Выбрать язык
Книги Ветхого Завета
Книги Нового Завета
с русским текстом1Вавилон эксэйлэн, Валтасарлэн, нырысетӥ араз Даниил кӧлан интыысеныз азьпалан мар луонэз уйвӧтаз адӟиз. Соку со та уйвӧтэз гожтӥз, солэсь пуштроссэ усьтӥз.
2Веранзэ кутскыса, Даниил шуиз: «Уйвӧтам мон тани мае адӟи: тани, туж бадӟым зарезь вылын инлэн ньыль тӧлъёсыз нюръяськизы,3зарезь вуысь ньыль бадӟымесь пӧйшуръёс потӥзы, соос ог-огзылы уг укшало вал.4Нырысетӥез левлы укша, нош бурдъёсыз ӧрӟилэн кадесь; мон сое учкыса улӥ, бурдъёссэ ишкалтытозязы, музъем вылысь со ӝутэмын вал, адями кадь пыд йылаз султӥз, адями сюлэм солы сётэмын вал.5Тани, эшшо пӧйшур, кыкетӥез, со гондырлы укша, огпалан сылӥз, ым пушказ пиньёсыз вискын куинь вазерпинь адӟиське; солы тазьы шуизы: ”Султы, трос сӥль си!”
6Собере эшшо мон адӟи: тани эшшо пӧйшур, барслы со укша; тыбыр вылаз тылобурдолэн кадь ньыль бурдыз, та пӧйшурлэн ньыль йырыз, солы кужым сётэмын вал.7Та бере уйвӧтам мон адӟи на: тани ньылетӥ пӧйшур, шимес, кышкыт, туж кужмо; солэн бадӟымесь корт пиньёсыз; со ньылэ но сузмытэ, кылемзэ пыдыныз лёга; ваньмызлэсь азьвыл пӧйшуръёслэсь со висъяське, солэн дас сюръёсыз вал.8Мон та сюръёс шоры учкыса улӥ, но тани, соос вискытӥ эшшо пичи сюр потӥз на, азьвылъёсыз куинь сюръёс выжыенызы валче со пичи сюр азьысь поттыса куштэмын вал, но тани, та сюр вылын синъёс вань, соос адями синъёслы укшало; вылтӥяськыса вераськись ымыз вал.
9Собере мон адӟи:
престолъёс пуктэмын, отчы пумтэм нуналъёс Улӥсь пуксиз;
дӥсянэз Солэн лымы кадь тӧдьы,
йырысьтыз йырсиез чылкыт ыжгон кадь;
Солэн престолэз гомась тыл кадь, поглянъёсыз – ӝуась тыл.
10Со азьтӥ тыл шур потыса кошке;
сюрсъёсын, сюрсъёсын Солы ужазы-тыршизы,
пумтэм трос сюрсъёс Со азьын сылӥзы;
судить карисьёс пуксизы но, книгаос усьтӥськизы.
11Соку мон адӟи: сюрлэн вылтӥяськыса вераськемез понна мынам син азям пӧйшур виемын вал, мугорзэ сузмытӥзы но тыл пушкы сутыны куштӥзы.12Мукет пӧйшуръёслэн но кивалтон кужымзы быдтэмын вал, улон даурзы огдырлы, одӥг сроклы гинэ сётэмын вал.
13Уйвӧтам мон адӟи:
тани, ин пилемъёс вылын Адями Пилы укшась лыктӥз,
пумтэм нуналъёс Улӥсь доры вуиз, Сое Со доры вайизы.
14Вань калыкъёс, выжыос, пӧртэм кылъёсын вераськисьёс
Солы мед ужалозы-тыршозы шуыса,
Солы кужым, данлык, эксэйлык сётӥзы,
Солэн кивалтонэз пумтэм вапумъёс ӵоже луоз, со уз быры,
Солэн эксэйлыкез уз куашка.
15Мон, Даниил, мынам пушкысьтым, мугорысьтым духе куалектӥз, йырылэн адӟонъёсыз монэ паймытӥзы.16Сылӥсьёс пӧлысь одӥгез доры лыктӥ но таослэн зэмос пуштроссы сярысь юай, со монэн вераськыны кутскиз, веранлэсь пуштроссэ мыным валэктӥз:17”Та бадӟым, ньыль пӧйшуръёс тае возьмато: музъем вылысь ньыль эксэйёс потозы.18Собере Вылысь Инмарлэн дун-сьӧлыктэм улӥсьёсыз эксэйлыкез басьтозы, вапумысь вапуме, пумтэм вапумъёс ӵоже эксэйлыкен кузёяськозы”.
19Соку мынам ньылетӥ пӧйшур сярысь мургес тодэме потӥз, со уго мукетъёсызлэсь висъяське вал, туж шимес вал: корт пинё, ыргон гижыё, сыскиз, кесяз, нош кылемзэ пыд улаз лёгаз;20йырысьтыз дас сюръёсыз сярысь, выльысь потэм мукет сюрыз сярысь но тодэме потӥз, солэн азьысьтыз куинез усиз, – самой со сюр сярысь, кудӥзлэн синъёсыз, вылтӥяськыса вераськись ымыз вал, вылтусызъя мукетъёсызлэсь со бадӟымгес луиз.21Мон адӟи, кызьы таиз сюр дун-сьӧлыктэм улэмъёсын нюръяськыса улӥз, соосты вормиз,22пумтэм нуналъёс Улӥсь лыктытозь, Вылысь Инмарлэн дун-сьӧлыктэмъёсыз кие судэз сётытозь; дун-сьӧлыктэм улэмъёслы эксэйлыкез киязы басьтыны дыр вуиз.
23Та сярысь со шуиз: ”Ньылетӥ пӧйшур ньылетӥ эксэйлык музъем вылын луоз, со вань эксэйлыкъёслэсь висъяськоз, со вань музъемез сиёз, лёгалоз, пыргытоз.24Нош дас сюръёс тае возьмато: та эксэйлыкысь дас эксэйёс потозы, нош соос бере мукетыз потоз, азьвылъёсыз сярысь со мукет луоз, куиньзэ эксэйёсты чусомытоз,25Вылысь Инмарлы пумит кылъёс вералоз, Вылысь Инмарлэсь дун-сьӧлыктэмъёссэ ултӥялоз; праздник дыръёсты, законэз воштыны мылкыд кароз, солэн киулаз дырлы-вапумлы, дыръёслы-вапумъёслы, ӝыны дырлы-вапумлы соос сётэмын луозы.26Собере судьяос пуксёзы но солэсь виылыны, пумозяз быдтыны кужымзэ талалозы.27Соку Вылысь Инмарлэн дун-сьӧлыктэм калыкезлы эксэйлык, кужым, быдэс дунне вылысь эксэйёслэн быдӟымлыксы сётэмын луоз, Солэн эксэйлыкез пумтэм вапумъёс ӵоже улэ, кивалтӥсьёс ваньзы Солы ужаса-тыршыса, тэрытскыса улозы”.
28Татын веранлэн пумыз. Монэ, Даниилэз, ас малпанъёсы туж паймытылӥзы, ымныр тусбуе ик воштӥськиз; нош кылэз мон сюлмам вози».
Глава 7