Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь мыным верамын вал:2«Адями пи! Магог музъемысь Гог пала, Рошлэн, Мешехлэн, Фуваллэн эксэез пала, ымнырдэ берыкты но солэн азьпал адӟонэз сярысь тодытыса вера,3солы шу: ”Тазьы шуэ Инмар Кузё-Инмар: тани, Гог, Рошлэн, Мешехлэн, Фуваллэн эксэез, Мон тыныд пумит султӥсько!4Тонэ берыкто но ымдэ кортнало; тонэ, быдэс армидэ потто, валъёстэ, вал вылын ветлӥсьёстэ вань ожмаськон тӥрлыкенызы валче потто, корт дӥсянэн, щитъёсын, мечъёсын ожмаськись бадӟым уллёдэ, –5соосын ӵош персъёсты, эфиопъёсты, Ливиын улӥсьёсты ваньзэс щит кутэмъёсты, корт изьы изьыямъёсты,6Гомерез вань отрядъёсыныз ӵош, уйпал шаерлэн пумысьтыз Фогарма выжыез вань отрядъёсыныз огазьын, трос калыкъёсты тонэн ӵош потто.7Дасяськы, ожмаськон тӥрлык-дӥськут дася тон но, тон доры люкаськем вань ожмаськись уллёед но; соослы кивалтӥсь лу.8Трос нуналъёс ортчем бере тон кулэ луод: берпум аръёсы меч улысь мозмытэм музъем вылэ, Израиль гурезьёсы, тон лыктод, отчы трос калыкъёс пӧлысь калык люкамын луоз, кема дыр ӵоже со тырттэм-буш кыллем инты вал, нош табере солэн улӥсьёсыз калыкъёс пӧлысь берыктэмын, ваньзы соос кышкатэк, каньыл мылкыдын уло.9Сильтӧл кадь ӝутскод но пилем кадь музъемез шобыртыны мынод, тон но, тынад вань адями уллёед но, трос калыкъёс но тонэн ӵош мынозы.
10Тазьы шуэ Инмар Кузё-Инмар: со нуналэ тынад сюлмад малпанъёс лыктозы, соку тон урод-лек уж лэсьтыны малпаса шуод:11”Борддорен котыртымтэ музъем вылэ ӝутско но сюлмаськытэк, каньылэн-кышкатэк улӥсьёс вылэ мыно, – ваньзы соос борддорен котыртымтэ интыын уло, тунгонъёссы но, ӧсъёссы но соослэн ӧвӧл, –12таланы, аслым люкет бичаны мыно, азьвыл куашкатэм, нош али трос адямиосын пачылмем городъёс вылэ мыно, калыкъёс пӧлысь люкам калык вылэ киме ӝутыны мыно, соос ваньбур люкало, вузкаро, музъемлэн гогы вылаз соос уло”.13Сава но Дедан, Фарсисысь вузчиос вань пинал левпиосынызы ӵош тыныд шуозы: ”Тон таласькыны-а лыктӥд, пумтэм трос калыктэ аслыд ваньбур люкатыны вайид-а, зарни, азвесь капыръяны, пудо-животсэс, ваньбурзэс таланы, аслыд бадӟым узырлык киултыны-а лыктӥд?”
14Соин ик, адямилэн пиез, азьпалзэ тодытыса вера, Гоглы шу: ”Тазьы шуэ Инмар Кузё-Инмар: озьы ӧвӧл-а? Со нуналэ, Мынам израиль калыкелэсь кышкатэк, каньылэн улыны кутскемзэ тон тодод,15соку тон ас интыысьтыд, уйпал шаерлэн пумысьтыз, потыса лыктод – тон но, тонэн ӵош трос калыкъёс но, ваньзы вал вылын пукисьёс, туж бадӟым уллё, туж трос ожгарчиос.16Мынам израиль калыке вылэ тон, пилем кадь, музъемез шобыртон вылысь ӝутӥськод; берпум аръёсы тазьы луоз, тонэ Ас музъем вылам ваё, мукет калыкъёс но Монэ мед тодозы шуыса, тон вылын, Гог, Мон Аслэсьтым дун-сьӧлыктэм луэмме соослэн син азязы возьмато.
17Тазьы шуэ Инмар Кузё-Инмар: тон самой со ӧвӧл-а, кин сярысь Мон вашкала аръёсы Аслам ляльчиосы пыр, Израильлэн пророкъёсыз пыр, верай вал, соос со аръёсы азьпалзэ тодытыса, Мон тонэ Израиль вылэ ваё шуыса веразы.18Гоглэн Израиль музъем вылэ лыктон нуналаз, – шуэ Инмар Кузё-Инмар, – вожпотонэ йыркурен ӝуатскоз.19Йыркуре, вожпотонэ ӝуатскон дыръя Мон шуи: ”Зэм ик со нуналэ Израиль музъемын туж кужмо музъем зуркалоз”.20Мон азьын зарезь чорыгъёс, ин тылобурдоос, луд пӧйшуръёс, музъем вылтӥ вань нюж, гыж кыстӥськыса ветлӥсьёс, вань адямиос – ваньзы музъем вылын улӥсьёс дыр-р куалекъялозы, гурезьёс куашкалозы, из люкъёс усьылозы, вань борддоръёс музъем вылэ погралозы.21Вань гурезьёсам, солы пумит меч кутытыса, ожгарчиосты ваё, – шуэ Инмар Кузё-Инмар, – котькуд адямилэн мечез братэзлы пумит ӝутскоз.22Сое судить каро, вылаз сьӧдчер лэзё, вир кисьтыто, со вылэ, солэн ожгарчиосыз вылэ, соин ӵош улӥсь трос калыкъёс вылэ туж кужмо зор кисьто, вылазы из зор, тылэн ӵуждари кисьто.23Мон Аслэсьтым быдӟымлыкме, дун-сьӧлыктэм луэмме тодыто, трос калыкъёслэн син азязы Асме возьмато, соку тодозы, Мон – Кузё-Инмар”».
Глава 38