтӥсь туж чебер дӥсяськем бускельёсыз борды, буш вал вылын ветлӥсьёс борды, вань быръем-йӧно пиос борды биниськиз.13Но Мон адӟи солэсь ассэ саптамзэ, валай, соослэн кыксылэн но одӥг сюрессы шуыса.14Азыса-калгыса улыны эшшо но юнгес кутскиз, малы ке шуоно борддор бордысь вандылыса, буёлъёсын суредаса лэсьтэм халдей пиосмуртъёсты адӟиз,15соослэн кусъёссы путоен думемын вал, синмаськымонэсь вал йыразы понэм думетъёссы, тусбуйзы ожен кивалтӥсь кузёйыръёссылэн кадесь, Халдей музъемын вордскем Вавилон пиослы укшасесь,16одӥг пол учкыса, соослы со синмаськиз но Халдеяе соос доры адямиосты ыстӥз.17Погылляськон валесаз со доры Вавилонысь пиос лыктӥзы но азыса-калгыса улонэнызы сое саптазы, со ассэ соосын саптаз; соос бордысь солэн лулыз палэнскиз.18Нош куке со быдэсак азон-калгонэзлы сётӥськиз но аслэсьтыз гольыксэ кыре поттӥз, соку со бордысь но Мынам лулы палэнскиз солэн апаез бордысь Мынам лулылэн палэнскемез кадь ик.19Егит дырзэ, Египет музъемын азыса-калгыса улэмзэ тодаз вайыса, со эшшо но золгес азыса-калгыса улыны кутскиз,20дусымъёсыз борды думиськиз, соослэн лулмугорзы ишаклэн кадесь, мылкыд ӝуатсконзы ужпилэн кадесь уго.21Египетын дыръяд азыса-калгыса улэмдэ тодад вайид, куке Египет пиос ныллык нонокедлэсь ноныоссэ кырмаллязы.
22Соин ик, Оголива, тазьы шуэ Инмар Кузё-Инмар: тани, тон пумитэ дусымъёстэ узато, кудъёсыз бордысь тынад лулыд палэнскиз, вань палъёсысь соосты тон пумитэ ваё:23Вавилон пиосты, вань халдейёсты, Пеходысь, Шоаысь, Коаысь, соосын ӵош Ассурлэсь вань пиоссэ, чебер пиосты, ёросъёсын, городъёсын кивалтӥсьёсты, сано, нимо-дано муртъёсты, буш вал вылын вань усто ворттылӥсьёсты ваё.24Тон вылэ ожмаськон тӥрлыкен лыктозы, валъёсын, ожмаськон уробоосын, туж трос калык лыктоз, тонэ котыр ласянь корт дӥсьёсын, щитъёсын, корт изьыосын лыктыса котыртозы; тонэ соос киулэ судэ сёто, соос тонэ асьсэ законъёссыя судить карозы.25Вожпотонме тон вылэ кисьто, соос тыныд туж урод лэсьтозы: нырдэ но пельдэ вандозы, нош маид кылиз, соид меч улын быроз; тынэсьтыд пиостэ, нылъёстэ басьтозы, нош маид кылиз, сое тыл ньылоз;26вылысьтыд дӥськуттэ кылёзы, чеберъяськонъёстэ октозы.27Египетысь ваем азыса, калгыса улонэдлы пум поно, соос пала синъёстэ уд ни берыгъя, Египет сярысь тодад уд ни вайы.
28Уго тазьы шуэ Инмар Кузё-Инмар: тани, Мон тонэ адӟемпотостэм кароно муртъёсыдлэн киулазы сётӥсько, кинъёс бордысь тынад лулыд палэнскиз, соослэн киулазы сётӥсько.29Тыныд туж урод лэсьтозы, ужаса поттэм ваньбурдэ талалозы, гольык куен, дӥськуттэк кельтозы, возьыто интыед, калгыса, азыса улонэд кыре потоз.30Та тыныд калыкъёсын азыса улэмед понна лэсьтэмын луоз, соослэн сульдэръёсынызы тон астэ сапталляд уго.31Апаедлэн сюрестӥз тон ветлӥд; со понна ик солэсь чашазэ тынад кияд сёто.
32Тазьы шуэ Инмар Кузё-Инмар: аслад апаедлэсь мур, паськыт чашазэ юод, серекъян-веранэ, возьытэ вуттэмын луод, та чаша пушказ туж трос тэрытэ уго.33Кудӟонэн, куректон-кайгуэн пачылмыса улод: шимес улонлэн, тырттэм кылёнлэн чашаез – тынад Самария апаедлэн чашаез!34Отысь юод, чашазэ кӧсатод, сӧриськем чалепъёссэ нюлод, гадьёстэ кесялод, уго Мон тае верай, – шуэ Инмар Кузё-Инмар.35Соин ик тазьы шуэ Инмар Кузё-Инмар: тон Монэ вунэтӥд, Мынэсьтым палэнскид бере, законлы пумит улэмед понна, азыса-калгыса улэмед понна чида».
36Кузё-Инмар мыным шуиз: «Адямилэн пиез! Оголаен Оголиваез судить каремед потэ-а? Юрӟым-кырсь ужъёссэс соослы шара вера;37уго соос азыса, сьӧлыкаса улӥзы, киоссы вирен саптаськемын; сульдэръёсынызы азон сьӧлыке пыризы, Мыным вордэм пиоссэс тыл пыр поттылӥзы сульдэръёссылы сиёнлы сётон понна.38Эшшо тани мар соос Мыным лэсьтылӥзы: со нуналэ ик Мынэсьтым вӧсяськон интыме сапталлязы, субботаосме но сӧрылӥзы:39Малы ке шуоно соос сульдэръёссылы асьсэлэсь нылпиоссэс курбон сётылӥзы, но со нуналэ ик Мынам вӧсяськон интыям лыктылӥзы сое саптан понна: тӥни мар карылӥзы соос Мынам коркам!40Со сяна, кыдёкысь вуэм адямиос доры ыстылӥзы, соос доры муртъёсты ыстылӥзы, но тани, соос лыктылӥзы, соос понна тон мисьтӥськылӥд, сурьмаен синдэ буялляд, кильтырес дӥськут дӥсялляд,41шукырес валес вылэ пуксьылӥзы, соос азе сиён-юонэн ӝӧк пуктэмын вал, Мынэсьтым ческыт зыно ӵындытонъёсме, вӧйме тон ӝӧк вылэ пуктылӥд.42Со дорысь шулдыръяськись калыклэн куараез кылӥськылӥз, адями уллё пушкысь воргоронъёс пӧлы луоё кыр дуннеысь тордосъёсты пыртылӥзы; кышномуртъёслэн киосазы соос поскес тырылӥзы, йыр вылазы чебересь тугокоос понылӥзы.
43Соку Мон азыса улэменыз бызырмем-куасьмем сярысь шуи: ”Табере солэн азыса-калгыса улонэз асэныз валче быроз”.44Но со доры лыктылӥзы; кызьы ветло азыса-калгыса улӥсь кышномурт доры, озьы ветлӥзы Оголаен Оголива доры, юрӟым-кырсь кышномуртъёс доры.45Шонер улӥсь воргоронъёс соосты судить карозы; азыса улӥсь кышномуртъёсты кадь ик, вир кисьтӥсь кышномуртъёсты кадь ик соосты соос судить карозы, малы ке шуоно соос азыса улӥсь кышноос, соослэн киоссы вирен саптаськемын».
46Уго тазьы шуиз Инмар Кузё-Инмар: «Соослы пумит калыкез ӝутоно, соосты йыркуръяськыса, таласькыса улӥсьёслэн киулазы сётоно.47Калык соосты изъёсын зӥръяса виёз, мечъёсын коралоз, соослэсь пиоссэс, соослэсь нылъёссэс виёз, коркаоссэс тылын сутоз.48Та музъем вылын азыса улонлы пум поно, вань нылкышноос валатскозы но тӥ кадь юрӟым ужъёс уз лэсьтэ ни.49Азыса улэмды понна кылдэс юалозы, сульдэръёсыныды лэсьтэм сьӧлыкъёсты понна вӧсь каронэз чидано луоды. Соку тӥ тододы, Мон – Инмар Кузё-Инмар».
Глава 23