Выбрать язык
Книги Ветхого Завета
Книги Нового Завета
с русским текстом1Мон вылын Кузё-Инмарлэн киыз вал, духен тыр луыкум, Кузё-Инмар монэ поттыса бусы шоры султытӥз, – отын пачылаз лыос вал, –2монэ соос котыртӥ нуиз, му вылын туж трос лыос кыллё, соос туж куасьмемын ни вал.3Мыным шуиз: «Адями пи! Та лыос улӟозы на-а?» Мон шуи: «Инмаре Кузё-Инмаре! Тон Ачид тодӥськод».4Мыным шуиз: «Та лыос пумысен азьпалзэ тодытыса вера, тазьы шу: ”Куасьмем лыос! Кузё-Инмарлэсь верам кылзэ кылзэ!”5Та лыослы тазьы шуэ Инмар Кузё-Инмар: ”Тани тӥ пушкы Мон лул пырто но, тӥ улӟоды.6Тӥледыз сӥнырен котырто, вылады сӥль-мугор будэто, вылдэс куэн шобырто, пушкады лул пырто – соку улӟоды но тододы, Мон – Кузё-Инмар”».
7Мон азьпалзэ тодыса верай, кызьы мыным косэмын вал; азьпалзэ тодытыса веракум, кужмо куара шуккиськиз, тани, зурканы-вырӟыны кутскиз, лыос ог-огзылы матэ кариськыны кутскизы – лы борды лы.8Мон адӟи: тани вылазы сӥнырез вань, сӥль-мугор будэм, вылтӥзы ку кыстӥськем, нош пушказы лулыз ӧвӧл.
9Соку Со мыным шуиз: «Духлы азьпалзэ тодытыса вера, азьпалзэ тодытыса вера, адямилэн пиез, Духлы шу: ”Тазьы шуэ Инмар Кузё-Инмар: Дух, тӧллэн ньыль пал пумысьтыз лыктыса, та виемъёс вылэ шокчы – соос улӟозы”».10Мон азьпалзэ тодытыса верай, кызьы Со мыным косӥз, соку соос пушкы лул пыриз, соос улӟизы, пыд вылазы султӥзы – туж-туж трос адями уллё султӥз.
11Соку Кузё-Инмар мыным шуиз:
«Адями пи! Та лыос – быдэс израиль калык.
Тани, соос шуо: ”Куасьмизы милям лыосмы,
быриз милям оскиськонмы:
ми выжытэм быдтэмын”.
12Соин ик азьпалзэ тодытыса вера, соослы шу: ”Тазьы шуэ Инмар Кузё-Инмар: тани, Мон шайгуостэс усьто но тӥледыз шайгуосысьтыды потто, Мынам калыке, Израиль музъеме тӥледыз пырто.13Шайгуостэс усьтыса, шайгуосысьтыды тӥледыз поттӥ ке, Мынам калыке, соку тододы, Мон – Кузё-Инмар.14Пушкады Аслэсьтым духме поно, соку тӥ улӟоды. Тӥледыз ас музъемады интыяло, соку тододы, тае Мон, Кузё-Инмар, верай шуыса, верай но – лэсьтӥ”», – шуэ Кузё-Инмар.
15Кузё-Инмар дорысь мыным верамын вал:16«Нош тон, адямилэн пиез, кияд боды кут но со вылэ тазьы гожты: ”Иудалы но соин ӵош огазеяськем Израиль пиослы”; эшшо боды но кияд кут но со вылэ тазьы гожты: ”Иосифлы” – та Ефремлэн но соин ӵош огазе кариськем быдэс израиль калыклэн бодыез.17Соосты кыксэс огазея, тынад кияд одӥг боды кадь медло.18Тынад калыкедлэн пиосыз тынэсьтыд тазьы юазы ке: ”Уд валэкты-а милемлы, мар со сыӵе тынад кияд возиське?”19Соку тон соослы шу: ”Тазьы шуэ Инмар Кузё-Инмар: тани, Мон Ефремлэн, соин ӵош огазе кариськем Израиль выжыослэн киысьтызы Иосифлэсь бодызэ басьто но сое Иудалэн бодыеныз огазе каро, соосты одӥг боды каро, соку соос Мынам киям одӥг луозы”.
20Вылазы гожъяно кыкез но бодыосыд соослэн син азязы тынад кияд луозы,21соку тон соослы шу: ”Тазьы шуэ Инмар Кузё-Инмар: тани, мурт калыкъёс пӧлын улӥсь израиль пиосты Мон мурт калыкъёс пушкысь басьто, вань интыосысь соосты огазе люкало но соосты ас музъемазы ваё.22Та музъемын, Израиль гурезьёсын, Мон соосты одӥг калык каро, соослэн ваньзылэн одӥг эксэйзы луоз, азьланяз соос кык калык уз ни луэ, кык эксэйлыкъёслы но уз ни люкиське.23Асьсэлэн сульдэръёсынызы-идолъёсынызы, юрӟым-кырсь макеосынызы, олокыӵе ярантэм ужъёсынызы асьсэзыз уз ни сапталэ; сьӧлыкаса улэм вань интыосысьтызы соосты поттыса сузяло. Соос Мынам калыке луозы, нош Мон соослэн Инмарзы луо.24Мынам ляльчие, Давид, соослы Эксэй луоз, ваньзылэн соослэн Возьмасьсы луоз, соос Мынам курон-косонъёсыя улозы, пуктон-косонъёсме чакласа, быдэсъяса улозы.25Аслам ляльчиелы, Иаковлы, сётэм музъемам улозы, отын соослэн атайёссы улӥзы; соос отын улозы, соослэн нылпиоссы, нылпиоссылэн нылпиоссы пумтэм вапумъёс ӵоже отын улозы; Мынам ляльчие, Давид, пумтэм вапумъёс ӵоже соослы эксэй луоз.26Сӥзён-косон пыр соосын тупаса улон кусып кылдыто, соосын сӥзён-косон пыр кылдытэм кусыпе пумтэм вапумъёс ӵоже возиськоз. Соосты интыяло, йылэто, соос пӧлын пумтэм вапумъёс ӵоже мед возиськоз шуыса, вӧсяськон интыме пукто.27Мынам улон интые соос дорын луоз, Мон соослэн Инмарзы луо, нош соос Мынам калыке луозы.28Мынам вӧсяськон интые соос пӧлын пумтэм вапумъёс ӵоже улоз. Мон Израилез дун-чылкыт карись Кузё-Инмар луисько шуыса, соку калыкъёс тодозы”».
Глава 37