Выбрать язык
Книги Ветхого Завета
Книги Нового Завета
с русским текстом1Собере со монэ храме пыртӥз но юбоосты мертаз – огласянь куать гырпум пасьталаез, мукет ласянь куать гырпум пасьталаез – скиния пасьта.2Пырон пасьлэн пасьталаез дас гырпум, пырон пасьлэн урдэскыз огласянь вить гырпум кузьда, мукет ласянь но вить гырпум; храмез мертаз – ньыльдон гырпум кузьдалаез, кызь гырпум пасьталаез.
3Пушказ пыриз но ӧс дорысь юбоосты мертаз – соос кык гырпум зӧктаесь; ӧслэн пасез куать гырпум, нош ӧслэн пасьталаез сизьым гырпум.4Сое мертаз – кузьдалаез кызь гырпум, пасьталаез кызь гырпум, храм пасьта, собере мыным шуиз: «Та Святойлэсь но Святой инты».
5Храмлэсь борддорзэ мертаз – солэн зӧкталаез куать гырпум кузьда, храмлэн котыраз лэсьтэм урдэс комнатаослэн пасьталазы ньыль гырпум кузьда.6Урдэсказ куамын куинь комнатаез, соос артысь артэ интыяськемын; соос храмлэн котыр ласянь кыстӥськись борддорез пушкы пыро, соос ог-огенызы герӟаськемын, но храмлэн борддорез борды уг йӧтӥсько.7Этажысь этаже тубемъя храмлэн урдэс комнатаосыз эшшо но эшшо паськытгес луизы, малы ке шуоно храмлэн котыраз интыяськем урдэс комнатаос храм котыртӥ вылэ но вылэ ӝутскизы, соин ик храмлэн йылыз паськытгес вал улысь люкетэз сярысь, урдэс комнатаослэн улысь этажысьтызы вылысяз этаже шорысез пыр тубылӥзы.
8Коркалэсь йылзэ котырак адӟи; комнатаослэн улзы-инъетсы быдэс боды кузьда вал – куать гырпум кузьда.9Урдэс комнатаослэн педпал борддорзылэн пасьталаез вить гырпум, храмлэн урдэс комнатаосыз вӧзын буш инты вань.10Храмлэн урдэс комнатаосыз но азбарлэн комнатаосыз вискын кызь гырпум пасьта буш инты вань, быдэс храмлэн котыртӥз озьы.11Урдэс комнатаослэн ӧсъёссы буш интые пото, одӥгез ӧсэз уйпала потэ, мукетыз ӧсэз – лымшор пала; та буш интылэн пасьталаез котыр ласянь вить гырпум.12Шундыпуксён палась падвож азьысь юртлэн пасьталаез сизьымдон гырпум; нош та юртлэн борддорезлэн пасьталаез котыр ласянь вить гырпум, нош кузьдалаез укмыстон гырпум.
13Храмез мертаз – кузьдалаез сю гырпум; падвожын но, вӧзаз пуктэм юртын но, солэн борддоръёсаз но кузьдалаез сю гырпум.14Азьпал ласянь храмлэн пасьталаез, падвожлэн но шундыӝужанпал ласянь пасьталаез сю гырпум кузьда.15Падвож азьысь юртлэсь кузьдалазэ со берласяньтӥз мертаз, урдэс комнатаосыныз ӵош, мыд-мыд палтӥз мертаз – сю гырпум кузьда со, озьы ик храмлэсь пушсэ, азбарлэсь бӧльмыоссэ мертаз.16Куиньысьтыз ик этажысь ӧс янакъёс, решёткаен укноос, урдэс комнатаос котыр ласянь, ӧс янаклэн ваче беринысьтыз, выж вылысен укноос йылозь пулэн шуккемын; укноосыз ворсамын вал.17Ӧслэн йылысеныз выж дорозь пуш паласен но, педпаласен но, храмлэн вань борддор кузяз, котыр ласянь, пуш палтӥз но педпалтӥз, вӧлыса-вандылыса лэсьтэм чеберъянъёс тыремын.18Херувимъёслы, пальмаослы укшась чеберъянъёс лэсьтэмын: кык херувимъёс вискын пальма лэсьтэмын, котькудӥзлэн херувимлэн кык ымнырыз.19Огпалтӥз пальма пала адями ымныр учке, мукет палтӥз пальма пала лев ымныр учке; быдэс храмын котыр ласянь тазьы лэсьтэмын.20Выж вылысен ӧс йылозь, храмлэн борддор вылаз херувимъёс, пальмаос лэсьтэмын.21Храмлэн ӧс янакъёсыз ньыль сэрегоесь; святойлэсь но святой инты но син азям та выллем ик адӟиськиз.22Курбон сётон ӝӧклэн ӝуждалаез куинь гырпум, кузьдалаез кык гырпум; солэн сэрегъёсыз вал, сылон интыез, урдэсъёсыз пулэсь лэсьтэмын; со мыным шуиз: «Та ӝӧк, со Кузё-Инмар азьын сылэ».
23Храмын но, святойлэсь но святой интыын но быдэн кык люкето ӧсэз вань.24Ӧсъёсыз кык люкетоесь, кыкез но усьяськись, одӥгез ӧс кык пуллэсь лэсьтэмын, кыкетӥез но кык пуллэсь лэсьтэмын.25Соос вылэ, храмлэн ӧсъёсыз вылэ, борддор бордын кадесь ик херувимъёс, пальмаос суредамын; бӧльмылэн азяз педпалаз пу корказь лэсьтэмын.26Бӧльмылэн урдэскытӥз, мыд-мыд ласянь, озьы ик храмлэн урдэс комнатаосыз вылэ, пу корказьын но решёткаен укноос лэсьтэмын, пальмаос суредамын вал.
Глава 41