Выбрать язык
Книги Ветхого Завета
Книги Нового Завета
с русским текстом1Иоакимлэн, Иудей эксэйлэн, кивалтонэзлэн куинетӥ араз Иерусалим доры Вавилонлэн Навуходоносор эксэез вуиз, сое со котыртӥз.2Кузё-Инмар со киулэ Иоакимез, Иудеялэсь эксэйзэ, озьы ик Инмар коркась куд-ог сосудъёсты сётӥз. Со соосты Сеннаар музъеме, аслаз инмарезлэн корказ келяз. Та сосудъёсты со ас инмарезлэн коркасьтыз дуно тӥрлык возён интыяз пыртӥз.
3Соку эксэй евнухъёсызлэн кузёзылы, Асфеназлы, израиль пиос пӧлысь сӥё-дано, эксэй выжыысь потэмъёссэ вайыны косӥз,4чылкыт, чик шектэм мугоро, чебер тусбуё, вань наукаос удысын ужаны быгатӥсьёсты, наукаосты тодӥсь-валасьёсты, визьлы шаплыесь, эксэй юртын ужаны быгатоно пинал пиосты вайыны косӥз, халдей кыллы, книгаослы соосты дышетыны косӥз.5Эксэй ӝӧк вылысь сиёнэн соосты сюдыны, соослы вина сётъяны эксэй косӥз, сое со ачиз но юэ вал; куинь ар ӵоже соосты дышетыны, быдэ вуттыны косӥз, нош собере соос эксэй азе султыны кулэ вал.6Соос пӧлын Иуда выжыысь Даниил, Анания, Мисаил, Азария нимо пиос вал.7Евнухъёслэн кивалтӥсьсы соослэсь нимзэс тазьы воштӥз: Даниилэз – Валтасар, Ананиез – Седрах, Мисаилэз – Мисах, Азариез – Авденаго кариз.
8Данииллэн сюлмаз таӵе малпан пыриз: эксэй ӝӧк вылысь сиёнэн, винаен, кудзэ эксэй сие, юэ, медаз саптаськы вал шуыса, соин ик со евнухъёслэн эксэйзылэсь куриз, саптаськонлэсь утиськыны мед быгатысал шуыса.9Инмар Даниилэз гажаз-жаляз: евнухъёслэн кивалтӥсьсылы ӟеч мылкыд сётӥз.10Соку евнухъёслэн кивалтӥсьсы Данииллы шуиз: «Кышкасько мон кузёелэсь, эксэйлэсь, со ачиз вераз уго кыӵе сиёнэн, юонэн тӥледыз сюдыны-вордыны кулэ: со адӟиз ке, тӥляд ымнырды тӥляд ёзъёстылэн, пинал пиослэн, сярысь начаргес адӟиське, соку мон тӥледын сэрен эксэй азьын янгыше усё».
11Соку Даниил Амелсарлы, евнухъёслэн кивалтӥсьсылэн Даниилэз, Ананияез, Мисаилэз, Азарияез чаклан понна пуктэм муртэзлы, шуиз:12«Аслэсьтыд ляльчиостэ чакласа-эскерыса возь: дас нунал ӵоже милемлы сиыны емыш, юыны ву гинэ мед сётозы;13собере тон азе ми но, эксэй сиён сиыса улӥсь со пинал пиос но ымнырмес возьматыны мед лыктомы, нош собере ляльчиосыныд лэсьты озьы, кызьы тыныд кулэ».14Соослэсь куронзэс со санэ басьтӥз но дас нунал ӵоже соосты эскерыса-чакласа улӥз.15Дас нунал ортчем бере соослэн ымнырзы чебергес, мугорзы веськресгес луэм эксэй ӝӧк вылысь сиён-юонэн кӧтсэс тырыса улӥсь пинал пиослэн сярысь.16Соку Амелсар соослы эксэй ӝӧк вылысь сиёнэз, юонэз ӧз ни сётъя, емышен сюдыны кутскиз.17Та ньыль пинал пиослы Инмар тодонлык, вань книгаосты, визьлыкез валан сётӥз, нош Данииллы эшшо вӧтъёсты, адӟонъёсты валэктыны быгатонлык сётӥз.
18Та нуналъёс ортчем бере эксэй соосты ас дораз возьматыны вайыны косӥз, соку евнухъёслэн кивалтӥсьсы соосты Навуходоносор азе вайиз.19Эксэй соосын вераськиз, вань пинал пиос пӧлысь Данииллы, Ананиялы, Мисаиллы, Азариялы укшасез ӧз сюры. Соос эксэй дорын ужаса-тыршыса улыны кутскизы.20Котькыӵе ужын эксэй соослэсь визьмо валэктон басьтылӥз, мар сярысь гинэ со соослэсь ӧз юа, соос дас пол визьмогес ответ сётылӥзы, солэн эксэйлыказ улӥсь вань лушкемлыкъёсты тодыны быгатӥсьёсын, туно-пеллёосын ӵошатыса.21Кирлэн эксэйын пуконэзлэн нырысетӥ арозяз Даниил отын улӥз.
Глава 1