Выбрать язык
Книги Ветхого Завета
Книги Нового Завета
с русским текстом1Дарийлы кулэ луэм эксэйлыклэн улосвылъёсызлы сю кызь кузёйыр пуктыны, эксэйлыклэн вань улосвылъёсаз соос мед луозы.2Нош соосын кивалтыны куинь кузёйыръёсты пуктӥз, соос пӧлысь одӥгез Даниил вал, улосвылъёслэн кузёйыръёссы соос азьын кыл кутылӥзы, эксэйлы нокыӵе сюлэмшугъяськонъёс медаз луэ шуыса.3Даниил ваньзылэсь таослэсь вылӥынгес вал, малы ке шуоно со пушкын вылӥ дух улӥз; эксэй малпаны кутскиз сое быдэс эксэйлыкен кивалтон уже пуктон сярысь.
4Соку кивалтӥсьёс, кузёйыръёс эксэйлыкен кивалтон пумысен Даниилэз янгыше уськытыны кыӵе ке но муг утчазы; но нокыӵе но мугъёс, шекъёс ӧз шедьтэ, малы ке шуоно со оскиськымон вал, нокыӵе но янгышез, сьӧлыкез солэн ӧз сюры.5Соку та адямиос шуизы: «Данииллы пумит кариськыны ум быгатэ, солэн Инмарезлэн законысьтыз сое янгыше уськытон муг ӧм ке шедьтэ».6Соку та кивалтӥсьёс, кузёйыръёс эксэй доры лыктӥзы но солы тазьы шуизы: «Дарий эксэй, пумтэм вапумъёс ӵоже ул!7Эксэйлыкысь вань покчи эксэйёс, кивалтӥсьёс, кузёйыръёс, визь-нод сётъясьёс, ожен кивалтӥсьёс куспазы огкыл шедьтӥзы; эксэй пуктон-косон сётэмын мед луысал, таӵе косон пуктэмын мед луысал шуыса огкылэ вуизы: кин куамын нунал ӵоже, тонэ сяна, эксэй, кыӵе ке но мукет инмарез яке адямиез буре вайиз ке, сое сьӧсь пӧйшуръёслэн гуазы куштоно.8Та пуктон-косонэз, эксэй, юнматы, косон улэ гожтӥськы, мидянъёслэн, персъёслэн законзы кадь медаз ни вошъяськы, сӧремын медаз ни луы со».
9Дарий эксэй та курон-косон улэ гожтӥськиз.10Нош Даниил, та курон-косон улэ гожтӥськем сярысь тодэм бераз ас корказ кошкиз; коркаезлэн бадӟым палысьтыз укноосыз Иерусалим пала усьтэмын вал, нуналлы быдэ со куинь пол, пыдес вылаз султыса, ас Инмарезлы вӧсяськылӥз, кылын ушъяз Сое, со азьвыл но тазьы ик лэсьтылэ вал.11Соку та адямиос чакласькизы но Данииллэсь вӧсяськыса улэмзэ адӟизы, кызьы со аслазъёс понна Инмарезлэсь гажан-жалянзэ куриз.12Собере соос эксэй доры лыктӥзы но солы шуизы: «Тон эксэйлэн та косонэз улэ ӧд-а гожтӥськы, кудаз шуэмын: куамын нунал ӵоже, тынэсьтыд сяна, кыӵе ке но инмарлэсь яке адямилэсь курись котькудзэ адямиез сьӧсь пӧйшуръёслэн гуазы куштоно?» Эксэй ответ сётыса шуиз: «Та кыл зэм луэ, кызьы мидянъёслэн, персъёслэн законзы вошъяськисьтэм луэ».
13Соку соос, ответ сётыса, эксэйлы шуизы: «Пленэ шедем иудей пиос пӧлысь Даниил тон шоры уг учкы, эксэй, тынэсьтыд гожтэм курон-косондэ но санэ уг поны, нуналлы быдэ, куинь пол кутскыса, ас Инмарез азьын со вӧсяське».14Тае кылэм бераз эксэйлэн кӧтыз туж ӝож луиз, со сюлмаськыны кутскиз Даниилэз утён пумысен, шунды пуксьытозь ик со туж тыршиз сое мозмытыны.15Нош со адямиос эксэй доры лыктыса шуизы: «Эксэй, тон тае тод: мидянъёслэн но персъёслэн законзыя нокудзэ но эксэен юнматэм пуктон-косонэз воштыны уг луы».16Соку эксэй косэмъя Даниилэз со доры вуттӥзы, сое левъёс пӧлы гуэ куштӥзы, соку эксэй Данииллы шуиз: «Тынад Инмаред, Кудӥзлы тон дугдылытэк ужаськод-тыршиськод, утёз тонэ».
17Из вайизы но гулэсь пасьсэ ӵоктазы, эксэй киыныз со вылэ печать понӥз, кузёйыръёсызлэсь печатьсэс но нюртӥз, Даниил пумысен нокыӵе курон-косон медаз ни воштӥськы шуыса.18Собере эксэй аслаз юртаз кошкиз, сиськытэк изьыны выдӥз, сиён пыртыны ик ӧз лэзьы, бордысьтыз уммез кошкиз.19Ӵукна вазь ик, куазь сактон азьын, эксэй султӥз но шаплы-шаплы левъёслэн гузы доры мынӥз,20гу доры лыктыса, ӝожмыт куараен со Данииллы вазиськиз, эксэй Данииллы шуиз: «Даниил, улэп Инмарлэн ляльчиез! Тынад Инмаред, Кудӥзлы тон дугдылытэк ялан ужаськод-тыршиськод, быгатӥз-а тонэ сьӧсь пӧйшуръёслэсь утьыны?»21Соку Даниил эксэйлы шуиз: «Эксэй, пумтэм вапумъёс ул!22Мынам Инмаре Аслэсьтыз Кылчинзэ ыстӥз но сьӧсь пӧйшуръёслэсь ымзэс пытсаз, соос монэ вӧсь ӧз каре, малы ке шуоно Инмар азьын мон дун-чылкыт вал, тон азьын но, эксэй, мон йыруж ӧй лэсьты».23Соку эксэй со понна туж но туж шумпотӥз, Даниилэз гуысь поттыны косӥз; Даниилэз гуысь ӝутӥзы, нокыӵе но шекез-яраез солэн ӧй вал, малы ке шуоно со ас Инмарезлы оскыса улӥз.24Эксэй косӥз но, Даниилэз янгыше уськытӥсь адямиос татчы вуттэмын вал, соосты левъёс пӧлы гуэ куштӥзы, соосты асьсэдыз но, нылпиоссэс но, кышнооссэс но; гу пыдсы ӧз на вуэ, кызьы соосты левъёс кабылӥзы, вань лыоссэс сузмытӥзы.
25Та бере Дарий эксэй быдэс музъем вылын улӥсь вань калыкъёслы, выжыослы, пӧртэм кылын вераськисьёслы гожтӥз: «Тупаса улонды мед йылоз!26Мон таӵе курон-косон сётӥсько: эксэйлыкелэн вань ёросъёсаз Данииллэн Инмарез азьын гажаса, куалекъяса мед улозы, малы ке шуоно
Со улэп Инмар, пумтэм вапумъёс Улӥсь,
Солэн эксэйлыкез куашкасьтэм,
пумтэм вапумъёс ӵожелы со Кузё луэ.
27Со мозмытэ, уте,
инмын но, музъем вылын но паймымон ужъёс,
паймымон тодметъёс возьматэ,
Со Даниилэз сьӧсь пӧйшуръёслэн кужымзылэсь утиз».
28Нош Даниил, Дарий эксэйын пукыку но, Персияысь Кир эксэйын пукыку но, азинлыкен-берекетэн улӥз.
Глава 6