Выбрать язык
Книги Ветхого Завета
Книги Нового Завета
с русским текстом1Улыны выжеммылэн кызь витетӥ араз, арлэн кутсконаз, толэзьлэн дасэтӥ нуналаз, городэз куашкатэм бере дас ньыль ар ортчыса, самой со нуналэ Кузё-Инмарлэн киыз мон вылын вал, Со монэ отчы ӝутыса нуиз.2Инмарлэн адӟытоназ, Со монэ Израиль музъеме вайиз но туж ӝужыт гурезь йылэ султытӥз, солэн лымшорпал люкетаз городысь юртъеръёслы укшась макеос син шорам адӟиськизы.3Со монэ отчы вайиз. Тани, отын пиосмурт сылэ, солэн тусбуез чилясь-пиштӥсь ыргонлы укша, кияз етӥн гозы, мертаськон боды возе, капка дорын со сылэ.4Та пиосмурт мыным шуиз: «Адями пи! Синмыныд учкы, пельыныд кылзы, мае мон тыныд возьмато, сое ваньзэ сюлмад пон, уго ваньзэ тае мон тыныд мед возьматом шуыса, тон со понна ик татчы ваемын; ваньзэ, мае адӟид, ваньзэ сое израиль калыклы вера».
5Тани, храмлэн педпалаз котыр ласянь борддор сылэ, со пиосмуртлэн кияз куать гырпум кузьда мертаськон бодыез вань, – гырпумез кикурен ӵош карыса; та борддорлэсь зӧкталазэ одӥг боды зӧкта, ӝуждалазэ одӥг боды ӝужда мертаз.
6Собере шундыӝужан пала учкись капка доры мынӥз, тубатъёсыз кузя тубиз но та капкалэсь ӧс выжызэ мертаз – пасьталаез одӥг боды кузьда, мукетызлэн но ӧс выжылэн пасьталаез одӥг боды кузьда.7Котькуд урдэс комнаталэн одӥг боды кузьдалаез, одӥг боды пасьталаез вал, комнатаослэн виссы вить гырпум кузьда; бӧльмы вӧзысь капкалэн ӧс выжыезлэн пасьталаез одӥг боды кузьда ик вал.8Капкалэсь бӧльмы пушсэ мертаз, со одӥг боды кузьда вал.9Нош капка вӧзысь бӧльмылэн пушкыз тямыс гырпум кузьда, юбоосызлэн пасьталазы кык гырпум кузьда. Капка вӧзысь таиз бӧльмы храм палаз интыяськемын.10Шундыӝужан палась капкалэн одӥг палаз куинь комнатаез, мукет палаз но куинь комнатаез; куинез ик одӥг быдӟаесь; мыд-мыд палась юбоосыз но одӥг быдӟаесь.11Капка пасьлэн пасьталаез дас гырпум, нош капкалэн кузьдалаез дас куинь гырпум.12Нош комнатаос азьысь висъет одӥг гырпум ӝужда вал, мукет палаз но висъет одӥг гырпум ӝужда ик, та комнатаослэн кузьдалазы куать гырпум кузьда, пасьталазы но куать гырпум кузьда.13Собере со мертаз: капка пушкысь одӥг комнаталэн вӧлдэт дорысеныз мукет комнаталэн вӧлдэт дорозяз кызь вить гырпум пасьталаез; ӧсэз ӧслы ваче пумитын сылэ.14Юбоосты мертаз, соослэн куатьтон гырпум кузьда ӝуждалазы, азбар дорысь, капкаос вӧзысь вань юбоослэн но сыӵе ик ӝуждалазы.15Капкае пыронлэн азьпаласеныз пуш капкалэн азьпал люкетозяз витьтон гырпум.
16Урдэс комнатаослэн укноосазы решётка понэмын, юбоос пушкын но, капкалэн пушказ но – котыр ласянь, бӧльмыын но пуш палтӥз – котыр ласянь укноос тыремын, нош юбоос вылэ пальмалы укшась суредъёс лэсьтэмын.17Со монэ педпалась азбаре вайиз, нош отын комнатаос; азбар котыр изэн вӧлдэмын; со интыын куамын комнатаос лэсьтэмын.18Капкаослэн урдэскытӥзы изъёс вӧлдэмын – капкалэн кузьдалаез мында; со из вӧлдэм инты улӥегес интыямын.19Улысь капка дорысен пуш азбарлэн педло палозяз пасьталазэ мертаз – сю гырпум кемозь шундыӝужан палзэ, уйпалзэ но.20Со озьы ик педпал азбарлэн уйпала учкись капкаезлэсь кузьдалазэ но, пасьталазэ но мертаз.21Капкалэсь огласянь куинь урдэс комнатаоссэ мертаз, солэсь мукет ласянь куинь урдэс комнатаоссэ мертаз; солэн юбоосыз но, бӧльмыосыз но нырысетӥ капкалэн быдӟаесь ик вал – кузьдалаез витьтон гырпум, нош пасьталаез кызь вить гырпум кузьда.22Солэн укноосыз но, бӧльмыосыз но, пальмалы укшась чеберъянъёсыз но шундыӝужан пала учкыса сылӥсь мукет капкалэн быдӟаесь ик вал; со пушкы сизьым тубат вылэ лёгиськыса пырылӥзы, азязы капкалэн бӧльмыез сылӥз.23Уйпал капкаен шундыӝужанпал капкалы ваче пумитын пушкысь азбаре пырон капка вань; та пиосмурт капкаен капка вискысь азбарез мертаз, со сю гырпум кузьда вал.
24Со монэ лымшор пала нуиз; тани, отын лымшор капка; юбооссэ, бӧльмыоссэ мертаз – соос азьвыл капкаос быдӟаесь ик.25Лымшор капкаысь но солэн бӧльмыосысьтыз укноосыз азьвыл укноос быдӟаесь ик: кузьдалаез витьтон гырпум, пасьталаез кызь вить гырпум.26Тубатлэн азяз капка пушкы бӧльмы лэсьтэмын, со пушкы сизьым тубат вылэ лёгиськыса пыро; юбоослэн мыд-мыд палаз пальма тусъем чеберъянъёс лэсьтэмын: одӥгез – огпалаз, мукетыз – мукет палаз.27Пуш азбаре пырыны лымшор палан но капка вань; та пиосмурт та капкаен лымшор капка вискысь азбарез мертаз, со сю гырпум кузьда вал.
28Лымшор капка пыр со монэ пушкысь азбаре пыртӥз; лымшор капкаез мертаз, со азьвылъёсыз быдӟа ик вал.29Урдэскысь комнатаос но, юбоос но, бӧльмыос но азьвылъёсыз быдӟаесь ик; капкалэн бӧльмыосаз но котыр ласянь укноос лэсьтэмын; капкалэн кузьдалаез витьтон гырпум, пасьталаез кызь вить гырпум.30Котыр ласянь бӧльмыос лэсьтэмын, соослэн кузьдалазы кызь вить гырпум, пасьталазы вить гырпум.31Бӧльмыосыз педпал азбаре пото, юбоосыз вылын пальмалы укшась чеберъянъёс лэсьтэмын; со пушкы пырон понна тямыс тубат вылтӥ ӝутсконо.
32Собере со монэ шундыӝужанысь капка пыр пуш азбаре нуиз; со капкаез мертаз, со мукет капкаос быдӟа ик вал.33Урдэс комнатаосыз но, юбоосыз но, бӧльмыосыз но азьвылъёсыз быдӟаесь ик; котыр ласянь отын но, бӧльмыосаз но укноос вал; кузьдалаез витьтон гырпум, нош пасьталаез кызь вить гырпум.34Бӧльмыосыз педпал азбаре пото, юбоосыз вылын мыд-мыд палаз пальмалы укшась чеберъянъёс лэсьтэмын; со доры тямыс тубат вылэ лёгиськыса ӝутсконо.
35Собере со монэ уйпалась капка доры вайиз, сое мертаз, со мукет капкаос быдӟа ик вал.36Со бордын урдэс комнатаос лэсьтэмын, юбоосыз, бӧльмыосыз вал, котыр ласянь укноос вал; кузьдалаез витьтон гырпум, пасьталаез кызь вить гырпум кузьда.37Бӧльмыосыз педпал азбаре пото, юбоосыз вылын мыд-мыд палаз пальмалы укшась чеберъянъёс лэсьтэмын; со доры тямыс тубат вылэ лёгиськыса ӝутсконо.
38Капка вӧзысь юбоос дорын комната вань, отчы пыронэз вань; отын тылын сутыны дасям курбон пудоез вуэн гылто.39Нош капкалэн бӧльмыяз огпалаз кык ӝӧк сылэ, мукет палаз но кык ӝӧкез вань, соос вылын тылын сутоно курбон пудоосты, сьӧлык понна курбон пудоосты, йыруж лэсьтэм понна курбон сётыны ваем пудоосты вандо.40Уйпалась капкае пырон пась дорын педпал урдэсаз кык ӝӧкъёс сылӥзы, мукет пал урдэсаз но капкалэн бӧльмыез вӧзын кык ӝӧкъёс сыло.41Капкалэн урдэсказ огпалаз ньыль ӝӧк, мукет палаз ньыль ӝӧк сылэ; ваньмыз тямыс ӝӧк, соос вылын курбон пудоез вандо.42Тылын сутӥськись курбонэз дасян понна вӧлыса лэсьтэм изъёслэсь ньыль ӝӧкъёс сыло, кузьдалазы одӥг но ӝыны гырпум кузьда, пасьталазы одӥг но ӝыны гырпум, ӝуждалазы одӥг гырпум; соос вылэ тылын сутоно, мукет курбонэз но вандыны дасям арбериос понэмын.43Одӥг кикур кузьда шедьытонъёс быдэс юрт котыртӥ борддор борды юнматэмын, нош ӝӧкъёс вылэ курбон сӥль тырылӥзы.
44Пуш капкалэн педпалаз кырӟасьёслы-чирдӥсьёслы комнатаос лэсьтэмын; пуш азбарын уйпал капкалэн урдэсказ одӥгез комната лымшоре учке, нош мукетыз, лымшор капкалэн урдэскысез, уйпала учке.45Со мыным шуиз: «Таиз, лымшор пала учкисез комната, храм коркан ужась-тыршись священникъёслы лэсьтэмын;46нош уйпала учкись комната курбон сётон ӝӧк котырын ужась-тыршись священникъёслы лэсьтэмын; соос Садоклэн пиосыз, Левий выжыысь пиос пӧлысь соос гинэ, Кузё-Инмарлэн матаз мыныса, Солы ужаны-тыршыны быгато».
47Азбарлэсь быдӟалазэ со мертаз – кузьдалаез сю гырпум, пасьталаез сю гырпум, со ньыль сэрего вал; нош храм азьын курбон сётон ӝӧк сылӥз.48Со монэ храмлэн бӧльмы дораз вайиз но бӧльмыысь юбоез мертаз – вить гырпум одӥг ласянь, вить гырпум мукет ласянь; нош капкалэн пасьталаез куинь гырпум одӥг ласянь, куинь гырпум мукет ласянь.49Бӧльмылэн кузьдалаез кызь гырпум, нош пасьталаез дас одӥг гырпум, со пушкы пыроно, дас тубат вылэ лёгиськыса; юбоослэн пыкъетсы вал: одӥгез – огласянь, мукетыз – мукет ласянь.
Глава 40