Выбрать язык
Книги Ветхого Завета
Книги Нового Завета
с русским текстом1Валтасар эксэйлэн куинетӥ арзэ эксэйын пукон араз мыным, Данииллы, кыкетӥ ползэ ни адӟон вал.2Со адӟонын мон асме Елам ёрослэн Сузы нимо шоркарысьтыз адӟи; со адӟонын мон асме Улай шур дуре сюриськем шуыса адӟи.
3Синме ӝутӥсько но адӟисько: тани шур дурын така сылэ, солэн кык сюрез, сюръёсыз ӝужытэсь, но одӥгез мукетызлэсь ӝужытгес, ӝужытэз берлогес ӝутскиз.4Адӟи мон, кызьы та така шундыпуксён пала, уйпала, лымшор пала лекаса сылӥз, нокыӵе пӧйшур но со азьын сылыны ӧз чида, нокин но солэсь утиськыны ӧз быгаты; мар лэсьтэмез потӥз, сое ик лэсьтӥз, бадӟымъяськиз.
5Та шоры мон сак учки, но тани, музъем борды йӧтӥськытэк, музъемлэсь быдэс тусбуйзэ басьтыса, шундыпуксён палась кечтака лыктэ; та кечтакалэн синъёсыз куспын сюрез адӟиське.6Кечтака сюро така шоры урдскиз, шур дурын сылыкуз, мон сое адӟи, туж бадӟым вожпотонэн со вылэ со тэтчиз.7Мон адӟи: такалэн матаз лыктӥз но, солы туж лексэ поттыса, со вылэ урдскиз, погыртӥз сое, кык сюрзэ но тӥяз; такалэн солы пумитъяськыны кужымез ӧз ни тырмы, кечтака сое музъем вылэ уськытӥз но лёгаса куштӥз, такаез утьыны нокин но ӧз ни быгаты.8Соку кечтака ассэ укыр вылӥ кариз; нош куке со кужым люказ, соку солэн бадӟым сюрез чигиськиз но со интые дуннелэн ньыль палаз ик учкыса улӥсь сюръёсыз потӥзы.9Соос пӧлысь одӥгысьтыз сюрысь пичи сюр потӥз, со лымшор пала, шундыӝужан пала, синмаськымон музъем пала туж зол будӥз,10Инмысь воинъёс дорозь ӝутӥськиз но отысь соослэсь оглюкетсэ, кизилиосты музъем вылэ куштӥз но пыд улаз лёгаз,11та воинъёслэн Азьветлӥсьсы вылэ но со урдӥськиз, нуналлы быдэ Солы курбон сётонэз быдтэмын вал, Солэн дун-чылкыт интыез саптамын вал,12дун-шектэм улымтэзы понна воинъёс нуналлы быдэ сётӥськись курбонэн валче куштэмын вал, со зэмлыкез пыд улэ куштӥз, сыӵе ужез лэсьтонын солэн азинлыкез вал.
13Одӥг дун-шектэм улӥсьлэсь верамзэ мон кылӥ, кыӵе ке но юась-верась муртлы со шуиз: «Нуналлы быдэ сётӥськись курбон сярысь, куашкатӥсь-быдтӥсь сьӧлыклэсь кышкатэк улон сярысь та адӟон кӧня дыр кыстӥськоз? Кытчыозь та дун-чылкыт интыез, воинъёсты лёгаса возёзы?»14Со мыным шуиз: «Кык сюрс куинь сю ӝыт но ӵук; соку вӧсяськон инты чылкыталоз».
15Озьы вал: куке мон, Даниил, та адӟонэз адӟи но солэсь пуштроссэ валаны тырши, соку мон азе пиосмурт тусбуй султӥз.16Улай шур шорысь мон пиосмурт куара кылӥ, со дораз ӧтьыса шуиз: «Гавриил! Валэкты солы та адӟонлэсь пуштроссэ!»17Мынам сылон интыям со лыктэм бере мон туж куалектӥ но ымныр вылам уськытски; со мыным шуиз: «Тод, адями пи, та адӟон берпум аръёсты возьматэ!»18Со монэн вераськыку, мон, номыре валатэк, ымнырыным музъем вылэ выдыса кылли; со мон борды йӧтӥськиз но монэ ас интыям султытӥз.19Соку со шуиз: «Тани, мон тыныд усьтӥсько, мар луоз вожпотонлэн берпуметӥ нуналъёсаз; уго та тупатэм дырлэн-вапумлэн пумаз луоз.20Кык сюро така, кудзэ тон адӟид, – со Мидиялэн но Персиялэн эксэйёссы.21Нош лусьтро кечтака – со Грециялэн эксэез, синъёсыз куспысь бадӟым сюр – со солэн нырысетӥ эксэез;22со чигиськиз но, со интые мукетъёсыз ньыль сюръёс потӥзы: со – та калыкысь ньыль эксэйлыкъёс ӝутскозы, но соослэн кужымзы солэн кадь ӧвӧл.
23Эксэйлыкъёссы куашкан азьын, оскон бордысь куштӥськемъёс законлы пумит улонзылэсь мертэтсэ тырмытэм бере, возьыттэм, лек, кескич эксэй потоз.24Солэн кужымез юнмалоз, аслаз кужыменыз ӧвӧл, со паймымон куашкатонъёс лэсьтоз, дун-шектэм улӥсь калыкез, кужмоосты быдтыны азинлыкез луоз,25со ас визьмыныз кескич амалэн азинлык басьтоз, сюлмыныз со вылтӥяськоз, каньылэн улон вакытазы ик троссэ со быдтоз, кузёос пӧлысь Кузёлы пумит султоз, но со быдтэмын луоз, но адями киын со быдтэмын уз луы.26Ӝытэн ӵук сярысь адӟон, кудӥз сярысь верамын, зэм луэ; нош тон со адӟонэз ватыса возь, уго отын вераськон мынэ азьпалась кема-кема улоно вакытысь нуналъёс сярысь».
27Мон, Даниил, чылкак катьтэмми, кӧня ке но нунал ӵоже виси; собере султӥ но эксэй ужъёсын вырыны кутски; та адӟонлы мон паймемын вал, сое мон ӧй вала.
Глава 8