Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь мыным верамын вал:
2«Адями пи! Тир карлэн кивалтӥсь йырызлы шу:
тазьы шуэ Инмар Кузё-Инмар:
сюлмыныд вылтӥяськыны но тазьы вераськыны кутскемед понна:
”Мон – инмар, зарезьёслэн шоразы инмарлэн пукон вылаз пукси”,
нош тон адями гинэ ук, Инмар ӧвӧл,
аслэсьтыд визьдэ Инмарлэн визьмыныз оградэ пуктӥськод, –
3тани, тон Данииллэсь визьмогес,
нокыӵе но лушкемлык тынэсьтыд ватӥськемын ӧвӧл.
4Аслад визьлыкеныд, аслад визьмыныд тон аслыд узырлык люкад,
узырлык возён шыкысъёсад тон зарни, азвесь люкад.
5Аслад бадӟым визьлыкеныд, вузкаронэныд узырлыктэ йылэтӥд,
узырлыкед трос луэмен, визьмыныд-сюлмыныд тон
вылтӥяськыны кутскид.
6Со понна Инмар Кузё-Инмар тазьы шуэ:
аслэсьтыд визьдэ Инмарлэн визьмыныз оградэ пуктӥськод бере,
7тани, тон вылэ вань мурт калыкъёс пӧлысь
самой лексэ калыкез ысто,
тынад визьлыкедлэн чеберезлы пумит соос мечъёссэс ӝутозы но
тынэсьтыд пиштӥсь чебер данлыктэ сапталозы.
8Шайгуэ тонэ вуттозы,
вием муртъёслэн адӟон эзеленызы зарезьёслэн пыдэсазы
тон кулод-бырод.
9Соку виисед азьын тон ачид сярысь тазьы шуод на-а:
”мон – инмар”?
Тонэ виисьлэн киулаз тон адями ук, инмар ӧвӧл.
10Вандӥськымтэослэн эзеленызы тон кулод,
мурт кунысь вуэмъёс тонэ виёзы;
уго тае Мон тыныд верай», – шуэ Инмар Кузё-Инмар.
11Кузё-Инмар дорысь мыным верамын вал:
12«Адями пи! Тирлэн эксэез пумысен кыласа-бураса
бӧрдыны кутскы но тазьы шу солы:
”Тазьы шуэ Инмар Кузё-Инмар:
тон быдэсмонлэн печатез, визьлыклэн тыр луонэз,
чеберлыклэн вылӥ чеберлыкез.
13Едемын, Инмарлэн садаз, тон улӥд;
тынад дӥськутэд олокыӵе но дуно изъёсын чеберъямын вал:
рубин, топаз, алмаз, хризолит, оникс, яспис, сапфир,
карбункул но изумруд,
зарни – ваньмыз быгатыса пасьёсаз пуктылэмын,
тынад вылад бырттылэмын вал, тынад кылдон нуналад
соос дасямын вал.
14Тон шобыртыса возись, вӧйын зырӟем Херувим вал,
со понна Мон тонэ пуктӥ;
Инмарлэн святой гурезяз тон улӥд,
тылын ӝуась изъёс пӧлтӥ ветлӥд.
15Тонэ кылдытэм дырысен,
законлы пумит улэмед шарае потытозь,
тон дун-шектэм адскиськод вал.
16Котыр дуннеен вузкарыса улэменыд сэрен
тон пӧяськон пӧлы выйид, тон сьӧлыкад;
кырсь макеез кадь Мон тонэ Инмарлэн гурезьысьтыз сэрпалтӥ,
ӝуаса улӥсь изъёс пӧлысь тонэ, шобыртыса возись Херувимез,
улляй.
17Чебередлы луыса сюлмыд вылтӥяськыны кутскиз,
ушъям-данъямез яратэменыд, аслэсьтыд визьлыктэ быдтӥд;
со понна Мон тонэ музъем вылэ кушто,
эксэйёслы сантэманы тонэ сёто.
18Законлы пумит трос урод ужъёс лэсьтэменыд,
ӧрекчаськыса вузкаременыд, тон саптад вӧсяськон интыостэ;
пушкысьтыд тыл потто, со тонэ ньылоз:
тонэ адӟыса улӥсьёслэн ваньзылэн син азязы Мон тонэ
музъем вылысь пеньлы пӧрмыто.
19Калыкъёс пӧлысь кинъёс тонэ тодо, ваньзы соос,
тонэн мар луэмез адӟыса, куалектозы;
тон кышкатон макелы пӧрмод,
пумтэм вапумъёс ӵожелы тон ышод-бырод”».
20Кузё-Инмар дорысь мыным верамын вал:
21«Адями пи! Сӥдон пала ымнырдэ берыкты но
солэсь азьпал адӟонзэ солы тодытыса вера,
22шу: ”Тазьы шуэ Инмар Кузё-Инмар:
Сӥдон, тани, Мон тыныд пумит султӥсько, тон пыр данэ пото,
сое судить карыкум,
со бордын Аслэсьтым дун-сьӧлыктэм луэмме возьматыкум,
тодозы, Мон – Кузё-Инмар.
23Со вылэ сьӧдчер лэзё, ульчаосаз вир кисьтӥськыса улоз;
Сӥдон пушкын улӥсьёс корась меч улэ погралозы,
котыр ласянь соосты меч погыръялоз,
соку соос тодозы, Мон – Кузё-Инмар.
24Азьланяз израиль калыклы со бышкись венё будос, шиеныз вӧсь карись кыйбоды уз ни луы, вань бускельёсыз пӧлысь солы урод малпасез уз ни кыльы, соку тодозы, Мон – Инмар Кузё-Инмар.25Тазьы шуэ Инмар Кузё-Инмар: мурт калыкъёс пӧлы пазьгиськыса улыны лэзем израиль калыкез огазе люкало но улы-выжыос азьын Аслэсьтым дун-сьӧлыктэм луэмме соос бордын возьмато; Иаков ляльчиелы сётэм ас музъемазы соос улозы.26Соку соос кышкатэк отын улыны быгатозы ни, коркаос пуктылозы, виноград мерттозы, кышкатэк улозы, уго соослэн котырысьтызы вань урод малпасьёслы суд лэсьто, соку тодозы, Мон – Инмар Кузё-Инмар”».
Глава 28