Выбрать язык
Книги Ветхого Завета
Книги Нового Завета
с русским текстом1Собере со монэ берен вӧсяськон интылэн шундыӝужан пала учкыса сылӥсь педпал капкаез доры вайиз; капка ворсамын вал.2Кузё-Инмар мыным шуиз: «Та капка ворсаськыса улоз, уз усьтӥськы, нокыӵе но адями со пыр уз пыры, уго Израильлэн Инмарез Кузё-Инмар со пыр пыриз, – со ворсамын луоз.3Покчи эксэй сярысь ке верано, со, покчи эксэй луыса, Кузё-Инмар азьын нянь сиён понна со пушкы пуксёз; та капкалэн бӧльмыез пыр со пыроз, со сюрестӥ ик кошкоз».
4Собере со монэ уйпал капка пыр храм азе вайиз, соку мон адӟи, кызьы Кузё-Инмарлэн пиштӥсь данлыкез Кузё-Инмарлэсь корказэ пачылмытӥз, соку мон ымныр вылам выдӥ.5Кузё-Инмар мыным шуиз: «Адямилэн пиез! Кузё-Инмарлэн юртысьтыз вань пуктон-косонъёсыз сярысь ваньзэ, мае Мон тыныд верасько, солэн вань законъёсыз борды сюлэмдэ пон, соосты ас синмыныд учкы, ас пельыныд кылзы; храме пыронэз, вӧсяськон интыысь вань потонъёсты тодад возь.
6Бугыръяськыса улӥсь израиль калыклы шу: ”Тазьы шуэ Инмар Кузё-Инмар: израиль калык, тырмоз тӥледлы вань юрӟым-кырсь ужъёстэс лэсьтыса улыны,7мурт пиосты, сюлмынызы вандӥськымтэосты, мугор люкетынызы вандӥськымтэосты Мынам вӧсяськон интыям пыртаса, храмме саптаны, Мыным няньме, кӧез, вирез курбонлы сётъяны, вань юрӟым-кырсь ужъёсыныды сӥзён-косонме куашкатыны.8Мынам дун-чылкыт интыосам тӥ возьмаськыса ӧд улэ, нош асьтэ интые тӥ соосты пуктылӥды Мынэсьтым вӧсяськон интыме возьман понна.9Тазьы шуэ Инмар Кузё-Инмар: одӥгез но мурт пи, сюлмыныз вандӥськымтэ, мугор люкетыныз вандӥськымтэ, Мынам вӧсяськон интыям пырыны кулэ ӧвӧл, Израиль пиос пӧлын ке но улэ со мурт пи.
10Озьы ик левитъёс но, Израильлэн куштӥськон дыръяз Мынэсьтым палэнскемъёс, Монэ кельтӥзы но сульдэръёссы-идолъёссы сьӧрын йыромыса ветлыны кутскизы, янгышсы понна вӧсь каремын луозы.11Соос Мынам вӧсяськон интыям ужаса, тыршыса улозы, храм капкаос азьысь возьмаськисьёс, храмын ужась-тыршисьёс луозы; калыклэсь тылын сутыны курбонлы ваем пудозэ, курбонъёслы ваем мукет пудооссэс но соос вандылозы, соослы ужан-тыршон вылысь соослэн азязы сылозы.12Соослы, соослэн сульдэръёссы-идолъёссы азьын ужамзы-тыршемзы понна, Израиль юртэз, визь сынаса, сьӧлыко ужъёс лэсьтонэ вуттэмзы понна, – шуэ Инмар Кузё-Инмар, – соос вылэ Мон киме ӝутӥ, асьсэлэн янгышсы понна соос вӧсь каремын луозы.13Мынам азям священникъёс луыса ужан-тыршон понна соос Мынам матам уз лыктэ, вань дун-чылкыт макеосы доры, Святойлэсь но Святой интыелэн матаз, уз лыктэ, соос вань юрӟым-кырсь ужъёссэс, сӥтэм-сантэм луонэз ас вылазы нуозы.14Вань вӧсяськонъёс дыръялы, ваньмызлы мар отын ортче, соосты храм возьмась каро.
15Левий выжыысь священникъёс, Садоклэн пиосыз, израиль пиослэн Мон бордысь куштӥськон вакытазы ялан Мынэсьтым вӧсяськон интыме возьмаса улӥзы, соос Мыным ужаны-тыршыны Мынам матам лыктозы, Мыным кӧй но вир ваён понна соос Мынам азям сылозы, – шуэ Инмар Кузё-Инмар.16Соос Мынам вӧсяськон интыям пырозы но Мыным ужан-тыршон понна курбон сётон ӝӧкелэн матаз лыктозы Мынэсьтым вӧсяськон интыме возьман понна.
17Пуш азбарысь капкаос доры лыктыса, етӥнлэсь куэм дӥськутсэс дӥсялозы, храм пушкын но пуш азбарысь капкаос пушкын вӧсяськон ортчытыку, соослы ыжгон дӥськут дӥсяны уг яра.18Йыркерттэтсы но етӥнлэсь луыны кулэ, куссэс шобыртӥсь ул дӥськутсы но етӥнлэсь ик луыны кулэ; медаз пӧсялэ шуыса, куссэс ӝик-ӝик медаз думылэ.19Нош педпал азбаре, педпал азбарын сылӥсь калык доры потыны кулэ ке луиз, соку соос вӧсяськон дыръя сылэм дӥськутсэс священникъёслэн кылиськон комнатаосазы кыльыса мед кельтозы но, мукет дӥськут дӥсяса, мед потозы, вӧсяськон дӥськутэнызы калык борды йӧтӥськыны кулэ ӧвӧл.
20Соос йырсизэс мычыны кулэ ӧвӧл, кузь лэзьыны но кулэ ӧвӧл, ӵышкыса (вандылыса) мед возёзы.21Пуш азбаре мыныкуз, одӥгез но священник вина юыны кулэ ӧвӧл.22Палкышноосты но, картэнызы люкиськемъёсты но соос кышнолы вайыны кулэ ӧвӧл; соослы кышнолы вайыны яра израиль калыклэн выжыысьтыз нылмуръёсты гинэ яке священник кулэм бере солэсь пал кылем кышнозэ.
23Соос дун-чылкытэз дун-чылкыт луисьтэмлэсь висъяны калыкез дышетыны кулэ, соос валэктыны кулэ, мар со чылкыт, мар со чылкыттэм.24Ченгешонэ вуттэм ужъёсты эскерыку, соос судын луыны кулэ, Мынам пуктон-косонъёсыя соосты судить карыны кулэ; вань праздникъёсы пумысен законъёсме, пуктон-косонъёсме чакланы, субботаосме чылкыт утьыны кулэ.25Саптаськонтэм понна одӥгез но священник кулэм муртлэн матаз лыктыны кулэ ӧвӧл; кулэмын ке атайзы яке анайзы, пизы яке нылзы, агай-вынзы яке бызьылымтэ сузэрзы-апайзы, сыӵе учыре гинэ соослы яра кулэм муртлэн матаз лыктыса саптаськыны.26Чылкытатӥськон сямез ортчытэмез бере эшшо сизьым нунал ӵоже мед возьмалоз на.27Пуш азбарысь святыня дорын служить карон понна лыктыны кулэ луиз ке, со нуналэ со сьӧлык понна курбон сётыны кулэ, – шуэ Инмар Кузё-Инмар.
28Священникъёслэн люкетсы сярысь ке верано, Мон соослэн люкетсы. Ваньбур но соослы Израильын эн сётэ: Мон соослэн ваньбурзы.29Соос кӧтсэс тырозы курбонлы ваем салам нянен, сьӧлык понна, йыруж понна ваем курбонъёсын; Израильын Инмарлы сӥзьыса сётэмез ваньмыз соослы ик луэ.30Вань емышъёсты пӧлысь нырысьсэ ваем котькыӵе сиён-юонъёсты священникъёслы сётэмын луыны кулэ; тӥляд юртты вылын бакельлыко улон мед луоз шуыса, изэм пызьдылэсь но нырысь ик изӥськемзэ священниклы сётэлэ.31Нокудзэ но ас понназ кулэм пудо-животэз, пӧйшуръёсын кесям тылобурдоез, пудо-животэз священникъёс сиыны кулэ ӧвӧл”».
Глава 44