Выбрать язык
Книги Ветхого Завета
Книги Нового Завета
с русским текстом1Мон, Навуходоносор, аслам коркам куалекъятэк улӥ, ӟеч улӥ аслам четлыкъёсам.2Но мон кӧшкемыт уйвӧт адӟи, валесам кылльыкум, малпанъёсы, йырылэн адӟонъёсыз монэ паймытӥзы.3Соку мон косон сётӥ: уйвӧтлэсь пуштроссэ валэктон понна мон доры Вавилонысь вань визьнодчиосты мед ваёзы.4Лыктӥзы лушкемлыкез тодӥсьёс, туноос, халдейёс, пелляськисьёс; мон соослы уйвӧтэ сярысь верай, нош соос солэсь пуштроссэ валэктыны ӧз быгатэ.
5Ваньмыз бере мон доры Даниил пыриз, солэн нимыз Валтасар – мынам инмарелэн нимызъя, со бордын святой Инмарлэн духез улэ; солы мон уйвӧтэ сярысь верай:6«Валтасар, визьнодчиослэн йырзы! Мон тодӥсько, тон пушкын святой Инмарлэн духез улэ шуыса, нокудзэ но ватӥськем лушкемлыкез усьтыны тыныд секыт ӧвӧл; валэкты мыным уйвӧтам адӟемме, солэсь пуштроссэ.7Валесам кылльыкум, йырылэн адӟонэз таӵе вал:
музъем шорын будӥсь ӝужыт-ӝужыт писпуэз мон адӟи.
8Со писпу ӝужыт, юн вал, ӝуждалаез инбаме вуэ,
дуннелэн вань пумъёсысеныз со адӟиськыса улӥз.
9Куаръёсыз туж чебересь, емышъёсыз но туж трос,
солэн сиёнэз котькинлы но тырмылӥз;
солэн саюлаз ыркыт инты шедьтылӥзы кыр пӧйшуръёс,
солэн вайёсаз ин тылобурдоос кар лэсьто,
котькыӵе лулмугор солэн емышеныз кӧтсэ тырыса улӥз.
10Валесам кылльыкум, йырылэн адӟоназ мон адӟи: тани, инмысь васькиз Дун-Сьӧлыктэм, Сэзь Улӥсь.11Зол кеськыса, Со шуиз:
”Коралэ та писпуэз, улвайёссэ коралэ,
куаръёссэ бордысьтыз куашкатэ, емышъёссэ пазялэ;
улысьтыз пӧйшуръёс, вайёсысьтыз тылобурдоос мед кошкозы;
12нош зӧк выжызэ музъеме кельтэ;
корт, ыргон жильыосын думиськыса луд турын пӧлын
со инмысь лысвуэн коттӥськыса мед улоз,
улэп макеосын ӵош музъем выл турын пӧлын
солэн люкетэз мед луоз.
13Адями сюлэм со бордысь басьтэмын луоз,
со интые пӧйшур сюлэм сётэмын луоз,
со вылтӥ сизьым дыр-вапумъёс ортчозы.
14Сэзь Улӥсьёслэн косэменызы тазьы лэсьтыны пуктэмын,
Святойёслэн кенешенызы та кутэмын – улӥсьёс мед тодозы,
Вылысь Инмар адями эксэйлыкез киулаз возе шуыса,
сое сётэ солы, кинлы сётэмез потэ,
солы кузёе пуктэ адямиос пушкын ултӥям муртэ”.
15Таӵе уйвӧт адӟи мон, Навуходоносор эксэй; нош тон, Валтасар, валэкты солэсь пуштроссэ, уго мынам эксэйлыкысьтым одӥгез но визьнодчиос пӧлысь солэсь пуштроссэ валэктыны ӧз быгаты, нош тон быгатод, уго святой Инмарлэн духез тон пушкын улэ».
16Соку Даниил, кинлэн нимыз Валтасар, ог час мында паймыса улӥз, ас малпанъёсыз сое шугъяськытӥзы. Эксэй вераны кутскиз, со шуиз: «Валтасар! Та вӧт но солэн пуштросэз тонэ медаз шугъяськытэ». Валтасар ответ сётыса шуиз: «Кузёе! Та вӧт тонэ синазькыль карисьёс сярысь мед луоз вал, солэн пуштросэз тушмонъёсыд вылэ мед вуоз вал!17Писпу, кудзэ тон адӟид, бадӟым, юн, ӝуждалаез инмозь вуэ, быдэс дунне вылысен со адӟиськыса улӥз,18куаръёсыз туж чебересь, емышъёсыз туж трос, ваньмызлы сиыны тырмымон вал, со улын луд пӧйшуръёс улӥзы, улвайёсаз ин тылобурдоос асьсэлы кар лэсьтылӥзы,19та – тон, эксэй, вылӥе ӝутскид, кужмо луид, данлыкед будӥз, инмозь вуиз; музъемлэн пумысеныз пумозяз тон кузё луид.20Тон, эксэй, адӟид Инмысь васькись Сэзь Улӥсез, Святоез; Со шуиз: ”Коралэ та писпуэз, быдтэ сое, зӧк выжызэ гинэ музъеме кельтэ; корт, ыргон жильыосын луд турын пӧлын со инмысь лысвуэн коттӥськыса мед улоз, луд пӧйшуръёсын огазьын солэн люкетэз мед луоз – со вылтӥ сизьым дыр-вапумъёс ортчытозь”.
21Тани та уйвӧт мае возьматэ, эксэй, тани Вылысь Инмарлэн пуктон-косонэз, кудӥз вуоз мынам кузёе, эксэй, доры:22Тонэ адямиослэсь люкозы, луд пӧйшуръёсын огазьын луоз тынад улон интыед; ошез кадь тонэ турынэн сюдозы, инмысь лысвуэн тон коттэмын луод, тон вылтӥ сизьым дыр-вапумъёс ортчозы, тае тодытозяд: адямиослэн эксэйлыксылы Вылысь Инмар кузё луэ, сое сётэ солы, кинлы сётэмез потэ.23Нош писпулэсь зӧк выжызэ кельтыны косэм возьматэ тае: эксэйлыкед киулад ик кылёз, Инмысь кузё луонэз тон тодӥд ке.24Соин ик, эксэй, мынам тыныд сётэм визь-кенеше ярамон мед луоз: сьӧлыкъёсыдлэсь шонер ужъёс лэсьтыса мозмытӥськы, законлы пумит улэмдэ куанеръёсты гажан-жалян пыр ӵуш; тӥни кызьы тон пушкын каньыллык кема улыны быгатоз».25Ваньмыз та Навуходоносор эксэй доры вуиз.
26Дас кык толэзь ортчем бере Вавилонысь эксэй юрттӥ лёгаськыса ветлыкуз,27эксэй шуиз: «Та быдӟым Вавилон ӧвӧл-а, аслам бадӟым кужыменым аслэсьтым быдӟым луэмме данъян понна эксэйлыклы юрт ӧй пукты-а!»28Эксэй веранзэ ӧз на быдэсты, – Инмысь куара кылӥськиз: «Навуходоносор эксэй, тыныд верало: эксэйлык тон дорысь кошкиз!29Тонэ адямиослэсь люкозы, луд пӧйшуръёсын огазьын луоз тынад улон интыед; ошез кадь тонэ турынэн сюдозы, тон вылтӥ сизьым дыр-вапумъёс ортчозы, тае тодытозяд: адямиослэн эксэйлыксылы Вылысь Инмар кузё луэ, сое сётэ солы, кинлы сётэмез потэ!»
30Со куспын ик Навуходоносорлы верам та кыл быдэсмиз: адямиослэсь со люкемын вал, ош кадь турын сиыны кутскиз, инмысь лысвуэн мугорыз котмыса улӥз, йырсиез левлэн кадь будӥз, гижыосыз тылобурдолэн кадесь луизы.
31Со нуналъёс ортчем бере мон, Навуходоносор, синъёсме ин пала ӝутӥ, визьмы дорам берытскиз; Вылысь Инмарлы тау кари, ушъяй, данъяй Пумтэм Вапумъёс Улӥсез:
Солэн кузё луонэз – пумтэм вапумъёс ӵожелы,
Солэн эксэйлыкез выжыысь выжые улэ.
32Ваньмыз дунне вылын улӥсьёс номыр кадь но ӧвӧл;
Аслаз эрикеныз Со ин кужымъёслы но,
музъем вылын улӥсьёслы но кузё луэ,
ӧвӧл одӥг мурт но,
кудӥз мед быгатысал Солэн киызлы пумит султыны но
Солы шуыны:
«Мар Тон лэсьтӥд?»
33Со дыре визьмы дорам берытскиз, эксэйлыкелэн данлыкез доры сӥё-дано кивалтӥсь луонэ, азьвыл тусбуе но берытскизы; соку монэ юрттӥськисьёсы, кузёйыръёсы утчаса шедьтӥзы; эксэйлыкеным кивалтонэ мон берен пуктэмын вал, данлыке эшшо но вылӥе ӝутӥськиз.34Табере мон, Навуходоносор, Инмысь Эксэез данъясько, ушъясько, вылӥ карисько, Солэн вань ужъёсыз зэмлыкоесь, сюресъёсыз шонересь, вылтӥяськись муртэ зӥбыт-востэм карыны кужым Солэн кияз.
Глава 4