Выбрать язык
Книги Ветхого Завета
Книги Нового Завета
с русским текстом1Тазьы шуэ Инмар Кузё-Инмар: «Пуш азбарысь шундыӝужан пала учкыса сылӥсь капкаез куать ужан нуналъёс ӵоже ворсаса возьыны кулэ, нош суббота нуналэ со усьтэмын мед луоз, выль толэзь потон нуналэ но сое усьтыса возёно.2Кивалтӥсь эксэй капкалэн педпалась бӧльмыез пыр мыноз но та капкалэн выжыяз султоз; священникъёс солэсь тылын сутыны ваем курбонзэ, тау карон понна ваем курбонзэ сётозы; капкалэн выжыяз со Кузё-Инмарлы йыбырттоз но отысь потоз, нош капка ӝытозь ворсаськытэк улоз.3Та музъемлэн калыкез капкае пырон азьын субботаосы, выль толэзь потон нуналъёсы Кузё-Инмар азьын йыбыртъяса улоз.
4Суббота нуналъёсы эксэй Кузё-Инмарлы тылын сутӥськись курбон ваёз, отын куать шектэм ыжпиос, одӥг шектэм така луыны кулэ;5солэн нянь курбонэз таӵе луыны кулэ: такаен ӵош ефа пызь ваёно, нош ыжпиосын ӵош кӧня киыз ворме, сомында нянь курбон ваёз, нош ефалы быдэ одӥг гин вӧй со вайыны кулэ.
6Выль толэзь потон нуналэ ош уллёысь со шектэм ошпиез курбонлы ваёз, озьы ик куать шектэм ыжпиен шектэм такаез курбонлы ваёз.7Солэн нянь курбонэз таӵе луыны кулэ: ошпиен ӵош одӥг ефа пызь, такалы быдэ одӥг ефа пызь, нош котькуд ыжпилы быдэ кӧня киыз вормоз, сомында пызь мед ваёз; ефалы быдэ одӥг гин вӧй мед ваёз.8Эксэй, татчы лыктылыкуз, капкалэн бӧльмы пыртӥз пырыны но, отысь со сюрестӥ ик потыны но кулэ.9Нош та музъемын улӥсь калык праздник нуналъёсы Кузё-Инмар азе йыбырттыны лыктӥз ке, йыбыртъян понна уйпал капкатӥ пырисез лымшор капкатӥ потыны кулэ, нош лымшор капкатӥ пырисез уйпал капкатӥ потыны кулэ; пырем капкатӥз ик потыны кулэ ӧвӧл, потыны кулэ ваче пумит капка пыр.10Эксэй соос пӧлын ик мед луоз; соос пырыку, со но пырыны кулэ; соос потыку, со но потыны кулэ.
11Праздник нуналъёсы, сӥё-дано люкаськонъёс дыръя салам нянь вайыны кулэ курбонлы ваем ошпиен ӵош одӥг ефа пызь ваёно, такаен ӵош но одӥг ефа пызь, нош ыжпиосын ӵош кӧня ки ворме, сомында пызь вайыны кулэ, ефа мертэт мында пызен ӵош одӥг гин мертэт мында вӧй ваёно.12Нош эксэй аслаз ӟеч мылкыдызъя тылын сутӥськись курбон сётыны малпаз ке, яке Кузё-Инмарлы тау карыса курбон сётыны мылкыд кариз ке, соку солы шундыӝужан пала учкись капкаез усьтыны кулэ, соку со суббота нуналэ кадь ик тылын сутӥськись курбонзэ, тау карон курбонзэ сётоз, собере со потоз, нош потэм бераз капка ворсаськоз.
13Нуналлы быдэ, Кузё-Инмарлы сӥзьыса, одӥг аресъем шектэм ыжпиез тылын сутӥськись курбон сётыны вай; ӵукналы быдэ сое вай.14Нош соин ӵош салам нянь вай, нянь котыны ӵукналы быдэ ефалэн куатетӥ люкетаз пызь поныса вай, вӧй но гинлэн куинетӥ люкетаз поныса вай; таӵе луэ вань вапумъёс ӵожелы Кузё-Инмарлэн нянь курбон сётон пумысен пуктон-косонэз.15Ӵукналы быдэ котьку но тылын сутӥськись курбонлы ыжпи, салам нянь, вӧй мед ваёзы».
16Тазьы шуэ Инмар Кузё-Инмар: «Эксэй аслаз пиосыз пӧлысь кудзылы ке люкетлы музъем кузьмаз ке, та солэн пиезлэн выжыезлы, солэн пиосызлы сётэмын луыны кулэ; та ваньбурзы выжыысь выжые улыны кулэ.17Аслаз люкетэз пӧлысь кудӥзлы ке но ляльчиезлы люкетлы музъем кузьмаз ке, со музъем люкет ляльчи киын мозмытскон арозь гинэ луоз, собере со берен эксэй кие берыктэмын луоз. Пиосызлы сётэмез гинэ выжыысь выжые соос киын улэ.18Но эксэй калыклэн выжыысь выжые возиськись люкетысьтызы, соосты ас удысысьтызы улляса, басьтыны уг быгаты; аслаз люкетысьтыз гинэ со ас нылпиосызлы люкет сётыны быгатэ, – Мынам калыке пӧлысь одӥгез но ас люкет музъемысьтыз уллямын медаз луы».
19Капкалэн урдэсысьтыз сюрес кузя пиосмурт монэ уйпала учкыса сылӥсь священникъёслэн дун-чылкыт комнатаосазы вуттӥз, тӥни, солэн шундыпуксёнпал дураз одӥг инты вань.20Собере мыным шуиз: «Та интыын священникъёс йыруж лэсьтэм понна курбон сётыны, сьӧлык понна курбон сӥль пӧзьтыны кулэ, педпалась азбаре поттытэк, калыкез дун-чылкыт карон понна салам нянь пыжыны кулэ».
21Собере со монэ педпал азбаре поттӥз но азбарлэн ньыль пал сэрегъёсыз вӧзтӥ ик нуллӥз, но, тани, азбарлэн котькуд сэрегаз эшшо азбарез вань на.22Азбарлэн ньыль сэрегаз ик липето азбаръёсыз вань на, кузьдалазы ньыльдон гырпум, куамын – пасьталазы, ньыляз ик сэрегъёсын одӥг быдӟаесь азбаръёсыз вань.23Ваньзылэн ньылезлэн ик азбарлэн котыртӥз борддор ӝутэмын, нош борддор вӧзтӥ котыр ласянь тылскон интыос лэсьтэмын.24Мыным шуиз: «Тани та пӧзьтӥськон интыос, отын храмын ужась-тыршисьёс калыклэсь ваем курбонъёссэс пӧзьто».
Глава 46