Выбрать язык
Книги Ветхого Завета
Книги Нового Завета
с русским текстом1Укмысэтӥ арын дасэтӥ толэзьлэн дасэтӥ нуналаз Кузё-Инмар дорысь мыным верамын вал:2«Адямилэн пиез! Та нуналлэсь нимзэ аслыд гожты, самой та нуналлэсь: самой та нуналэ Вавилонлэн эксэез Иерусалим доры вуоз.3Бугыръяськись калыклы мадён вера, солы шу:
”Тазьы шуэ Инмар Кузё-Инмар:
пурты пукты, пукты но отчы ву лэзь;
4сӥль юдэсъёсты отчы тыр,
вань ӟеч юдэсъёсты, макес, пуньылы бордысь,
бырйыса люкем лыосын сое тырмыты;
5быръем ыжъёсты басьты но пурты улысь лыосты кенжыты,
отысь лыосыз супыр-супыр пӧзьытозь пӧзьты.
6Соин ик тазьы шуэ Инмар Кузё-Инмар: куректон-кайгу вирен орсмем городлы! Куректон-кайгу курмем пуртылы, уго со бордысь курмемез уг ни быры! Юдэсэн, юдэсэн курмемзэ отысь куялэ, пус чӧлтыса, бырйыса эн улэ.7Уго солэн кисьтэм вирыныз город пуш саптамын; сое со гольык изгурезь вылэ кельтӥз; музъем вылэ сое ӧз киська, отын со тузонэн шобырскысал.8Пунэм берыктыны вожпотонме бугыртон понна солэсь вирзэ гольык изгурезь вылэ кельтӥ, со ватӥськыны медаз быгаты шуыса.
9Со понна ик тазьы шуэ Инмар Кузё-Инмар: куректон-кайгу вирен саптаськем городлы! Тылско – гомаса мед ӝуалоз.10Пудэ тросгес тыр, тыл пон, сӥльдэ супыр-супыр пӧзьты; ваньмыз мед напчоз, лыосыз ӝуаса мед бырозы.11Пурты бушаз ке, ӝуась эгыр вылэ сое пукты, мед аралоз, ыргонэз мед ӟырдалоз, со пушкын жобез мед ӵыжалоз, курмемез бордаз чик медаз ни кыльы.
12Уж секыт луоз; но таш-таш лякиськем курмемез со бордысь уз быры; тыл пушкын но солэн бордысьтыз курмемез уз быры.13Тынад жоб улонад сыӵе трос юрӟымез – кӧня-кӧня Мон тонэ уг сузяськы, тон ялан кырсь-жоб куен ик кылиськод; йыркурме тон вылэ кисьтыса буйгатскытозям, тон бӧрысь но кырседлэсь-жобедлэсь уд чылкыта.14Мон Кузё-Инмар, Мон шуисько: дыр вуоз, Мон малпам ужме быдэсто; Аслэсьтым малпанме уг вошты, уг жаля тонэ, пунэмзэ берыктытэк уг кельты. Улэм сюресъёсыдъя, ужъёсыдъя тонэ судить карозы, – шуэ Инмар Кузё-Инмар”».
15Кузё-Инмар дорысь мыным верамын вал:16«Адямилэн пиез! Тани Мон, тон доры висён-курадӟон лэзьыса, тынад син азьысьтыд шумпотондэ басьто; но тон эн ӝожтӥськы, эн бӧрды, синвуосыд медаз потэ.17Лушкемен лулӟиськылы, кулэмъёс пумысен бӧрдон сямез эн ортчыты; кымесад йыркерттэт дум, пыддэ кутча, туштэ эн ват, муртлэсь ваем няньзэ эн сиы».18Ӵукна мон калыкен оскон пумысен вераськыса улӥ, нош ӝытазе мынам кышное кулӥз, ӵуказеяз нуналэ мон лэсьтӥ озьы, кызьы мыным косэмын вал.19Калык мыным шуиз: «Уд вера-а милемлы, тазьы лэсьтыса тон милемлы мае тодытыны турттӥськод?»
20Мон соослы шуи: «Кузё-Инмар дорысь мыным верамын вал:21Израиль калыклы вера: ”Тазьы шуэ Инмар Кузё-Инмар: тани, Аслэсьтым вӧсяськон интыме – тӥлесьтыд данъяськондэс, син азьдылэсь буйгатсконзэ, лулдылэсь шумпотонзэ – сантэманы сёто, нош Иерусалиме кельтэм пиосты, нылъёсты меч улын бырозы.22Тӥ но сое ик лэсьтоды, мае мон лэсьтӥ; тушъёстэс уд ватэ, муртлэсь ваем няньзэ уд сие;23йыр керттэтъёсты кымес вылады думемын луозы, пыдкутчанды пыдъёсады кутчамын луоз; уд ӝожтӥське, уд бӧрдэлэ, но сьӧлыкъёсты понна куасьмоды, огды азьын огды лулӟиськылоды.24Иезекииль тӥ понна паймымон тодмет луоз: ваньзэ, мае со лэсьтӥз, тӥ но лэсьтоды; та быдэсмем бере тододы, Мон – Инмар Кузё-Инмар”.
25Нош тыныд верано ке, адямилэн пиез, соослэн данъяськонзылэсь чеберлыксэ, син азьзылэсь буйгатсконзэ, лулзылэсь шумпотонзэ, пиоссэс, нылъёссэс басьтон нуналам, –26тон доры улэп кылем мурт лыктоз но тынад пеляд ивор вуттоз.27Со нуналэ улэп кылем мурт азьын кылыд-ымыд усьтӥськоз но, тон вераськыны кутскод, кылтэм-ымтэм уд ни улы, соос понна тон паймымон тодмет луод, соку соос тодозы, Мон – Кузё-Инмар».
Глава 24