Выбрать язык
Книги Ветхого Завета
Книги Нового Завета
с русским текстом1Дас одӥгетӥ арын нырысетӥ толэзьлэн нырысетӥ нуналаз Кузё-Инмар дорысь мыным верамын вал:2«Адямилэн пиез! Иерусалим сярысь Тир шуэ: ”А-а! Со – калыкъёслэн капказы – куашкатэмын; ваньмыз мынам киулам сюремын! Мон сяськаясько, нош со быдэсак таркамын-куашкатэмын!”3Тазьы шуэ Инмар Кузё-Инмар: ”Тани, со понна Мон тыныд пумит султӥсько, Тир, тыныд пумит трос калыкъёсты ӝуто, кызьы зарезь ӝутэ аслэсьтыз тулкымъёссэ, озьы соосты ӝуто.4Соос Тирлэсь борддоръёссэ куашкатозы, каланчаоссэ погыртозы; солэн пушкысьтыз сюйзэ ӵужыса потто, гольык изгурезьлы сое пӧрмыто.5Зарезь шорын калтон куасьтон интылы со пӧрмоз; уго Мон тае верай, – шуэ Инмар Кузё-Инмар: калыкъёс сое таркалозы.6Нош солэн музъем вылысьтыз нылъёссэ мечен виылозы, соку соос тодозы, Мон – Кузё-Инмар”.
7Тазьы шуэ Инмар Кузё-Инмар: ”Тани, уйпалась Навуходоносорез, Вавилонлэсь эксэйзэ, эксэйёс пӧлысь эксэез, валъёсын, ожмаськон уробоосын, буш вал вылын мынӥсьёсты, армиен, туж трос калыкен ӵош Тирлы пумит ожмаськыны ваё.8Музъем вылысь тынэсьтыд нылъёстэ со мечен виылоз, тыныд пумит ожмаськон каланчаос пуктоз, тыныд пумит сюй мудэт ӝутоз, тыныд пумит щитъёс пуктоз;9тынад борддоръёсыд вӧзы со борддорез куашкатъясь машинаос пуктоз, из коран тӥръёсыныз каланчаостэ куашкатоз.10Солэн валъёсыз улысь ӝутскем тузон тонэ шобыртоз; вал вылын мынӥсьёслэн, питран-поглянъёслэн, ожмаськон уробоослэн куараоссы шуккиськыку, борддоръёсыд зуркалозы, куашкатэм городэ пырись кадь со тынад капкаосад пыроз.11Валъёсыз вань ульчаосыд кузя ворттылыса ветлозы, калыктэ мечен коралоз, кужымлыктэ возьматӥсь синпелетъёсты (памятникъёсты) музъем вылэ сэрпалтоз.12Узырлыктэ таркалозы, вузъёстэ лушкалозы, борддоръёстэ куашкатозы, чебересь коркаостэ сузмытылозы, изъёстэ но, коръёстэ но, сюйдэ но вуэ куялозы.13Кырӟамысь дугдыто, цитр шудонлэн куараез уз ни кылӥськы.14Тонэ гольык изгурезь каро, калтонъёсты куасьтон интылы пӧрмод; выльысен тон пуктэмын уд ни луы, уго тае верай Мон Кузё-Инмар”, – шуэ Инмар Кузё-Инмар.
15Инмар Кузё-Инмар Тирлы тазьы шуэ: ”Тон пушкын виылон-погыръян ортчыку, Тынад усем куараедлы, яраё каремъёслэн ӝуштэмзылы чидатэк, шормуӵъёсты уз куалектэ-а?16Зарезьлэн вань эксэйёсыз пукон вылысьтызы султозы но асьсэ вылысь мантиязэс куштозы, пужыятэм дӥськутсэс вылысьтызы куштозы, дыр-р куалекъянэн шобырскозы, музъем вылэ пуксёзы но ялан куалекъяса улозы, тон пумысен паймыса улозы.17Тон пумысен кыласа-бураса бӧрдыны кутскозы, тыныд шуозы:
”Зарезь вылтӥ уясьёслэн улон интызы,
нимо-дано город, кызьы тон бырид?
Тон ачид, улӥсьёсыд но зарезь вылын кивалтыса улӥды,
ярдурын вань улӥсьёсты куалекъятыса возиды!
18Туннэ, тынад усён нуналад, шормуӵъёс куалектӥзы;
тынад быременыд сэрен зарезьысь шормуӵъёс
куалекъян калэ вуттэмын”.
19Уго тазьы шуэ Инмар Кузё-Инмар: ”Мон тонэ улӥсьтэм городъёсты кадь тырттэм городлы пӧрмытӥ ке, тон вылэ бугыръяськись тулкымъёсты ӝутӥ ке, бадӟым вуос тонэ шобыртӥзы ке,20соку тонэ кемалась улэм калык доры шайгуэ пырисьёсын ӵош васькыто, музъемлэн пыдэсаз, пумтэм дауръёслэн кыр дуннеязы, шайгуэ васькисьёсын огазе тонэ интыяло, азьланяз тон пушкын улӥсьёс медаз ни луэ; улэпъёслэн музъем вылазы данлыкез Мон возьмато.21Кышкатон макелы Мон тонэ пӧрмыто, тон ышод-бырод, тонэ утчалозы но пумтэм вапумъёс ӵоже уз ни шедьтэ”, – шуэ Инмар Кузё-Инмар».
Глава 26