Выбрать язык
Книги Ветхого Завета
Книги Нового Завета
с русским текстом1Навуходоносор эксэйын кыкетӥ арзэ пукыку, солы вӧтъёс адскыны кутскизы, соку солэн духез бугырскиз, уммез быриз.2Соку эксэй лушкемлыкез тодӥсьёсты, пелляськисьёсты, туноосты но халдейёсты люканы косӥз, аслэсьтыз вӧтъёссэ соос солы мед вералозы шуыса. Лыктыса соос эксэй азе султӥзы.
3Эксэй соослы шуиз: «Уйвӧт адӟи мон, соин табере духе бугыръяське; тодэме потэ, мар вӧт со».4Халдейёс эксэйлы арамей кылын шуизы: «Эксэй! Пумтэм вапумъёс ул! Аслад ляльчиосыдлы вӧттэ вера, соку ми вӧтэдлэсь пуштроссэ валэктомы».
5Халдейёслы ответ сётыса, эксэй шуиз: «Таӵе косон мон поттӥсько: вӧтъёсме, солэсь пуштроссэ ӧд ке вералэ, юдэсэн-юдэсэн корамын луоды, улон юртъёсты куашкатэмын луозы;6уйвӧтме, солэсь пуштроссэ верады ке, соку тӥ мынэсьтым кузьым, мед, быдӟым данлык басьтоды; усьтэ ук мынэсьтым вӧтме, солэсь пуштроссэ».
7Соос кыкетӥ ползэ ответ сётыса шуизы: «Эксэй аслэсьтыз вӧтсэ ляльчиосызлы мед вералоз но, соку ми солэсь пуштроссэ солы вераломы».8Ответ сётыса, эксэй шуиз: «Зэмзэ ик тодӥсько, тӥ дырез шыръяны малпаськоды шуыса, малы ке шуоно тӥ адӟиськоды, таӵе косон мон дорысь потӥз шуыса.9Уйвӧтэ сярысь тӥ уд вераське бере, тӥляд одӥг малпанды: дыр ортчытозь, тӥ дасяськиськоды монэ пӧяны, ӧрекчаны; вералэ мыным уйвӧтэ сярысь, соку мон тодо, вӧтлэсь пуштроссэ валэктыны быгатӥськоды шуыса».
10Халдейёс эксэйлы ответ сётыса шуизы: «Дунне вылын одӥг адями но ӧвӧл, кудӥз мед быгатысал та ужез эксэйлы усьтыны, соин ик одӥгез но быдӟымез, кужмоез эксэй та выллем ужез быдэстыны одӥгезлэсь но лушкемлыкез тодӥсьлэсь, пелляськисьлэсь, халдейлэсь ӧз куры.11Уж, кудзэ эксэй усьтыны куре, сокем секыт, адямиос пӧлын улӥсьтэм мугортэм инмаръёс сяна, сое нокин но эксэйлы усьтыны уг быгаты».12Йыркурен пурӟиз эксэй, талы туж вожзэ поттӥз но Вавилонысь вань визьнодчиосты виылыны косӥз.
13Вань визьнодчиосты виылыны косон потэм бере Даниилэз но солэсь эшъёссэ виён понна утчаны кутскизы.14Соку Даниил Вавилонысь визьнодчиосты виыны потэм эксэйлэсь мугорзэ возьмась Ариох нимо кузёйырзылы, солы кенеш, визьлык ӵектыса вазиськиз.15Эксэй вӧзысь кужмо Ариохлэсь со юаз: «Малы таӵе шурдыт косон эксэй дорысь потӥз?» Соку Ариох Данииллы та ужрад сярысь вераз.
16Даниил пыриз но эксэйлэсь сюлмысьтыз куриз, солы дыр мед сётоз, нош со эксэйлэн уйвӧтэзлэсь пуштроссэ валэктоз шуыса куриз.17Даниил гуртаз бертӥз но та уж сярысь аслаз эшъёсызлы Ананиялы, Мисаиллы, Азариялы вераз,18соос Инмысь Инмарлэсь гажан-жалянзэ мед курозы, та лушкемлыкез Со соослы мед усьтоз шуыса мед курозы; соку Даниил эшъёсыныз ӵош Вавилонысь визьнодчиосын огазьын ӧй бырысалзы.
19Соку Данииллы уйвӧтаз та лушкемлык усьтӥськиз; Инмысь Инмарлы Даниил тау кариз.20Даниил шуиз:
«Кузё-Инмарлэн нимыз пумтэм вапумъёс ӵожелы
бакель каремын мед луоз,
уго Со дорын визьлык но кужым;
21Со вапумъёсты, аръёсты воштэ;
эксэйёсты куштэ, эксэйёсты пуктэ;
визьнодоослы визь-нод сётэ, валасьёслы – валан;
22Со мурдалаосты, ватӥськемез усьтэ;
тодэ, мар пеймытын вань,
Со бордын югыт улэ.
23Атайёсылэн Инмарзы, данъясько, вылӥ карисько мон Тонэ
мыным визьлык но кужым сётэмед понна;
мыным усьтӥд сое, мае Тынэсьтыд вӧсяськыса куриськомы;
уго Тон милемлы эксэйлэсь ужзэ усьтӥд».
24Та бере Даниил Ариох доры пыриз, кудзэ эксэй Вавилонысь визьнодчиосты виылыны косӥз, пыриз но солы шуиз: «Вавилонысь визьнодчиосты эн виылы, монэ эксэй доры ну, мон солы вӧтэзлэсь пуштроссэ усьто».25Соку Ариох чик ӝегатскытэк Даниилэз эксэй доры вайиз но солы шуиз: «Пленэ шедем иудей пиос пӧлысь мон одӥг муртэ шедьтӥ, со быгатэ эксэйлы уйвӧтэзлэсь пуштроссэ усьтыны».26Валтасар шуыса нимам Данииллы эксэй шуиз: «Быгатӥськод-а тон адӟем вӧтэ сярысь, солэн пуштросэз сярысь вераны?»
27Даниил эксэйлы ответ сётыса шуиз: «Лушкемлыкез, кудӥз сярысь эксэйлэн тодэмез потэ, визьнодчиос но, туноос но, лушкемлыкез тодыны быгатӥсьёс но, пелляськисьёс но эксэйлы усьтыны уз быгатэ.28Но инмын вань лушкемлыкез усьтӥсь Инмар; Со Навуходоносор эксэйлы усьтӥз, мар луоз берпуметӥ нуналъёсы. Тынад уйвӧтэд, валесад кыллён дыръя йырыдлэн адӟонъёсыз таос вал:29тон, эксэй, валесад кылльыкуд, малпад, мар луоз та бере? Лушкемлыкез Усьтӥсь тыныд возьматӥз, мар луоз.30Нош та лушкемлык мон ваньмызлэсь визьмогес луисько шуыса мыным усьтэмын ӧй вал, эксэйлы валан мед усьтӥськоз но ас сюлмыдлэсь малпанъёссэ мед тодоз шуыса усьтэмын вал.
31Тыныд, эксэй, таӵе адӟон вал: тани, кыӵе ке но бадӟым сульдэр, туж бадӟым сульдэр, туж чиляса, пиштыса со сылӥз тон азьын, шимес вал солэн вылтусыз.32Со сульдэрлэн йырыз чылк-чылк зарнилэсь лэсьтэмын, гадьыз, киосыз – азвесьлэсь, кӧтыз, макесъёсыз – ыргонлэсь,33пыдъюмылъёсыз – кортлэсь, пыдъёсыз – оглюкетэз кортлэсь, оглюкетэз горд сюйлэсь лэсьтэмын.34Тон адӟид сое: ки йӧттытэк, гурезьысь из палдыса, сульдэр борды, кортлэсь, горд сюйлэсь лэсьтэм пыдъёсыз борды шуккиськиз но соосты пыргытӥз.35Соку ваньмыз огазе пырдӥз: корт, горд сюй, ыргон, азвесь, зарни – кутсаськон итымысь тузон кадь луизы но, тӧл соосты нуиз, пытьызы но ӧз кыльы; нош сульдэрез пыргытӥсь из туж бадӟым гурезьлы пӧрмиз но быдэс музъемез тырмытӥз.36Та уйвӧт вал. Эксэй азьын солэсь пуштроссэ но вераломы.
37Тон эксэй, эксэйёслэн эксэйзы, тыныд Инмысь Инмар эксэйлык, кузёяськон, кужым, данлык кузьмаз,38вань адями пиосты но, кытын гинэ соос уг уло, луд пӧйшуръёсты, ин тылобурдоосты Со тыныд киулад сётӥз, тонэ ваньмызлы соослы кузё карыса пуктӥз, тон – со зарни йыр!39Тон бере мукет эксэйлык ӝутскоз, со тынадэзлэсь улынгес луоз, эшшо куинетӥез эксэйлык луоз – ыргон, таиз быдэс дуннеен кузёяськыса улоз.40Но ньылетӥез эксэйлык корт кадь юн луоз; кызьы корт ваньзэ пазьге, пыргытэ, озьы ик со но ваньзэ куашкатӥсь корт кадь пыргытоз, куашкатоз.
41Нош кызьы тон адӟид, пыдъёсыз но, пыдысьтыз чиньыосыз но оглюкетэз горшок лэсьтон сюйлэсь, оглюкетэз кортлэсь вал, – со эксэйлык люкиськылэмын луоз, отчы кортлэн кӧня ке но юнлыкез кылёз, тон адӟид ук горшок лэсьтон сюен сурам кортэз.42Кызьы пыдысь чиньыос оглюкетэз кортлэсь вал, мукетъёсыз горд сюйлэсь, озьы ик эксэйлык но оглюкетэз юн луоз, нош мукетыз шальтрамын луоз.43Нош кызьы тон горшок лэсьтон сюен сураськем кортэз адӟид, со тае возьматэ: соос адями кидыс пыр сурасько, но, ог-огенызы сураськыса, соослэсь одӥг маке уз пӧрмы, кызьы корт горд сюен уг сураськы.
44Со эксэйлыкъёс улон вакытэ Инмысь Инмар ноку но, пумтэм вапумъёсы куашкасьтэм эксэйлык ӝутоз, со эксэйлык мукет калыклы сётэмын уз луы; со вань эксэйлыкъёсты пазьгоз, куашкатоз, нош ачиз пумтэм вапумъёс ӵоже сылоз;45тон адӟид, кызьы гурезьысь из, ки йӧтытэк, ачиз палдӥз, но со кортэз, ыргонэз, горд сюез, азвесез, зарниез пыргытӥз. Быдӟым Инмар эксэйлы та бере мар луонэз тодон сётӥз. Шонер та уйвӧт, шонер солэсь пуштроссэ валэктон но!»
46Соку Навуходоносор эксэй ымныр вылаз уськытскиз но Данииллы йыбырттӥз, солы кузьымъёс, ческыт зын поттӥсь ӵындытонъёс вайыны косӥз.47Эксэй Данииллы шуиз: «Тон та лушкемлыкез усьтыны быгатӥд бере, зэм ик, тӥляд Инмарды инмаръёслэн Инмарзы, Со эксэйёслэн Кузё-Атайзы, лушкемлыкъёсты Усьтӥсь!»
48Соку эксэй Даниилэз вылӥ кариз, солы трос бадӟымесь кузьымъёс сётӥз, быдэс Вавилон ёрослы кивалтӥсь йыр кариз, Вавилонысь вань визьнодчиослы вылӥ кивалтӥсе пуктӥз.49Но Даниил эксэез куриз но, эксэй Седрахез, Мисахез, Авденагоез Вавилон ёросысь ужъёсын кивалтӥсе пуктылӥз, нош Даниил эксэйлэн кивалтон юртаз кылиз.
Глава 2