Выбрать язык
Книги Ветхого Завета
Книги Нового Завета
с русским текстом1Собере монэ капка доры вайиз, шундыӝужан пала учкыса сылӥсь капка доры.2Тани, Израиль Инмарлэн пиштӥсь данлыкез шундыӝужан палась лыктэ, Солэн куараез бадӟым вуослэн куаразылы укша, соку музъем Солэн пиштӥсь данлыкеныз югыт луиз.3Таиз адӟон вал сыӵе ик, кыӵезэ мон азьвыл адӟи, сыӵе-сыӵе ик, кыӵезэ мон городлэсь быронзэ ивортыны ветлыкум адӟи, Ховар шур дурысен адӟем адӟонъёсы кадесь ик вал со адӟонъёс. Мон ымныр вылам выдӥ.4Кузё-Инмарлэн пиштӥсь данлыкез шундыӝужан пала учкыса сылӥсь капкатӥ храме пыриз.
5Дух монэ ӝутӥз но пуш азбаре пыртӥз, тани, Кузё-Инмарлэн пиштӥсь данлыкеныз быдэс храм тырмиз.6Соку мон храмысь кинлэсь ке но мыным верамзэ кылӥ, нош со пиосмурт монэн артэ сылэ вал.7Мыным шуиз: «Адями пи! Та Мынам престолэлэн интыез, пыдтышме пуктон интые, отын Мон Израиль пиос пӧлын пумтэм вапумъёс ӵоже уло; израиль калык азьланяз Мынэсьтым дун-чылкыт нимме саптаса уз ни улы, – соос но уз, соослэн эксэйёссы но, азыса-калгыса улэменызы, гурезьёссы йылын эксэйёссылэн шӧйёсынызы нимме уз ни сапталэ.8Ӧс выжызэс ӧс выжые борды вутто, ӧс янакъёссэс Аслам янакъёсы доры вутто; озьы, борддор гинэ Монэ соослэсь висъяз; Мынэсьтым дун-чылкыт нимме асьсэлэн юрӟым-кырсь ужъёсынызы саптазы, – со понна Мон, воже потыку, соосты быдтӥ.9Нош табере азыса-калгыса улэмзэс, эксэйёссылэсь шӧйёссэс но Мон азьысь палэнтозы, табере Мон соос пӧлын пумтэм вапумъёс ӵоже уло.
10Тон, адямилэн пиез, израиль калыклы вера та храм сярысь, законлы пумит улэмъёссы понна мед возьдаськозы, солэсь кыӵе луэмзэ мед мерталозы.11Вань со лэсьтэм ужъёссылэсь возьдаськизы ке, соослы тон храмлэсь тусбуйзэ, солэсь интыяськемзэ, солэсь потанъёссэ, пыранъёссэ, солэсь вань тусбуйзэ, солэсь вань пуктон-косонъёссэ, солэсь вань тусбуйёссэ, солэсь вань законъёссэ тодыты, соослэн син азязы гожты солэсь быдэс тусбуйзэ, солэсь вань пуктон-косонъёссэ соос мед утёзы, соосъя мед лэсьтозы-улозы шуыса.12Тани храмлэн законэз: гурезьлэн йылӥяз, солэн котырысьтыз вань инты – Святойлэсь но Святой; тӥни со храмлэн законэз луэ!»
13Тани, курбон сётон ӝӧклэн гырпумен гырпумез кикурен огазе карыса мертам быдӟалаез: инъетэз гырпум ӝужда, пасьталаез но гырпум кузьда, котыртӥз одӥг вись ӝужда бордэз вань; со курбон сётон ӝӧклэн инъетэз.14Музъеме пырем инъет бордысен улысь радозь кык гырпум, улысь радлэн пасьталаез одӥг гырпум; та пичи радысен бадӟым радозь ньыль гырпум, бадӟым радлэн но пасьталаез одӥг гырпум кузьда.15Ачиз курбон сётон ӝӧк ньыль гырпум ӝужда; курбон сётон ӝӧк бордысь ньыль сюръёс вылласянь ӝутско.16Курбон сётон ӝӧклэн дас кык гырпум кузьдалаез, дас кык гырпум пасьталаез; ньыль пал ласянь ик со ньыль сэрего.17Курбон сётон ӝӧклэн улӥыз дас ньыль гырпум кузьда, ньыль пал ласянь ик дас ньыль гырпум пасьта, солэн котыртӥз ӝыны гырпум ӝужда бордэз вань, нош солэн инъетэз котыр ласянь одӥг гырпум пасьта, шундыӝужан паласен со доры тубатъёс мыно.
18Со пиосмурт мыным шуиз: «Адями пи! Тазьы шуэ Инмар Кузё-Инмар: тани со нуналлы, курбон сётон ӝӧкез лэсьтэм бере со вылын тылын сутӥськись курбонъёс сётон понна, со вылэ вирен пазьгон понна, курбон сётон ӝӧк пумысен сётэм пуктон-косонъёсыз, –19Левий выжыысь Садок бордысь потэм, Мыным ужан-тыршон понна Мынам матам лыктӥсь священникъёслы, – шуэ Инмар Кузё-Инмар, – сьӧлыкъёс понна ош уллёысь ошпиез курбонлы сёт.20Солэсь вирзэ басьтыса, курбон сётон ӝӧклэн ньыль сюрез вылэ ик пазьгы, со улысь ньыль сэрегез вылэ, котырысьтыз бордэз вылэ но пазьгы, озьы курбон сётон ӝӧкез чылкытаты, дун-чылкыт кар.21Сьӧлыкъёс понна курбон сётыны ваем ошпиез басьты но храмлэн нимысьтыз висъям интыяз, святой интылэн палэназ, сут сое.
22Нош мукетаз нуналэ сьӧлык понна кеч уллёысь чик шектэм кечтакаез курбонлы вай; курбон сётон ӝӧкез мед чылкытатозы, кызьы азьвыл чылкытатӥзы ошпи вирен.23Чылкытатон сямез ортчытэмед бере ош уллёысь чик шектэм ошпиез вай, нош ыж уллёысь чик шектэм такаез вай но24Кузё-Инмарлэн азяз пон; священникъёс соос вылэ сылал пазьгозы но, тылын сутыса, Кузё-Инмарлы вылэ ӝутон курбон сётозы.25Сьӧлык понна нуналлы быдэ, сизьым нунал ӵоже, кечтакаез курбонлы сёт; озьы ик ош уллёысь чик шектэм ошпиез, ыж уллёысь чик шектэм такаез курбонлы мед ваёзы.26Сизьым нунал ӵоже соос курбон сётон ӝӧкез чылкытатыны, дун-чылкытатон сямез ортчытыны кулэ, киосазы пачылаз курбон кутыса вайыны кулэ.27Та нуналъёс ортчем бере, тямысэтӥ нуналэ, азьланяз но курбон сётон ӝӧк вылын священникъёс тылын сутыны ваем курбонъёстэс, тау карыса ваем курбонъёстэс вылэ ӝутозы; соку Мон тӥледлы гажан-жалянме возьмато», – шуэ Инмар Кузё-Инмар.
Глава 43