Выбрать язык
Книги Ветхого Завета
Книги Нового Завета
с русским текстом1«Музъемез, пус чӧлтыса, люкетъёслы люкылыны кутскиды ке, дун-чылкыт люкетсэ Кузё-Инмарлы сётэ, солэн кузьдалаез кызь вить сюрс боды кузьда, пасьталаез дас сюрс боды кузьда мед луоз; та инты котыр ласянь, быдэсак дун-чылкыт мед луоз.2Отчы вӧсяськон интылы ньыль сэрего инты висъямын, вить сю боды кузьда солэн котырыз, солэн котыраз витьтон гырпум пасьта буш интыез вань.3Та нимаз висъям интыысь мертаса кызь вить сюрс боды кузьда музъем люкет басьты, солэн дас сюрс боды кузьда пасьталаез мед луоз, отын вӧсяськон корка сылоз, Святойлэсь но Святой инты луоз.4Музъемлэн та дун-чылкыт люкетэз священникъёслэн, вӧсяськон интыын ужась-тыршисьёслэн, Кузё-Инмарлы ужаны-тыршыны кутскисьёслэн интызы луоз: та интыын соослы коркаос пуктыны лэземын луоз, вӧсяськон интылы дун-чылкыт инты висъямын луоз.5Кызь вить сюрс боды кузьдалаем, дас сюрс боды кузьда пасьталаем инты левитъёслы, храмын ужась-тыршисьёслы, сётэмын луоз, соослэн улон интызы, люкетсы со луоз.
6Вить сюрс гырпум кузьда пасьталазэ, кызь вить сюрс гырпум кузьда кузьдалазэ городлэн киулаз сётэ, со Кузё-Инмарлы висъям вӧсяськон интылэн ваче бериназ интыяськемын; ваньмыз та быдэс израиль калыклэн киулаз луыны кулэ.7Кузё-Инмарлы висъям дун-чылкыт интылэн вӧзысьтыз, солэн мыд-мыд палысьтыз, озьы ик городлэн люкетлы сюрем музъем вӧзысьтыз, шундыпуксён палысьтыз шундыпуксён пала мынӥсь, шундыӝужан палысьтыз шундыӝужан пала кыстӥськись музъемез кивалтӥсьлы но люкетлы сётэ, со музъемлэн кузьдалаез шундыпуксёнпал гож дорысен шундыӝужанпал гож дорозь кыстӥськись, выжыослы сётэм люкетъёсын одӥг кадь мед луоз.8Та солэн музъемез, Израильысь солэн ваньбурез, Мынам кивалтӥсьёсы азьланяз Мынэсьтым калыкме ӝикатыса медаз ни возе, израиль калыклы, солэн вань выжыосызлы люкем музъемез мед сётозы.
9Тазьы шуэ Инмар Кузё-Инмар: тырмоз тӥледлы, Израильысь кивалтӥсьёс! Дугдэ калыкез ӝоже уськытъямысь, ултӥямысь, ваньзэ законъя, шонерлыко лэсьтэ; дугдэ Мынэсьтым калыкме люкетлы басьтэм музъем вылысьтыз уллямысь, – шуэ Инмар Кузё-Инмар.
10Тӥ шонер мертаське, ефады шонер мед луоз, батты шонер мед луоз.11Ефа но бат одӥг быдӟаесь мед луозы: бат хомерлэсь дасэтӥ люкетсэ мед тэрытоз, ефа но хомерлэсь дасэтӥ люкетсэ мед тэрытоз; соослэн быдӟалазы хомеръя тупатэмын-эскеремын луыны кулэ.12Одӥг сӥкльын кызь гер; нош кызь сӥкль, кызь вить сӥкль, дас вить сӥкль тӥ дорын одӥг мина луэ.
13Тани, тӥляд кивалтӥсьлы выт тыронды: хомер чабейлэсь ефалэсь куатетӥ люкетсэ, хомер йыдылэсь ефалэсь куатетӥ люкетсэ тыре;14вӧй тырон пумысен таӵе пуктон-косон сётэмын: мера-кор мертэт пӧлысь батлэсь дасэтӥ люкет мында вӧйзэ сётоно; дас бат луэ хомер, уго хомере дас бат тэре;15тӥледыз чылкыт карон понна Израильлэн турыно возь вылысьтыз ыж уллёысь кык сю ыж пӧлысь одӥгзэ курбонлы сётоно: ваньмыз та нянь курбонлы, тылын сутӥськись курбонлы, тау карон курбонлы сётэмын луоз, – шуэ Инмар Кузё-Инмар.16Та музъемын улӥсь вань калык Израильысь эксэйлы таӵе кузьым вайыны кулэ луоз.17Нош Израильлэн эксэез праздник нуналъёсы, выль толэзь потыку, субботаосы, израиль калыклэн вань сӥё-дано нуналъёсаз тылын сутӥськисьёссэ но, нянь курбонъёсты но, кисьтонооссэ но курбон-саламъёсты вайыны кулэ. Сьӧлык понна со курбон вайыны кулэ, израиль калыкез чылкыт карон понна нянь курбон, тылын сутӥськись курбон, тау карон курбон сётыны со кулэ.
18Тазьы шуэ Инмар Кузё-Инмар: нырысетӥ толэзьын, толэзьлэн нырысетӥ нуналаз ошъёслэн уллёысьтызы одӥгзэ шектэм ошпиез кут но вӧсяськон интыез чылкытатон сямез ортчыты.19Сьӧлык понна сётэм та курбонлэсь вирзэ священник мед басьтоз но соин храмлэн янакъёсыз вылэ, курбон сётон ӝӧклэн ньыль сэрегез вылэ, пуш азбарысь капкалэн янакъёсыз вылэ мед пазьгоз.20Озьы ик лэсьты толэзьлэн сизьыметӥ нуналаз янгышен, тодытэк лэсьтэм сьӧлыкъёс понна, озьы чылкытатэ храмез.
21Нырысетӥ толэзьлэн дас ньылетӥ нуналаз тӥляд Пасхады луыны кулэ, сизьым нунал кыстӥськись праздникты, соку юмал нянь сиыса улыны кулэ.22Со нуналэ эксэй ачиз понна, та музъем вылын улӥсь вань калыклэн сьӧлыкез понна ошпиез курбонлы сётоз.23Та праздниклэн сизьым нуналаз ик нуналлы быдэ сизьым ошпиез но сизьым такаез со Кузё-Инмарлы тылын сутӥськись курбонлы сётыны кулэ, соос шектэмесь луыны кулэ; сьӧлыкъёс понна кеч уллёысь одӥгзэ кечтакаез нуналлы быдэ курбонлы сётыны кулэ.24Ошлы быдэ одӥг ефа нянь курбон вайыны со кулэ, такалы быдэ но озьы ик, ефалы быдэ гин вӧй вайыны кулэ.
25Сизьыметӥ толэзе, толэзьлэн дас витетӥ нуналаз, праздник дыръя, сизьым нунал ӵоже со таосты ик вайыны кулэ: таӵе ик курбон сьӧлык понна, сыӵе ик тылын сутӥськись курбон, сомында ик нянь курбон, сомында ик вӧй».
Глава 45