Выбрать язык
Книги Ветхого Завета
Книги Нового Завета
с русским текстом1«Тон, адямилэн пиез, Израиль гурезьёс сярысь азьпалзэ тодытыса вера но шу: ”Израиль гурезьёс! Кузё-Инмарлэсь верам кылзэ кылзэлэ.2Тазьы шуэ Инмар Кузё-Инмар: тушмон тӥ сярысь тазьы шуэ бере: ”А-а! Пумтэм вапумъёс сылӥсь гурезь йылъёс милемлы люкетлы сюризы”,3азьпалзэ тодытыса вера но шу: ”Тазьы шуэ Инмар Кузё-Инмар: тӥледыз таркамзы, котыр ласянь тӥледыз ньылэмзы понна, тӥледыз мурт калыкъёслы люкетлы, серекъян-веран, ултӥян киулэ сётыны тыршемзы понна, –4со понна, Израиль гурезьёс, кылзэлэ Инмарлэсь Кузё-Инмарлэсь верам кылзэ: тазьы шуэ Инмар Кузё-Инмар гурезьёслы, вырйылъёслы, уркыремъёслы, нёжалъёслы, тырттэм кылем куашкам юртъёслы, буш кылем городъёслы, соос артысь калыкъёс понна ваньбур люкан инты луизы, серекъян-веранлы пӧрмизы.5Со понна Инмар Кузё-Инмар шуэ: вожпотонэ ӝуатскон дыръя Мон кылме верай мукет калыкъёс вылэ, быдэс Идумея вылэ, соос уго Мынэсьтым музъемме ас киулазы басьтӥзы, сюлмынызы шумпотыса, лулынызы синазькыль карыса, сое асьсэлы ваньбур люкан интылы пӧрмытӥзы”.
6Соин ик Израиль музъем сярысь азьпалзэ тодытыса вера но гурезьёслы, вырйылъёслы, уркыремъёслы, нёжалъёслы тазьы шу: ”Тазьы шуэ Инмар Кузё-Инмар: тани, тае Мон вожпотонэ ӝуатскыку, йыры кур луон дыръя верай, малы ке шуоно мурт калыкъёслэсь серекъям-верамзэс чидано луиськоды.
7Соин ик тазьы шуэ Инмар Кузё-Инмар: кыл сётыса, киме ӝутыса, Мон тазьы шуи: ”Тӥ котырын улӥсь калыкъёс асьсэлэсь возьытэ усёнзэс асьсэ вылазы нуозы”.8Нош тӥ, Израиль гурезьёс, вайёстэс лэзе но Мынам Израиль калыкелы емыштэс будэтэ; соос ӝоген лыктозы уго.9Уго тани, Мон тӥ пала берытско но тӥледыз гырозы-утялтозы, кизёзы.10Тӥ вылэ трос адямиосты, быдэс израиль калыкез, ваньзэсты улыны интыяло, городъёсады улыны интыяськозы, куашкатъям юртъёстэс выльысен ӝутозы.11Тӥ вылын улыны адямиосты, пудоосты трослы йылэто, соос пиялозы, йылозы; азьвыл кадь ик тӥ дорын трос-трос улӥсьёс луозы, азьвыл вапумъёсын ӵошатыса, тӥледлы эшшо но ӟечгес лэсьто, соку тододы: Мон – Кузё-Инмар.12Тӥ вылэ улыны адямиосты ваё, Аслэсьтым израиль калыкме ваё; соос тонэн, музъем, кузёяськыса улозы, тон соослэн люкетсы луод, соосты нылпитэк уд ни кельты.
13Тазьы шуэ Инмар Кузё-Инмар: тӥ сярысь тазьы шуэмзы понна: ”Тон – адямиосты сиись, аслэсьтыд калыктэ нылпитэк кельтӥсь музъем”,14со понна тон азьланяз адямиосты уд ни сиы, аслэсьтыд калыктэ но нылпитэк улӥсь уд ни кары, – шуэ Инмар Кузё-Инмар.15Мукет калыкъёслэсь серекъямзэс уд ни кылы, мурт выжыослэсь тышкаськем-куаретэмзэс но ас вылад уд ни нуы, аслэсьтыд калыктэ но азьланяз нылпитэк уд ни кельты, – шуэ Инмар Кузё-Инмар”».
16Кузё-Инмар дорысь мыным верамын вал:17«Адями пи! Израиль калык ас музъем вылаз улыку, сое ас выросъёсыныз, ужъёсыныз сапталляз; соослэн улон сюрессы Мон азьын кышномуртлэн толэзьлы быдэ саптаськон висёнэн саптаськемез кадь вал.18Та музъем вылын вир кисьтыса улэмзы понна, сое сульдэръёсынызы-идолъёсынызы саптаса воземзы понна Мон соос вылэ йыркурме кисьтӥ.19Соосты Мон пӧртэм калыкъёс пӧлы куяй, пӧртэм музъемъёсы соос пазьгиськизы; соослэсь улэм сюрессэс, ужъёссэс чакласа, Мон соослэсь кылзэс юай.20Мыноно калыкъёссы доры соос вуизы но Мынэсьтым дун-сьӧлыктэм нимме сантэмазы, соос сярысь шуо уго: ”Соос Кузё-Инмарлэн калыкез, Солэн музъемысьтыз соос потӥзы”.21Аслэсьтым дун-сьӧлыктэм нимме Мон жаляй, сое, мурт калыкъёс доры мыныса, израиль калык сӥтэм-сантэм кариз уго.
22Соин ик израиль калыклы шу: ”Тазьы шуэ Инмар Кузё-Инмар: тае Мон, израиль калык, тӥ понна уг лэсьты, Аслам дун-сьӧлыктэм нимы понна лэсьто, уго тӥ сое, мурт калыкъёс пӧлы мыныса, сантэман улэ сётӥды.23Мынам быдӟым нимы дун-сьӧлыктэм луэ шуыса возьмато, мурт калыкъёс дорын со сантэмамын, соос доры мыныса, тӥ сое сантэмады; калыкъёс тодозы, Мон – Кузё-Инмар, соослэн син азязы Аслэсьтым дун-сьӧлыктэм луэмме тӥ вылын возьматӥ ке, – шуэ Инмар Кузё-Инмар.24Тӥледыз мурт калыкъёс пӧлысь басьто, вань кунъёсысь люкало но асьтэлэн музъемады ваё.25Тӥледыз дун-чылкыт вуэн пазьго но, тӥ вань саптаськемъёстылэсь чылкыталоды, вань сульдэръёсыныды-идолъёсыныды саптаськемъёстылэсь тӥледыз сузяло-чылкытато.26Тӥледлы выль сюлэм сёто, выль дух сёто; мугорысьтыды измем сюлэмдэс басьто но лулмугоро сюлэм сёто.27Пушкады Аслэсьтым духме поно но лэсьто озьы – тӥ Мынам курон-косонъёсыя улыны кутскоды, пуктон-косонъёсме чакласа, утьыса-быдэсъяса улоды.28Атайёстылы сётэм музъемам улоды, тӥ Мынам калыке луоды, Мон тӥляд Инмарды луо.29Вань кырсьёстылэсь тӥледыз мозмыто, ю-нянь будэто, йылэто сое, тӥледыз сютэм улыны уг кельты.30Писпуосысь емышъёсты, бусыосысь будосъёсты йылэто, азьланяз мурт калыкъёслэсь сютэм улонлы луыса тышкаськем-куаретэмзэс чидано медад луэ шуыса.31Соку урод улэм сюресъёсты сярысь, урод ужъёсты сярысь тодады ваёды но асьтэлэн законлы пумит улэмды, юрӟым-кырсь ужъёс лэсьтыса улэмды понна асьтэдыз асьтэос синазькыль карыны кутскоды.32Тае Мон тӥледлы луыса уг лэсьты, – шуэ Инмар Кузё-Инмар, – тӥледлы та тодмо мед луоз. Улэм сюресъёсты пумысен ӵыжекты-гордэкты, возьдаськы, израиль калык!
33Тазьы шуэ Инмар Кузё-Инмар: тӥледыз законлы пумит улэмъёстылэсь сузям нуналэ городъёсады улӥсьёс ваё, таркам-куашкатъям юртъёсты выльысь ӝутэмын луозы.34Тырттэм-буш кылем музъемды, вӧзтӥз ортчись вань адямиослэн син азязы кыр дунне кадь адӟиськись музъемды, гыремын-киземын луоз, –35соку шуозы: ”Та тырттэм-буш кылем музъем Едем садлы укшаны кутскиз; та куашкам, куштӥськем, таркам городъёс но юнматэмын, отын улӥсьёсыз но вань”.36Тӥ котыре кылем калыкъёс тодозы, Мон, Кузё-Инмар, куашкатэмзэ выльысен ӝутӥсько, тырттэм-буш кылем музъемъёсы нош ик будосъёс мерттӥсько. Мон, Кузё-Инмар, тае верай но верам кылме быдэстӥ.
37Тазьы шуэ Инмар Кузё-Инмар: тани, Мон Аслэсьтым гажам-жалямме израиль калыклы эшшо тазьы но возьмато, – отысь калыкез ыж уллёез кадь йылэто.38Кызьы праздникъёс дыръя Иерусалимын курбон сётыны трос ыжъёсты ваё, сыӵе ик трос адямиос тырттэм-буш кылем городъёсын улыны кутскозы, соку тодозы: Мон – Кузё-Инмар”».
Глава 36