Выбрать язык
Книги Ветхого Завета
Книги Нового Завета
с русским текстом1Валтасар эксэй бадӟым юондыр ортчытӥз, сюрс кузёйыръёссэ люказ, сюрс муртъёслэн син азязы вина юиз.2Винаез веръям бераз Валтасар атаезлэсь, Навуходоносорлэсь, Иерусалим храмысь поттэм зарни, азвесь сосудъёссэ вайыны косӥз, эксэйлы, кузёйыръёслы, кышноосызлы, ляльчи кышноосызлы отысь юон понна.3Соку Иерусалимысь Инмар коркалэн вӧсяськон интыысьтыз басьтэм зарни сосудъёсты вайизы; со сосудъёсысь эксэй но кузёйыръёсыз, кышноосыз, ляльчи кышноосыз юизы.4Вина юизы, зарни, азвесь, ыргон, корт, пу, из инмаръёссэс данъязы.
5Самой со часэ адями чиньыос потӥзы но эксэй юртысь избурам борддор вылэ, лампадалы ваче пумитэ, гожъяны кутскизы, эксэй адӟиз гожъясь киез.6Соку эксэйлэн ымнырыз воштӥськиз; малпанъёсыз сое куалектытӥзы, кускыз лябӟиз, пыдесъёсыз куалекъяса огзы борды огзы йыгаськыны кутскизы.7Бадӟым куараен кеськиз эксэй, со доры визьнодчиосты, халдейёсты, туно-пеллёосты мед ваёзы шуыса; эксэй вераны кутскиз, Вавилонысь туноослы со шуиз: «Кин та гожтэмез лыдӟыны но солэсь пуштроссэ мыным валэктыны быгатоз, со мурт вылэ нап-горд дӥсь дӥсямын луоз, зарни жильы чыртыяз ошемын луоз, эксэйлыкысь кузёйыръёс пӧлын со куинетӥез адями луоз».8Эксэйлэн вань визьнодчиосыз пыризы, но ӧз быгатэ гожтэмез лыдӟыны, пуштроссэ но эксэйлы валэктыны ӧз быгатэ.9Валтасар эксэй туж алектӥськиз, ымныр тусыз воштӥськиз, кузёйыръёсыз куалектӥзы.
10Эксэйлэн, кузёйыръёслэн кылзы пумысен эксэйлэн анаез сиыса-юыса пукисьёслэн корказы пыриз; эксэйлэн анаез вераны кутскиз, со шуиз: «Эксэй, пумтэм вапумъёс ӵоже ул! Малпанъёсыд тонэ медаз куалектытэ, ымныр тусыд но медаз воштӥськы.11Тынад эксэйлыкад вань пиосмурт, кудӥз пушкын святой Инмарлэн духез улэ; тынад атаед улон аръёсы тодэмын вал: со пушкын югытлык, визьлык, нодлык улэ, кудӥз инмаръёслэн визьлыксылы укша, соин ик Навуходоносор эксэй, тынад атаед, сое ватӥськем лушкемлыкез тодӥсьёслы, туноослы, халдейёслы, пелляськисьёслы кузёйыр карыса пуктӥз, – ачиз тынад атаед – эксэй,12малы ке шуоно со бордын – Даниил бордын, – кудӥзлэсь нимзэ эксэй воштӥз, Валтасар кариз, вылӥ дух, тодонлык, визьлык улӥзы, со быгатӥз вӧтъёсты валэктыны, лушкемлыкъёсты усьтыны, герӟетъёсты сэратыны. Озьыен, Даниилэз мед ӧтёзы, со пуштроссэ валэктоз».
13Соку Даниилэз эксэй азе вуттӥзы, эксэй вераны кутскиз, со Данииллы шуиз: «Тон-а Даниил, пленэ шедем иудейёс пӧлысь одӥгез, тонэ-а мынам атае, эксэй, Иудеяысь вайиз?14Мон кылӥ тон сярысь, Инмарлэн Духез, югытлык, тодонлык тон бордын уло шуыса, туж визьмо луэмед но шарае потӥз.15Тани, мон доры туноос, пелляськисьёс ваемын вал та гожтэмез лыдӟон но солэсь пуштроссэ мыным валэктон понна; нош соос тае валэктыны ӧз быгатэ.16Нош тон сярысь мон кылӥ, пуштроссэ валэктыны, герӟетъёсты сэрттыны, пе, тон быгатӥськод; озьыен, та гожтэмез лыдӟыны быгатӥд ке, солэсь пуштроссэ мыным валэктӥд ке, нап-горд дӥсен дӥсямын луод, чыртыяд зарни жильы ошозы, мынам эксэйлыкам кузёйыръёс пӧлын куинетӥ адями луод».
17Соку Даниил эксэйлы ответ сётыса шуиз: «Кузьымъёсыд тон доры ик мед кылёзы, сӥё-дано карондэ мукетлы сёт; нош мар гожтэмын, сое мон эксэйлы лыдӟо, пуштроссэ но солы валэкто.18Эксэй! Вылысь Инмар тынад атаедлы, Навуходоносорлы, эксэйлык, быдӟымлыко луон, сӥё-сано, данлыко луон кузьмаз.19Вылысь Инмарлэн солы сётэм быдӟымлыкез азьын вань калыкъёс, выжыос, пӧртэм кылъёсын вераськись муртъёс куалекъяса, кышкаса улӥзы: кинэ потэ виемез, вие вал, кинэ улэп кельтэмез потэ, улэп кельтэ вал; кинэ вылӥ каремез потэ, сое вылӥ каре вал, кинэ ултӥямез потэ, сое ултӥя вал.20Нош куке солэн сюлмыз вылтӥяськыны кутскиз, духез лекомиз, кышканэз ӧз ни тоды, соку со эксэй престол вылысь сэрпалтэмын вал, сӥтэм-сантэмлы кельтэмын вал,21адями пиослэсь сое люкизы, сюлмыз пӧйшурлэн кадь луиз, кыр ишакъёсын огазьын улӥз; ошез кадь сое турынэн сюдӥзы, инмысь усись лысвуэн мугорыз котмыса улӥз, адямиослэн эксэйлыксылы Вылысь Инмарлэсь кузё луэмзэ тодытозяз, Солэсь эксэйлыклы кивалтӥсе кинэ пуктэмез потэ, сое пуктэмзэ тодытозяз.
22Нош тон, Валтасар, солэн пиез, сюлэмдэ зӥбыт-востэм ӧд кары, ваньзэ тае тодӥд ке но,23инъёслэн Кузё-Инмарзылы пумит султӥд, Солэн коркасьтыз тыныд сосудъёсты вайизы, соку тон но, тынад кузёйыръёсыд но, кышноосыд но, ляльчи кышноосыд но отысь вина юизы, азвесьлэсь, ыргонлэсь, кортлэсь, пулэсь, излэсь лэсьтэм инмаръёсты тон данъяса улӥд, соос уг но адӟо, уг но кыло, уг но валало; нош Инмарез, тынэсьтыд шокандэ, тынэсьтыд вань сюресъёстэ кияз Возисез, тон ӧд данъя.24Со понна ик Со дорысь ки ыстэмын, та гожтэт гожтэмын.25Тани, мар гожтэмын: мене, мене, текел, упарсин.26Тани кылъёслэн пуштроссы: мене – Инмар тынэсьтыд эксэйлыктэ мертаз но солы пум понӥз;27текел – тон вес вылын мертамын но тодмо луэм, тон туж капчи кыскиськод шуыса;28перес – тынад эксэйлыкед люкылэмын но мидянъёслы, персъёслы сётэмын».
29Соку Валтасарлэн косэмезъя, Даниил вылэ нап-горд дӥсь дӥсязы, чыртыяз зарни жильы ошизы, эксэйлыкысь кузёйыръёс пӧлын со куинетӥ адями луэ шуыса ялӥзы.
30Со уе ик Валтасар, Халдеялэн эксэез, виемын вал,31мидян пи, Дарий, эксэйлыкез киулаз басьтӥз, солы соку куатьтон кык арес вал.
Глава 5